ބްރަހޯލްޓާގެ ހުރިހާ ފޯކަސްއެއް މެޗަށް، ބޭނުންވަނީ އީރާން އަތުން މޮޅެއް

ފީފާ ވޯލްޑް ކަޕް ގްރޫޕް ސްޓޭޖުގެ ފަހު މެޗުގައި އީރާނާ ދެކޮޅަށް ނުކުންނައިރު ހުރިހާ ފޯކަސްއެއް ހުރީ މެޗަށް ކަމަށާއި، ބޭނުންވަނީ މޮޅުވާން ކަމަށް އެމެރިކާގެ ކޯޗު ގްރެގް ބްރަހޯލްޓާ ބުނެފިއެވެ.

މުބާރާތުގެ ގްރޫޕް ސްޓޭޖުގެ ފަހު މެޗަށް ކުރިމަތިލާއިރު އެމެރިކާ އޮތީ ކުޅުނު ދެ މެޗުން ވެސް އެއްވަރުވެ ގްރޫޕްގެ ތިން ވަނައިގައެވެ. ދެ ވަނައިގައި އީރާން އޮތީ ތިން ޕޮއިންޓު ހޯދައިގެންނެވެ. އެހެންކަމުން ފަހު މެޗުގައި އީރާން ބަލިކޮށްގެން އެމެރިކާ އަށް ދެ ވަނަ ބުރުގެ ޖާގައެއް ލިބޭނެއެވެ. އެހެންކަމުން ބްރަހޯލްޓާ ބުނީ ހުރިހާ ވިސްނުމަކާއި ކަންކަން އެއް ފަރާތްކޮށް ފުރިހަމަ ފޯކަސް މެޗަށް އޮތް ކަމަށެވެ.

އޭނާ ބުނީ އެމެރިކާ އަކީ ފަހަތް ބަލާނެ ޓީމެއް ނޫން ކަމަށެވެ. އެކަމުގައި އެއްވެސް ބޭނުމެެއް ނެތްކަން ފާހަގަ ކުރަމުން ބްރަހޯލްޓާ ބުނީ، ވޭލްސް އާއި އިންގްލެންޑާ ދެކޮޅަށް ދެއްކި ކުޅުމާމެދު ހިތްހަމަޖެހޭ ކަމަށެވެ. އެހެންކަމުން އެ ރޫހުގައި ނުކުމެ ކުރިއަށް އޮތް މެޗުގައި ރަނގަޅު ކުޅުމެއް ދައްކައި، ނަތީޖާ ނެރެން ޖެހޭ ކަމަށެވެ. އޭނާ ބުނީ އެމެރިކާ އޮތް ގްރޫޕުން އޭނާ އަށް ފެންނަނީ ހުރިހާ ޓީމެއް ވެސް މޮޅުވުމަށް ފޯކަަސް ކޮށްގެން އޮތް ތަން ކަމަަށެވެ.

މީގެ އިތުރުން ނޫސްވެރިޔަކު ކުރި ސުވާލަށް ޖަވާބު ދެމުން ބްރަހޯލްޓާ ބުނީ، 1998 ވަނަ އަހަރުގެ ވޯލްޑް ކަޕްގައި އެމެރިކާ އާއި އީރާން ބައްދަލު ކުރި މެޗު އޭނާގެ ހަނދާނުގައި ވަރަށް ރަނގަޅަށް ހަރުލާފައި ހުންނަ ކަމަށެވެ. އޭނާ ބުނީ އެމެޗުގެ ފުރަތަމަ ކަށިގަނޑާއެކު ވެސް ފެނުނީ އެއް ޓީމު މެޗުން މޮޅުވާން ބޭނުންވެފައި އޮތް މިންވަރު ކަމަށާއި، އަނެއް ޓީމުގެ ފަރާތުން އެކަން އެހާ ބޮޑަށް ނުފެންނަ ކަމަށެވެ. އޭނާ ބުނީ އެ މެޗުން އީރާން އޮތީ މޮޅުވާން ވަރަށް ބޮޑަށް ބޭނުންވެފައި ކަމަށާއި، އެ ޓީމުގެ ހުރިހާ ފޯކަސްއެއް މެޗަށް އޮތް މަންޒަރު ވެސް ފެނުނު ކަމަށެވެ. އޭނާ ބުނީ އެމެރިކާ އިން ބޭނުންވަނީ މާޒީން ފިލާވަޅު ލިބިގަނެ ކުރިއަށް މެޗުގައި އީރާން މައްޗަށް ކުރި ހޯދަން ކަމަށެވެ.

ޕްރެސްގައި ވާހަކަ ދައްކަމުން އެމެރިކާ ޓީމުގެ ކެޕްޓަން އަދި މިޑްފީލްޑަރު ޓައިލާ އެޑަމްސް ބުނީ 1998 ވަނަ އަހަރުގެ ވޯލްޑް ކަޕްގައި އެމެރިކާ އަދި އީރާން ބައްދަލު ކުރި އިރު އޭނާ އުފަން ވެސް ނުވާ ކަމަށާއި، އެ މެޗުގައި ކަންކަން ހިނގި ގޮތް ހަނދާން ނުހުންނާނެ ކަމަށެވެ. ނަމަވެސް އޭނާ ބުނީ ކުރިއަށް އޮތް މެޗުގައި ޓީމަށް ކާމިޔާބު ހޯދައި ދިނުމަށް އޭނާގެ އިތުރުން އެހެން ކުޅުންތެރިން ވެސް ތިބީ ތައްޔާރަށް ކަމަށެވެ.

އީރާނާއި އެމެރިކާ ބައްދަލު ކުރާ މެޗު ފަށާނީ އަންގާރަ ދުވަހުގެ ރޭ ރާއްޖެ ގަޑިން 12 ޖަހާއިރުއެވެ.