ފީފާ ވޯލްޑް ކަޕް ގްރޫޕް ސްޓޭޖުގެ ފަހު މެޗުގައި ޓިއުނީޝިޔާއާ ދެކޮޅަށް ނުކުންނައިރު ޓީމަށް ބަދަލު އަތުވެދާނެ ކަމަށް ފްރާންސްގެ ކޯޗު ޑިޑިއޭ ޑެޝޯމްޕްސް ބުނެފިއެވެ.

ޓިއުނީޝިޔާ މެޗަށް ނުކުންނައިރު ފްރާންސް އަށް ވަނީ މުބާރާތުގެ ދެ ވަނަ ބުރުން ޖާގަ ލިބިފައެވެ. ކުޅުނު ދެ މެޗުން ވެސް މޮޅުވެ އެ ޓީމު ވަނީ ހަ ޕޮއިންޓު ހޯދާފައެވެ. ގްރޫޕް ސްޓޭޖުގެ ފުރަތަމަ މެޗުގައި ފްރާންސް އިން ވަނީ 4-1 އިން އޮސްޓްރޭލިޔާ ބަލިކޮށްފައެވެ. ދެ ވަނަ މެޗުގައި ޑެންމާކު އަތުން މޮޅުވީ 2-1 އިންނެވެ. ޓިއުނީޝިޔާ މެޗުން މޮޅުވެގެން ފްރާންސް އަށް ގްރޫޕްގެ އެއް ވަނަ ޔަގީން ކުރެވޭނެއެވެ.

ޑެޝޯމްޕްސް ބުނީ ޓިއުނީޝިޔާއާ ދެކޮޅަށް ނުކުންނަ ފްރާންސް ޓީމު އެ މެޗުގައި އެންމެ ރަނގަޅު ނަތީޖާ ނެރުމަށް މަސައްކަތް ކުރާނެ ކަމަށެވެ. އޭނާ ބުނީ ހާލަތުގެ ގޮތުން ބަދަލުތަކެއް ގެންނަން ޖެހުމަކީ ވެސް އެކަށީގެންވާ ކަމެއް ކަމަށެވެ. ޑެޝޯމްޕްްސް ބުނީ ފްރާންސް އޮތީ ދެ ވަނަ ބުރަށް ގޮސްފައި ކަމަށާއި، މިހާރު ގްރޫޕްގައި އިތުރު ޕޮއިންޓެއް ކޮންމެހެން ބޭނުން ވެސް ނުވާ ކަމަށެވެ. ނަމަވެސް އަމާޒަކީ ހުރިހާ މެޗެއް ކާމިޔާބުކުރުންކަމަށް ވުމުން، ޓިއުނީޝިޔާ މެޗުގައި ވެސް މަސައްކަތް ކުރާނީ އެކަމަށް ކަމުގައި އޭނާ ބުންޏެވެ.

ޓިއުނީޝިޔާއާ ދެކޮޅަށް ފްރާންސް އިން ނެރޭ ޓީމަށް ބަދަލުތަކެއް އައުމަކީ އެކަށީގެންވާ ކަމެކެވެ. އެގޮތުން ކީޕަރު ހޫގޯ ލޮރިސްގެ ބަދަލުގައި ސްޓީވް މެންޑަންޑާ ކުޅެން އެރުވުމަކީ ގާތް ކަމެކެވެ. މީގެ އިތުރުން ފޯވާޑް އޮސްމާން ޑެމްބެލޭގެ ބަދަލަށް ކިންގްސްލީ ކޯމަން އެރުވަކީ ވެސް ޑެޝޯމްޕްސް ނިންމައިފާނެ ނިންމުމެކެވެ.

މީގެ އިތުރުން ޑެޝޯމްޕްސް ވަނީ އެ މެެޗުގައި ކީލިއަން އެމްބާޕޭ އަށް ރެސްޓެއް ދީފާނެ ކަމުގެ އިޝާރާތެއް ވެސް ކޮށްފައެވެ. އޭނާ ބުނީ ފިޒިކަލީ އެމްބާޕޭ ހުރީ ވަރަށް ރަނގަޅަށް ކަމަށެވެ. ޑެޝޯމްޕްސް ބުނީ އެމްބާޕޭ އަކީ އަބަދުވެސް ފްރާންސް ޓީމަށް މުހިންމު ކުޅުންތެރިޔެއް ކަމަށާއި، އޭނާގެ މަސައްކަތުން އެކަން ސާބިތުވެސްވާ ކަމަށެވެ. ޑެޝޯމްޕްސް ބުނީ މިހާރު އެމްބާޕޭ އަކީ 18 އަހަރުގެ ކުޅުންތެރިޔެއް ނޫން ކަމަށާއި، އޭނާ އަކީ ތަޖުރިބާ ހުރި ކުޅުންތެރިޔެއް ކަމަށެވެ. އެމްބާޕޭ ކުޅެން ބޭނުންވާކަން ފާހަގަކޮށް ޑެޝޯމްޕްސް ބުނީ ޓީމުގައި ހިމެނޭ 24 ކުޅުންތެރިން ވެސް ކުޅެން ބޭނުންވާ ކަމަށެވެ. ނަމަވެސް އޭނާ ބުނީ އެ ހުރިހާ ކުޅުންތެރިންނަށް އެއް ފަހަރާ ކުޅެން ނޭރޭނެ ކަމުގައެވެ.

ޑެޝޯމްޕްސް ބުނީ ޓިއުނީޝިޔާއާ ދެކޮޅަށް ކުޅޭ މެޗު ވާނީ ވަަރަށް ޓަފް މެޗަކަށް ކަމަށެވެ. ޚާއްސަކޮށް އެ ޤައުމުގެ ގިނަ ސްޕޯޓަރުންތަކެއް މުބާރާތަށް ޤަތަރަށް އައިސްފައިވާކަން ޑެޝޯމްޕްސް ފާހަގަކުރިއެވެ. އެހެންކަމުން ދަނޑުގައި އޮންނާނީ ރަނގަޅު ފޯރިއެއް ކަމަށާއި، ފްރާންސް އިން ބޭނުންވަނީ އެ ކަހަލަ މެޗެއް ކުޅުމަށް ކަމަށް ޑެޝޯމްޕްސް ބުންޏެވެ.

މުބާރާތުގައި ފްރާންސް އަދި ޓިއުނީޝިޔާ ބައްދަލު ކުރާ މެޗު ފަށާނީ ބުދަ ދުވަހުގެ ރޭ ރާއްޖެ ގަޑިން 20:00 ގައެވެ.