އެންމެ ގިނަ ދުވަހު ވެރިކަން ކުރެއްވި ރައީސް އަދިވެސް ކުރިޔަށް

ދުނިޔޭގައި މިހާތަނަށް އެންމެ ގިނަ ދުވަހު ރައީސްކަން ކުރެއްވުމުގެ ރިކޯޑް ގާއިމް ކުރައްވާފައިވާ، އީކުއެޓޯރިއަލް ގިނީގެ ރައީސް ޓިއޮޑޯރޯ އޮބިއާންގ އިތުރު ދައުރަކަށް ކުރިމަތިލައްވައިފިއެވެ. 20 ނޮވެމްބަރު ވީ އާދީއްތަ ދުވަހު އެ ގައުމުގެ އާންމު އިންތިޚާބު ބާއްވާފައިވާއިރު ގިނަ ބަޔަކު ގަބޫލު ކުރާ ގޮތުގައި މިފަހަރު ވެސް އިންތިޚާބު ކާމިޔާބު ކުރައްވާނީ ރައީސް އޮބިއާންގ އެވެ.

އާދީއްތަ ދުވަހުގެ އިންތިޚާބުގައި ވޯޓުލުމަށް ތިން ލައްކަ މީހުން ރަޖިސްޓްރީކޮށްފައިވެއެވެ.

ސެންޓްރަލް އެފްރިކާގެ ގައުމެއް ކަމަށްވާ އީކުއެޓޯރިއަލް ގިނީގެ ރައީސްކަން، ރައީސް ޓިއޮޑޯރޯ އޮބިއާންގ މިހާރު ވެސް 43 އަހަރު ކުރައްވާފައިވެއެވެ. ނަމަވެސް މިހާރު އުމުރުފުޅުން 80 އަހަރުގެ އޮބިއާންގގެ ވެރިކަމުގައި އިންސާނީ ހައްގުތަކަށް ހުރުމަތްތެރިކޮށް ނުހިތޭ ކަން މިއީ އާންމު އަޑެކެވެ. ސަރުކާރާ އިދިކޮޅު ފަރާތްތަކަށް އަނިޔާކުރުމާއި ގެއްލުވާލުމުގެ ރިޕޯޓުތައް އާންމުކޮން ލިބެމުންދެއެވެ. އަދި ވެރިކަން ކުރައްވަނީ ޚުދްމުޚްތާރު ގޮތަކަށް ކަމަށް ޚަބަރުތައް ބުނެއެވެ.

އާދީއްތަ ދުވަހުގެ އިންތިޚާބުގައި ވެސް ބައެއް އިދިކޮޅު ފަރާތްތަކުން ވާދަ ކުރިނަމަވެސް އެފަރާތްތަކަށް ކާމިޔާބުވުމުގެ ފުރުސަތެއް ނޯންނާނެ ކަމަށް އެނަލިސްޓުންނާއި ހަވާލާދީ ލިބޭ ޚަބަރުތައް ބުނެއެވެ.

ރައީސް އޮބިއާންގ ވެރިކަމަށް ވަޑައިގެންނެވީ 1979 ވަނަ އަހަރު ގެނެވުނު މިލިޓަރީ އިންގިލާބަކުންނެވެ. އެއަށްފަހު ވެސް އެ ގައުމުގައި އެފަދަ އިންގިލާބުތައް ގެންނަން މަސައްކަތް ކުރެވުނު ނަމަވެސް ރައީސް އޮބިއާންގގެ ވެރިކަން ވައްޓާލެވިފައެއް ނުވެއެވެ.

ސްޕެނިޝް ގިނީގެ ގޮތުގައި ކުރިން އޮތް އިކުއެޓޯރިއަލް ގިނީއަށް މިނިވަންކަން ލިބިފައިވަނީ 1968 ގައެވެ. ރައީސް އޮބިއާންގގެ ކުރިން ރައީސްކަން ކުރައްވާފައިވަނީ އެންމެ ބޭފުޅެކެވެ. އެއީ އޮބިއާންގގެ ބޮޑުބޭބޭފުޅެވެ. ދެ ރައީސުންނަކީ ވެސް އިންސާނީ ހައްގުތަކަށް އިޙުތިރާމު ނުކުރައްވާ، އަނިޔާވެރިކަމުގެ ގޮތުން މުޅި އެފްރިކާގައި ވެސް އެފަދައެއްނުވާ ފަދަ ދެ ބޭފުޅުންކަމަށް ވަނީ ލޭބަލްވެފައެވެ.

އީކުއެޓޯރިއަލް ގިނީގައި ގިނައަދަދަކަށް ތެލުގެ ރިޒަރވް ހުރިކަން 1996 ގައި ހާމަވެފައި ވީ ނަމަވެސް 1.4 މިލިއަން މީހުންގެ އާބާދީ އަށް އެކަމުން މާބޮޑު ފައިދާއެއް ނުކުރެއެވެ. އެގައުމުގައި ފަގީރުކަން އަދިވެސް ވަރަށް ބޮޑަށް އާންމުވެފައި އޮތްއިރު، ސަރުކާރުން ފަގީރުކަން ބޭނުން ކުރަނީ ސިޔާސީ ހަތިޔާރެއްގެ ގޮތުގައި ކަމަށް އެނަލިސްޓުން ބުނެއެވެ.