ބަޖެޓަށް ވޯޓަށް ނާހާ ވާނެ ގާނޫނީ ހަމައެއް ކިރިޔާވެސް އޮތް ނަމަ ވޯޓަށް ނާހާނަން: ރައީސް ނަޝީދު
28 ނޮވެމްބަރު 2022 | ހޯމަ 09:302023 ވަނަ އަހަރަށް 42.8 ބިލިއަން ރުފިޔާގެ ބަޖެޓެއް ރައްޔިތުންގެ މަޖިލީހުން ވަނީ ފާސްކޮށްފައި
ރައްޔިތުންގެ މަޖިލީހުގެ ޖަލްސާގެ ތެރެއިން
ބަޖެޓަށް ވޯޓަށް ނުއައްސަވާ ވާނެ ގާނޫނީ ހަމައެއް އޮތް ނަމަ ވޯޓަށް ނުއައްސަވާނެ ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ހޯމަ ދުވަހުގެ ޖަލްސާގައި ބަޖެޓް ދިރާސާކޮށް ނިންމި ގޮތުގެ ރިޕޯޓަށް އިސްލާހެއް ހުށަހަޅުއްވަމުން މަޖިލީހުގެ ނައިފަރު ދާއިރާގެ މެންބަރު އަހުމަދު ޝިޔާމް ވަނީ އަންނަ އަހަރަށް ލަފާކުރާ ބަޖެޓް މަޖިލީހުން ފާސް ކުރުމަކީ ބިރުވެރިކަމެއް ކަމަށް ވިދާޅުވެފައެވެ. ސަބަބަކީ ސަރުކާރަށް ތާއީދުކުރާ މެންބަރުން ވެސް ތާއީދުނުކުރުން ކަމަށާއި ބަޖެޓާ މެދު އެ މެންބަރުންގެ ބޮޑު ކަންބޮޑުވުންތަކެއް ހުރި ކަމަށް ޝިޔާމް ވިދާޅުވިއެވެ. އެއަށް ފަހު މަޖިލީހުގައި އަންނަ އަހަރުގެ ބަޖެޓް ވޯޓަށް އަހަމުން ދިޔަ ވަގުތު ވެސް ޝިޔާމް ވަނީ އެ ފަދަ މޭރުމަކުން ވާހަކަދައްކަވާފައެވެ.
ޝިޔާމްގެ އެ ވާހަކަތަކާއި ގުޅިގެން ރައީސް ނަޝީދު ވަނީ ވޯޓަށް ނުއައްސަވާ ވާނެ ގޮތެއް އޮތް ނަމަ އެކަން ނުކުރައްވާނެ ކަމަށް ވިދާޅުވެފައެވެ.
ރައީސް ނަޝީދު އެފަދައިން ވިދާޅުވީ މި އަހަރުގެ ބަޖެޓް ހަރަދުކޮށް ހުސްކޮށްފައިވާ ކަމަށް ބުނެ ދެކެވެމުންދާ ވާހަކަތަކާއި ގުޅިގެންނެވެ. އެހެންނަމަވެސް ފިނޭންސް މިނިސްޓްރީ އިން އެކަން ދޮގުކުރެއެވެ. 2023 ވަނަ އަހަރަށް 42.8 ބިލިއަން ރުފިޔާގެ ބަޖެޓެއް ރައްޔިތުންގެ މަޖިލީހުން ވަނީ ފާސްކޮށްފައެވެ. ހޯމަ ދުވަހުގެ މަޖިލީހުގެ ޖަލްސާގައި ބަޖެޓު ފާސްކުރަން ފެންނަ ކަމަށް 61 މެންބަރުން ވޯޓު ދެއްވިއިރު, ބަޖެޓު ފާސްކުރުމާއި ދެކޮޅަށް 8 މެންބަރުން ވޯޓު ދެއްވިއެވެ.
