ޑިބްރޭނާގެ ވިސްނުން ހުރީ ހުރިހާ ގޮތަކުންވެސް ޓީމަށް އެހީވުމަށް

ވިސްނުން ހުރީ ހުރިހާ ގޮތަކުންވެސް ބެލްޖިއަމް ޓީމަށް އެހީވުމަށްކަމަށް، އެ ޓީމުގެ މިޑްފީލްޑަރު ކެވިން ޑިބްރޭނާ ބުނެފިއެވެ.

ޑިބްރޭނާ މިހެން ބުނީ، މިހާރު ގަތަރުގައި ކުރިއަށްދާ ފީފާ ވޯލްޑް ކަޕްގައި މޮރޮކޯއާ ދެކޮޅަށް ނުކުންނަ މެޗުގެ ކުރިން ވާހަކަ ދައްކަމުންނެވެ. ޑިބްރޭނާ ވަނީ މުބާރާތުގެ ފުރަތަމަ މެޗުގައި ކެނެޑާއާ ދެކޮޅަށް ކުޅުނު މެޗުގެ މޮޅު ކުޅުންތެރިޔާގެ މަގާމުވެސް ހޯދާފައެވެ. އޭނާއަކީ ބެލްޖިއަމް ޓީމުގެ މެދުތެރެއިން އެންމެ މުހިންމު ދައުރެއް އަދާކުރާ ކުޅުންތެރިޔާއެވެ. މެޗުގެ ކުރިން ވާހަކަ ދައްކަމުން ޑިބްރޭނާ ބުނީ، ބޭނުމަކީ ޓީމަށް އެހީވެ، އޭނާއަށް ވީ އެންމެ ރަނގަޅަކަށް ޓީމުގެ ކަންކަން ބެލެހެއްޓުން ކަމަށެވެ. އަދި އޭނާ އަބަދުވެސް ފުޓުބޯޅަ ކުޅެން ބޭނުންވާ ކަމަށާއި، ހުރިހާ ކަމެެއްވެސް ރަނގަޅަށް އޮންނަން އެދޭކަމަށެވެ.

މީގެ އިތުރުން، ކުޅެން ޖެހޭނީ ޓީމުގެ ކުޅުންތެރިންނާ ގުޅިގެން ކަމަށާއި، ކުޅުންތެރިންނަށް އެހީވާންވެސް ޖެހޭ ކަމަށެވެ. އަބަދުވެސް އޭނާ މަސައްކަތް ކުރަނީ އެ މަގުން ކަންތައް ކުރެވޭތޯކަމަށެވެ. އޭނާ ބުނީ ފާއިތުވި އަހަރުތަކުގައިވެސް އޭނާއަށް މޮޅަށް ކުޅެވުނުކަން އިހްސާސްވާ ކަމަށާއި، ޓީމާއެކު ކުރިއަށްދާން އަދިވެސް މޮޅު ކުޅުން ދެއްކޭނެ ކަމަށެވެ.

ޑިބްރޭނާ ވަނީ ބެލްޖިއަމަށް ކުޅެމުން އަންނަ ރޮމެލޫ ލުކާކޫގެ ވާހަކަވެސް ދައްކާފައެވެ. އޭނާ ބުނީ އަނިޔާއިން ރަނގަޅުވެ، ލުކާކޫ ފަރިތަކުރުންތަކުގައި ބައިވެރިވުމަކީވެސް ރަނގަޅު ކަމެއް ކަމަށެވެ.

ޑިބްރޭނާ ބުނީ ޓީމުގެ ކުޅުންތެރިން ތިބީ ކުރިއަށް އޮތް މެޗަށް ވެސް ފުރިހަމައަށް ތައްޔާރަކަށް ކަމަށާއި، މެޗު ކާމިޔާބުކުރުމަކީ އަޒުމު ކަމަށެވެ. އޭނާ ބުނީ އުއްމީދަކީ މިފަހަރުގެ ވޯލްޑް ކަޕަކީ ހުރިހާ ގޮތަކުން ވެސް ބެލްޖިއަމަށް ކާމިޔާބު މުބާރާތަކަށްވުން ކަމަށެވެ.

ގްރޫޕް އެފްގައި ބެލްޖިއަމް ދެން ކުޅޭނީ މޮރޮކޯއާ ދެކޮޅަށެވެ.