އެކަށީގެންވާ ރެސްޓު ނުލިބޭތީ ބެންޓޯ ހުރީ ހިތްހަމަނުޖެހިފައި

ފީފާ ވޯލްޑް ކަޕްގެ ގަދަ 16 ގެ މެޗަށް ކުރިމަތިލާއިރު އެކަށީގެންވާ ރެސްޓެއް ނުލިބޭތީ ސައުތު ކޮރެއާގެ ކޯޗު ޕައުލޯ ބެންޓޯ ނުރުހުން ފާޅުކޮށްފިއެވެ.

މުބާރާތުގެ ގަދަ 16 ގައި ކޮރެއާ އިން ނުކުންނާނީ ބްރެޒިލާ ދެކޮޅަށެވެ. އެ މެޗު އޮންނާނީ ހޯމަ ދުވަހުގެ ރޭ ރާއްޖެ ގަޑިން 12 ޖަހާއިރުއެވެ. މެޗުގެ ކުރިން އޮތް ޕްރެސް ކޮންފަރެންސްގައި ނޫސްވެރިޔަކު ބެންޓޯއާ ކުރި ސުވާލަކީ ގްރޫޕް ސްޓޭޖުގެ ކުޅުން ނިންމައި، ގަދަ 16 އަށް ނުކުންނައިރު އެކަށީގެންވާ ރެސްޓެއް ލިބުނުތޯއެވެ. ބެންޓޯ ބުނީ ރެސްޓެއް ނެތި ގާތް ގާތުގައި މެޗުތައް ކުޅުމަކީ އިންސާނުންނަށް ކުރެވޭ ވަރުގެ ކަންކަމެއް ނޫން ކަމަށެވެ. އެއީ އިންސާފުވެރި ގޮތެއް ކަަމަށް ވެސް ނުދެކޭ ކަމަށާއި ނަމަވެސް އެކަމާ ކުރިމަތިލައި، އެގޮތަށް އަމަލުކުރަން ޖެހޭނެކަން ފާހަގަކުރަމުން ބެންޓޯ ބުނީ އެއީ ފީފާގެ ނިންމުމެއް ކަމަށެވެ.

މީގެ އިތުރުން ބެންޓޯ ބުނީ ބްރެޒިލް ކަހަލަ ބޮޑެތި ޓީމުތަކާ ދެކޮޅަށް ކުޅުމަކީ އުނދަގޫ ކަމެއް ކަމަށެވެ. އޭނާގެ ނަޒަރުގައި މުބާރާތް ކާމިޔާބު ކުރާނެ ކަމަށް އެންމެ ބޮޑަށް ބެލެވޭ ޓީމަކީ ބްރެޒިލް ކަމަށެވެ. ބެންޓޯ ބުނީ އެ ލިސްޓުގައި އޮތް ހަމައެކަނި ޓީމަކީ ބްރެޒިލް ނޫން ކަމަށާއި، ނަމަވެސް އެންމެ ވަރުގަދައީ އެމީހުން ކަމަށެވެ. ބެންޓޯ ފާހަގަ ކުރި ގޮތުގައި އެކަންކަމާއެކު ވެސް މެޗު އިތުރަށ އުނދަގޫވާނެއެވެ.

ބެންޓޯ ބުނީ ނޭމާ ނެތި ވެސް ބްރެޒިލް ޓީމަކީ ވަރުގަދަ ޓީމެއް ކަމަށެވެ. ނަމަވެސް އޭނާ ވެސް އެދެނީ ނޭމާ ހުރެގެން ބްރެޒިލާ ދެކޮޅަށް ކުޅުމަށް ކަމަށެވެ. އަދި މައުލޫމާތު ލިބޭ ގޮތުގައި ނޭމާ މިހާރު ހުރީ މުޅިން ފިޓުކޮށް ކަމަށާއި، ފުރަތަމަ 11 ގައި އޭނާގެ ހިމަނާނެތޯ ނޫންތޯ ނިންމާނީ ބްރެޒިލްގެ ކޯޗު ކަމަށެވެ. އަބަދުވެސް އެދެނީ އިދިކޮޅު ޓީމުގެ ވެސް މޮޅު ކުޅުންތެރިން ތިބެގެން ކުޅުމަށް ކަމަށާއި މެޗުގައި ފުރުސަތުގެ ބޭނުން ހިފައި، ކޮރެއާ އިން ސަމާލުވެގެން ކުޅެން ޖެހޭނެ ކަމަށެވެ.

ބްރެޒިލް އަދި ކޮރެއާ ވާދަކުރާ މެޗު ފަށާނީ ހޯމަ ދުވަހުގެ ރޭ ރާއްޖެ ގަޑިން 12 ޖަހާއިރުއެވެ.