ވޯލްޑްކަޕަށްޓަކާ 7000 އެތައް ކިލޯމީޓަރެއް ދެފުރޮޅު މަތީ!
ސަޢުދީ އަރަބިއްޔާ ހުރަސް ކުރަން ނެގީ 4 ހަފުތާ
ސަޢުދީ ޢަރަބިއްޔާގެ ހަނަފަސް، އެކަނިވެރި ސަހަރާތަކުގެ ތެރެއިން، ކާރޫބާރޫ ބޮޑު ސްޓޭޑިއަމްތަކާ ހިސާބަށް ދަތުރުކުރުމަކީ ފަސޭހަ ކަމެއް ނޫން
ކޮންމެ 4 އަހަރަކުން އެއްއަހަރު، ދުނިޔޭގެ ތައްޓަށް ކުޅޭ ފީފާ ވޯލްޑްކަޕް ފުޓުބޯޅަ މުބާރާތް ހަމަ ލޮލުން ބަލާލުމުގެ ފޮނި ހުވަފެންތައް ދެކޭ މީހުން މަދެއް ނޫނެވެ. ވަރުގަދަ ޢަޒުމެއް ހިތުގައި ކަނޑައަޅާ، އެ ޢަޒުމަށް ވާސިލުވުމަށް، އޭގެ ތެރެއިން ބައެއް މީހުން، ދުރާލާ މަސައްކަތް ފަށައެވެ. މިފަދަ ލިސްޓެއްގައި އެ ބައެއްގެ ނަން، ކޮންމެހެންވެސް ފާހަގަ ކުރަން ޖެހޭ 2 މީހުންނަކީ ފަރަންސޭސިވިލާތުގެ މަހްދީ ބަލަމިއްސާއާއި ގެބްރިއޭލް މާޓިންއެވެ.
2022 ފީފާ ވޯލްޑްކަޕް ފުޓުބޯޅަ މުބާރާތަށް ހާއްސަކޮށް، ބަލަމިއްސާއާއި މާޓިން، ޤަތަރަށް ދަތުރު ފެށީ މީގެ 3 މަހެއްހާ ދުވަސް ކުރިންނެވެ. 7000 އެތައް ކިލޯމީޓަރެއްގެ އެ ދިގު ދަތުރުގެ ސަވާރީއަކީ 2 ފުރޮޅުލީ ބައިސްކަލެވެ.
ދަތުރަކީ މާ ފަސޭހަ ދަތުރެއް ނޫނެވެ.
ނޮވެމްބަރު 26 ވަނަ ދުވަހު ޑެންމާކާ ދެކޮޅަށް ފަރަންސޭސިން ނުކުތް މެޗު ބަލާލުމަށް ސްޓޭޑިއަމް 974 ކައިރިއަށް ގޮސް ހުރެ ވާހަކަ ދައްކަމުން، ބަލަމިއްސާ ވަނީ އޭނާގެ ހިތުގައި އުފެދެމުން ދިޔަ ޝުޢޫރުތައް ހިއްސާ ކުރެވޭތޯ މަސައްކަތް ކޮށްފައެވެ.
މާޓިން ބުނި ގޮތުގައި، މެދުއިރުމަތީގެ މަންޒިލްތަކުގެ ތެރެއިން އޭނާ ކުރި ދަތުރުގައި ލިބުނު މެހެމާންދާރީގެ އަސަރުތައް ކިތަންމެހާވެސް ފޮންޏެވެ. ސަޢުދީ ޢަރަބިއްޔާގެ ހަނަފަސް، އެކަނިވެރި ސަހަރާތަކުގެ ތެރެއިން، ކާރޫބާރޫ ބޮޑު ސްޓޭޑިއަމްތަކާ ހިސާބަށް ކުރި ދަތުރަކީ ކިތަންމެ ދަތި ދަތުރަކަށް ވީ ނަމަވެސް، މި އާދަޔާ ޚިލާފު ވަގުތުކޮޅުގެ ފުރިހަމަ އުފާ ހާސިލުވަމުން ދާ ކަން އޭނާ ފާހަގަ ކުރެއެވެ.
އަދި އެ ވަރުން ނިމުނީއެއް ނޫނެވެ. ނަޞީބުވެސް އަތުގައި ހިފީއެވެ. ބަލަމިއްސާއާއި މާޓިން އަށް ވަނީ، ފަރަންސޭސި ޓީމު ޤަތަރަށް އައި ދުވަހު، އެ ޓީމުގެ މެންބަރުންނާ ބައްދަލުވެސްވެފައެވެ.
ބަލަމިއްސާއާއި މާޓިންގެ އިތުރުންވެސް، ދުނިޔޭގެ އެކި ކަންކޮޅުތަކުން އެތައް ބަޔަކު، އާދަޔާ ޚިލާފު އެތައް މަސައްކަތެއް ކޮށްގެން މިވަގުތު ޤަތަރުގައި ތިބޭނެކަން ޔަޤީނެވެ.
