ފީފާ ވޯލްޑް ކަޕްގައި ވާދަކުރާ ސްޕެއިންގެ ޒުވާން ޓީމާމެދު އުންމީދު ބޮޑު ކަމަށް އެ ޓީމުގެ ކޯޗު ލުއިސް އެންރީކޭ ބުނެފިއެވެ.

އެންރީކޭ މިހެން ބުނީ މުބާރާތުގެ ގްރޫޕް އީ ގައި ބުދަ ދުވަހުގެ ރޭ ކޮސްޓަރިކާއާ ދެކޮޅަށް ނިކުންނަ މެޗުގެ ކުރިން އޮތް ޕްރެސް ކޮންފަރެންސްގައެވެ. އޭނާ ބުނީ ސްޕެއިންގައި އޮތް ޒުވާން ސްކޮޑާމެދު އޭނާ ވަރަށް އުންމީދު ކުރާ ކަމަށެވެ. އެންރީކޭ ބުނީ އަބަދުވެސް ކުޅުންތެރިންނާމެދު ވިސްނަންވާނީ ޕޮސިޓިވްކޮށް ކަމަށެވެ. ސަބަބަކީ ޒުވާން ކުޅުންތެރިންގެ ފަރާތުން ޓީމަށް އިތުރު ހިތްވަރެއް ލިބޭތީ ކަމަށް އޭނާ ބުންޏެވެ. އިތުރަށް އެންރީކޭ ބުނީ ޒުވާން ކުޅުންތެރިންގެ އިތުރުން ތަޖުރިބާ ހުރި ކުޅުންތެރިންނާއެކު ނަތީޖާ ހާސިލް ކުރެވޭނެ ކަމަށެވެ. އޭނާ ބުނީ ކުޅުންތެރިންނާއި މުޅި ޓީމުގެ ސްޓާފުން ތިބީ އެ އަޒުމުގައި ކަމަށެވ.

މި ޕްރެސްގައި ވާހަކަ ދައްކަމުން ސްޕެއިންގެ ކެޕްޓަން ސާޖިއޯ ބުސްކެޓްސް ބުނީ ވޯލްޑް ކަޕަކީ ވަރަށް ބޮޑު، ވާދަވެރި މުބާރާތެއް ކަމަށެވެ. އޭނާ ބުނީ ކޮންމެ ހަތަރު އަހަރުން އެއް ފަހަރު ބާއްވާ އެ މުބާރާތަކީ ދުނިޔޭގެ އެންމެ ޝަރަފުވެރި މުބާރާތް ކަމަށެވެ. ބުސްކެޓްސް ބުނީ އަލަށް މުބާރާތަށް ކުރިމަތިލާ ޒުވާން ކުޅުންތެރިންނަށް ބައެއް ފަހަރު ހާސްކަމާ ކުރިމަތިލާން ޖެހޭ ކަމަށެވެ. ނަމަވެސް ސްޕެއިންގެ ކުޅުމުގެ ސްޓައިލާއި، ކޯޗާއެކު ކުރާ މަސައްކަތުން ކުރިއަށްދެވޭނެ ވާހަކަ އޭނާ ކުޅުންތެރިން ގާތު ވެސް ބުނާ ކަމަށެވެ.

މުބާރާތުގައި ސްޕެއިން އިން ކޮސްޓަރިކާއާ ދެކޮޅަށް ނިކުންނާނީ ބުދަ ދުވަހުގެ ރޭ ރާއްޖެ ގަޑިން 21:00 ގައެވެ.