މިހާރު ދުވާލަކަށް އިތުރު 200 ޓަނުގެ މަސް ގަނެވޭނެ: މިނިސްޓަރ
ޖަޒީރާ ކަލެޓް ވެސަލް ގެނައުމުގެ ސަބަބުން މިހާރު އިތުރަށް މަސް ގަތުމުގެ އިންތިޒާމު ހަމަޖެހިފައިވޭ
ފިޝަރީޒް މިނިސްޓަރ ޑރ. ޙުސައިން ރަޝީދު ޙަސަން
މިހާރު ދުވާލަކަށް އިތުރު 200 ޓަނުގެ މަސް ގަނެވޭނެ އިންތިޒާމު ހަމަޖެހިފައިވާކަމަށް ފިޝަރީޒް މިނިސްޓަރ ޑރ. ޙުސައިން ރަޝީދު ޙަސަން ވިދާޅުވެއްޖެއެވެ.
ފާއިތުވި ހަތަރު އަހަރު ފިޝަރީޒް މިނިސްޓްރީން ހޯދާފައިވާ ކާމިޔާބީތަކާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން މިނިސްޓަރ ވިދާޅުވީ ޖަޒީރާ ކަލެޓް ވެސަލް ގެނައުމުގެ ސަބަބުން މިހާރު އިތުރަށް މަސް ގަތުމުގެ އިންތިޒާމު ހަމަޖެހިފައިވާކަމަށެވެ. މީގެއިތުރުން ކޫއްޑޫގައިވެސް ކެޕޭސިޓީ އިތުރުކުރުމުގެ މަސައްކަތް ކުރަމުންދާކަމަށް މިނިސްޓަރ ވިދާޅުވިއެވެ.
މީގެއިތުރުން މިނިސްޓަރ ވިދާޅުވީ މިސަރުކާރުން 290 ޓަނުގެ އައިސް އުފެއްދޭވަރުގެ އައިސް ޕްލާންޓް ރާއްޖޭގެ އެތަން މިތަނުގައި އަޅާފައިވާކަމަށެވެ. އެހެންކަމުން އައިސް ލިބުމުގެ މައްސަލައަށްވެސް ކުރިއާ އަޅާބަލާއިރު ހައްލުތަކެއް ގެނެސްދީފައިވާކަމަށް މިނިސްޓަރ ވިދާޅުވިއެވެ.
މީގެއިތުރުން ރާއްޖޭގެ 200 ދޯނީގައި ލޮނުފެން ފިނިކޮށްގެން މަސް ފިނިކުރާނެ ނިޒާމު ގާއިމުކުރުމަށް މިހާރު އިއުލާންކޮށްފައިވާކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މަހުގެ އަގު މައްޗަށް ގެންދިޔުމުގައި މަހުގެ ކޮލިޓީ ރަނގަޅުކުރުމަކީ މުހިންމު ކަމަކަށްވާއިރު އެކަމުގެ އިންތިޒާމު ދޯނި ފަހަރުގައި ހަމަޖެއްސުމުގެ މަސައްކަތް މިސަރުކާރުން ކުރަމުންދާކަމަށެވެ.
