ކޮވިޑް ފުރަތަމަ ފެށުނުއިރެކޭ އެއްވަރަށް ޗައިނާގައި ކޮވިޑް ފެތުރެނީ
25 ނޮވެމްބަރު 2022 | ހުކުރު 12:03ބުދަ ދުވަހު އެކަނިވެސް 31،527 ޕޮޒިޓިވް ކޭސް ރިޕޯޓުކޮށްފައިވޭ
ޑަބްލިއުއެޗްއޯ ޓީމުން ޗައިނާގައި ކުރިޔަށްގެންދިޔަ ދިރާސާގެ ތެރެއިން
ހަރުކަށި ފިޔަވަޅުތައް އަޅާފައި ހުރުމާ އެކު ވެސް ކޮވިޑް ފުރަތަމަ ފެށުނުއިރެކޭ އެއްވަރަށް ޗައިނާގައި އަނެއްކާވެސް ކޮވިޑް ފެތުރެމުން ދާކަމަށް ޚަބަރު ލިބިއްޖެއެވެ. މި ގޮތުން ވެރިރަށް ބެއިޖިންގުގެ އިތުރުން ވިޔަފާރީގެ މައި މަރުކަޒެއް ކަމަށްވާ ގުއަންގޒޫގައި ވަރަށް ބާރަށް ބަލި ފެތުރެމުންދާކަމަށް މީޑިއާ ރިޕޯޓުތައް ބުނެއެވެ. އަދަދުތަކަށް ބަލާއިރު ބުދަ ދުވަހު އެކަނިވެސް 31،527 ޕޮޒިޓިވް ކޭސް ރިޕޯޓުކޮށްފައިވެއެވެ. 2021 ވަނަ އަހަރަށް ފަހު އެންމެ ގިނަ އަދަދަކަށް އެއްދުވަހު މީހުން ޕޮޒިޓިވްވެފައިވަނީ މިދިޔަ އެޕްރިލް މަހުއެވެ. އޭރު ދުވާލަކު 28،000 މީހުން ޕޮޒިޓިވްވެފައިވެއެވެ. އެހެންކަމުން އެއިރަށް ވުރެ ވެސް މިވަނީ ޕޮޒިޓިވްވާ މީހުންގެ އަދަދު އިތުރުވެފައެވެ.
މި އަދަދުތަކަކީ 1.4 ބިލިއަން މީހުންގެ އާބާދީއެއް އޮންނަ ގައުމަކަށް މާބޮޑު އަދަދަކަށް ނުވި ނަމަވެސް ކުރީގެ ރިކޯޑުތަކާ އަޅާބަލާއިރު ވަރަށް ބޮޑު އިތުރުވުމެކެވެ. ޗައިނާއިން ކޮވިޑްގައި މަރުވެފައިވަނީ 5200 އެއްހާ މީހުންނެވެ. މިއީ ކޮންމެ މިލިއަން މީހަކަށް ތިންމަރެވެ.
އެހެން ގައުމުތަކުން ޕޮޒިޓިވްވި އަދި މަރުވި މީހުންގެ އަދަދުތަކަށް ބަލާއިރު އެމެރިކާގައި ކޮންމެ މިލިއަން މީހަކަށް 3000 މީހުން މަރުވެފައިވާއިރު އިނގިރޭސި ވިލާތުގައި ކޮންމެ މިލިއަން މީހަކަށް 2،400 މީހުން މަރުވެފައިވެއެވެ.
ކޮވިޑް ކޮންޓްރޯލު ކުރުމަށް ޗައިނާއިން ގެންގުޅޭ ޒީރޯ ކޮވިޑް ޕޮލިސީގެ ސަބަބުން މީހުން މަރުވާ އަދަދު މަދުކުރެވިފައިވީ ނަމަވެސް އެކަމުގެ ސަބަބުން ގައުމުގެ އިގްތިސާދަށް ވަނީ ވަރަށް ބޮޑަށް ނޭދެވޭ އަސަރުކޮށްފައެވެ. އެހެންކަމުން ބައެއް ބޮޑެތި ކުންފުނިތަކާއި ފެކްޓަރީތަކުގެ މުވައްޒަފުން ގެންދަނީ ސަރުކާރާ ދެކޮޅަށް މުޒާހަރާ ކުރަމުންނެވެ.
ޗައިނާގައި އެތައް މަހަކަށް ފަހު ކޮވިޑް ޖެހިގެން މީހުން މަރުވާން ފަށާފައިވުމާ އެކު ކުރިން ލުއި ދެވުނު ހިސާބުތަކުގަ ވެސް ވަނީ އަލުން ފިޔަވަޅުތައް ހަރުކަށިކޮށްފައެވެ. މިގޮތުން 6 މިލިއަން މީހުންގެ އާބާދީއެއް އޮންނަ ޒެންގޒޫ ވެސް ވަނީ ހުކުރު ދުވަހުން ފެށިގެން ލޮކްޑައުންކޮށްފައެވެ.
