ޑެންމާކާ ދެކޮޅަށް ފްރާންސްއިން ނުކުންނާނީ ބަދަލުހިފުމުގެ ރޫހުގައި

ފީފާ ވޯލްޑް ކަޕް ގްރޫޕް ސްޓޭޖުގެ ދެވަނަ މެޗުގައި ޑެންމާކާ ދެކޮޅަށް ނުކުންނާނީ، އެޓީމާ ދެކޮޅަށް އެންމެ ފަހުން ކުޅުނު ދެ މެޗުގެ ނަތީޖާ ބަދަލުކުރުމަށް ކަމަށް، ފްރާންސްގެ ކޯޗު ޑިޑިއޭ ޑެޝޯމްޕްސް ބުނެފިއެވެ.

ގްރޫޕް ޑީގައި ޑެންމާކާ ދެކޮޅަށް ނުކުންނައިރު، މިއަހަރުގެ ޖޫން މަހާއި ސެޕްޓެމްބަރު މަހު މި ދެ ޓީމު ވަނީ ޔުއެފާ ނޭޝަންސް ލީގުގައި ވާދަކޮށްފައެވެ. އެފަހަރުގެ ދެ މެޗުވެސް ކާމިޔާބުކޮށް، ޑެންމާކުން ވަނީ ފްރާންސް ހިތްދަތިކޮށްލާފައެވެ. ފުރަތަމަ މެޗުގައި ޖޫން ތިންވަނަ ދުވަހު ޑެންމާކުން ފްރާންސް ބަލިކުރީ 2-1ންނެވެ. އަދި ދެވަނަ މެޗުގައި ސެޕްޓެމްބަރު މަހުގެ 25 ވަނަ ދުވަހު ފްރާންސް ބަލިކުރީ 2-0ންނެވެ.

ވޯލްޑް ކަޕްގައި ޑެންމާކާ ދެކޮޅަށް ނުކުތުމުގެ ކުރިން ޑެޝޯމްޕްސް ބުނީ އެއީ ފްރާންސް ޓީމުން ވަަރަށް ބޮޑަށް ސަމާލުކަން ދޭނެ ކަމެއް ކަމަށެވެ. އޭނާ ބުނީ ދައްކަން އުޅެނީ މާ ކުރީގެ ވާހަކަތަކެއް ނޫން ކަމަށާއި، މިއަހަރުގެ މެދުތެރޭގައި ހިނގިކަމެއްގެ ވާހަކަ ކަމަށެވެ. ޖެހިޖެހިގެން ދެ މެޗުން ފްރާންސް ބަލިކޮށް ޑެންމާކުން ވަނީ ބޮޑު ހިތްދަތިކަމެއް ދީފައި ކަމަށެވެ. އޭނާ ބުނީ އެއީ ވަރަށް އުނަދަގޫ ހާލަތެއް ކަމަށާއި، ތިންވަނަ ފަހަރަށް އެކަން ވިޔަ ނުދިނުމަށް ވަރަށް މަސައްކަތް ކުރާނެ ކަމަށެވެ. ޑެންމާކު ޓީމަށް ފްރާންސް ޓީމު ވަރަށް ރަނގަޅަށް އެނގޭނެ ކަމަށާއި، ފްރާންސަށް ޑެންމާކުވެސް އެނގޭ ކަމަށެވެ. މެޗުގައި ޑެންމާކުން ގޭމް ޕްލޭން ބަދަލުކޮށް، ފްރާންސަށް މާ އުނދަގޫވެސް ކޮށްފާނެ ކަމަށެވެ.

ޑެޝޯމްޕްސްގެ އިތުރުން އެ ޕްރެސްގައި ވާހަކަ ދައްކަމުން ފްރާންސްގެ ކެޕްޓަން އަދި ގޯލްކީޕަރު، ހޫގޯ ލޮރިސް ބުނީ ޑެންމާކާ ކުރިމަތިލަނީ މުޅިން އެހެން މުބާރާތެއްގައި ކަމަށެވެ. ނަމަވެސް ޑެންމާކު ޓީމުގެ ފެންވަރު އެނގޭކަމަށާއި، ކުރީ ދެ މެޗުގައި ދިނީ ރަނގަޅަށް ހޭލައިގެން ތިބެންޖެހޭ ކަމުގެ "ކޯލެއް" ކަމަށެވެ. މެޗުގެ މުހިންމުކަން ވަރަށް ރަނގަޅަށް އެނގޭ ކަމަށާއި، ދެވަނަ ބުރަށް ކޮލިފައިވާން އެއީ ވަރަށް މުހިންމު މެޗެއްކަމަށެވެ.

ލޮރިސް ބުނީ ޑެންމާކާއި ޓިއުނީޝިޔާ ކުޅުނު މެޗު ބަަލައިފިނަމަ، ފްރާންސްއިން ވަރަށް ރަނގަޅަށް މަސައްކަތް ކުރަން ޖެހޭކަން އެނގޭނެ ކަމަށެވެ. އޭނާ ބުނީ ކޮންމެ ޓީމަކީވެސް ވަރުގަދަ ޓީމެއް ކަމަށާއި، މެޗުތައް ވާނީ ބޮޑު ޗެލެންޖަކަށް ކަމަށެވެ. ލޮރިސް ފާހަގަކުރިގޮތުގައި ފްރާންސް ޓީމު އޮތީ މެޗަށް 100 އިންސައްތަ ތައްޔާރަށެވެ.

ފްރާންސާއި ޑެންމާކު ވާދަކުރާ މެޗު ފަށާނީ ހޮނިހިރު ދުވަހުގެ ރޭ ރާއްޖެ ގަޑިން 21:00ގައެވެ.