ބްރިޖުގެ މަސައްކަތްކުރިޔަށްދާ ގޮތް ކޮމިޓީން ބަލައިފި
މާލޭގައި މިހާރު ނިމިފައިވާ ލޭންޑް ޕައިލިންގް މަސައްކަތާއި އަދި ފުރަތަމަ މެރީން ޓެސްޓް ޕައިލްގެ އިތުރުން ސައިޓުގައި ހިނގަމުންދާ އެހެނިހެން މަސައްކަތްތައް ބައްލަވާލައްވާފައިވޭ
ބްރިޖް މަސައްކަތް ހިނގާގޮތް ޖޮއިންޓް ކޮމިޓީން ބަލަނީ
ތިލަމާލެ ބްރިޖް މަޝްރޫއުގެ މަސައްކަތް ރިވިއުކުރުމުގެ މަސައްކަތްކުރަމުންދާ ޖޮއިންޓު ޕްރޮޖެކްޓު މޮނީޓަރިން ކޮމިޓީން ޕްރޮޖެކްޓު ސައިޓަށް ޒިޔާރަތް ކުރައްވައިފިއެވެ.
ޖޮއިންޓު ކޮމިޓީން ބާއްވަމުންދާ ބައްދަލުވުންތަކުގެ 5 ވަނަ ބައްދަލުވުން ބާއްވާފައިވާކަމަށް ޕްލޭނިންގ މިނިސްޓްރީން ބުނެއެވެ. މި ބައްދަލުވުމުގައި ދިވެހި ސަރުކާރާއި އިންޑިއާ ސަރުކާރުގެ އިސް އޮފިޝަލުން ބައިވެރިވެ ވަޑައިގެންނެވިކަމަށް ޕްލޭނިންގ މިނިސްޓްރީން ބުނެއެވެ. ރާއްޖޭގައި ހުންނަވާ އިންޑިއާގެ ސަފީރު މުނޫ މަހާވަރު ވެސް އެ ބައްދަލުވުމުގައި ބައިވެރިވެ ވަޑައިގަންނަވާފައިވެއެވެ.
މި ބައްދަލުވުމުގެ ބައިވެރިންވަނީ ޕްރޮޖެކްޓު ސައިޓަށް ޒިޔާރަތް ކުރައްވާ މާލޭގައި މިހާރު ނިމިފައިވާ ލޭންޑް ޕައިލިންގ މަސައްކަތާއި އަދި ފުރަތަމަ މެރީން ޓެސްޓު ޕައިލްގެ އިތުރުން ސައިޓުގައި ހިނގަމުންދާ އެހެނިހެން މަސައްކަތް ބައްލަވާލައްވާފައިކަމަށް ވެސް ޕްލޭނިންގ މިނިސްޓްރީން ބުނެއެވެ.
ބްރިޖުގެ ތަނބުތަކުގެ ތެރެއިން އެއްގަމުގައި ޖަހާ ފުރަތަމަ ތަނބު ވަނީ ޖަހާފައެވެ. މިތަނބު ޖެހީ މާލޭގެ އިންޑަސްޓްރިއަލް ވިލެޖު ސަރަހައްދުގައެވެ. ތިލަމާލެ ބުރިޖްގެ މަސައްކަތް އެންމެ ފުރަތަމަ ފެށީ މާލެ ކޮޅުންނެވެ. އެ މަޝްރޫއުގެ ފުރަތަމަ ފިޔަވަހީގައި ގުޅާލާނީ މާލެ އާއި ވިލިމާލެ އެވެ. އެ މަސައްކަތް އަންނަ އަހަރު ނިމޭނެ ކަމަށް ސަރުކާރުން ބުނެއެވެ. ތިލަފުއްޓާއި ގުޅިފަޅު ގުޅާލައި މުޅި ބްރިޖުގެ މަސައްކަތް އެއްކޮށް ނިންމާލެވޭނީ 2024 ގައި ކަމަށް ސަރުކާރުން ބުނެއެވެ.
މާލެއާއި، ވިލިމާލެ އަދި ގުޅީފަޅާއި ތިލަފުށި ގުޅުވާ ބުރިޖުގެ އެއްބަސްވުމުގައި ސޮއިކޮށްފައިވަނީ މިދިޔަ އަހަރުގެ އޮގަސްޓު މަހުގެ 26 ވަނަ ދުވަހުއެވެ. މިއީ 6.7 ކިލޯމީޓަރުގެ ބުރިޖެކެވެ. މި މަޝްރޫއުގެ ދަށުން ގުޅިފައިވާ 3 ބުރިޖް ހިމެނެއެވެ. އެއީ މާލެއިން ވިލިމާލެ ގުޅުވާ ބުރިޖާއި، ވިލިމާލެއިން ގުޅީފަޅަށް އަދި ގުޅީފަޅުން ތިލަފުއްޓަށް އަޅާ ބުރިޖެވެ. 3 ބްރިޖު ގުޅާލަދޭ މަގުތަކާއެކު، 6.7 ކިލޯމީޓަރަށް މި ބްރިޖު ދެމިގެންދާނެއެވެ. ހަމައެކަނި، މާލެއާއި ވިލިމާލެ ގުޅާލަދޭ ފުރަތަމަ ބްރިޖުގެ ދިގުމިން ވެސް، މިވަގުތު ފެންނާން އޮތް ބްރިޖަށްވުރެ ދިގުވާނެއެވެ. އެއީ ގާތްގަނޑަކަށް 1.3 ކިލޯމީޓަރުގެ ދިގު ބްރިޖެކެވެ. އެހެންކަމުން، ރައީސް ސާލިހުގެ ސަރުކާރުން އެ މަޝްރޫއެއްގެ މަސައްކަތް ދެ އަހަރުގެ ތެރޭގައި ނިންމަން އަމާޒު ހިފައިފައިވާ މި ބިޔަބޮޑު މަޝްރޫއު ވެގެންދާނީ، ރާއްޖޭގެ ތާރީޚުގައި ފެނިގެންދާނެ އެންމެ ބޮޑު މަޝްރޫއަށެވެ.
