ޓައިލަރ އާމެދު އެމެރިކާގެ ކޯޗު ބްރަހޯލްޓާ އަށް އިތުބާރު ބޮޑު

ފީފާ ވޯލްޑް ކަޕް ގްރޫޕް ބީ ގައި ވޭލްސްއާ ދެކޮޅަށް ނިކުންނައިރު އެމެރިކާ ޓީމުގެ ކެޕްޓަން ޓައިލަރ އާދަމްއަށް ވަރަށް ބޮޑު އިތުބާރެއް އޮތް ކަމަށް އެ ޓީމުގެ ކޯޗު ގްރެގް ބްރަހޯލްޓާ ބުނެފިއެވެ.

ވޭލްސް މެޗުގެ ކުރިން އޮތް ނޫސްވެރިންގެ ބައްދަލުވުމުގައި ބްރަހޯލްޓާ ވަނީ އެމެރިކާގެ ކެޕްޓަން ބޭންޑު އަޅާނީ ޓައިލަރ ކަމަށް އިއުލާންކޮށްފައެވެ. އެއަށްފަހު ވާހަކަ ދައްކަނުން ބްރަހޯލްޓާ ބުނީ ޓައިލަރ ގެ ލީޑާޝިޕަކީ ނަމޫނާއެއް ކަމަށެވެ. އަދި އަމަލާއި ބަހުން އޭނާ ސާބިތުކޮށްދެނީ ޓީމު ގޮވައިގެން ލީޑު ކުރެވޭނެކަމެވެ. އެހެންކަމުން ކެޕްޓަނެއްގެ ގޮތުގައި އޭނާ ހުރުމަކީ ލިބޭނެ ވަރަށް ބޮޑު ފަޚުރެއް ކަމަށް ވެސް ބްރަހޯލްޓާ ބުނެފިއެވެ.

މީގެ އިތުރުން ބްރަހޯލްޓާ ބުނީ އަހަރު ފެށިގެން ވެސް ޓައިލަރ ދައްކަމުން އައީ އޭނާ ވަރަށް ގަޔާވާ ސިފަތަކެއް ކަމަށެވެ. ބްރަހޯލްޓާ ބުނީ ޓައިލަރ އަކީ ބުންވަރު ހުރި، ބޯޅައާއެކު މޮޅަށް ކުޅޭ ކުޅުންތެރިޔެއް ކަމަށެވެ. މީގެ އިތުރުން މީހުންނާ ގުޅޭ، އެކުވެރިި ކުޅުންތެރިޔެއް ކަމަށް ބްރަހޯލްޓާ ބުންޏެވެ. އިތުރަށް ބްރަހޯލްޓާ ބުނީ އެމެރިކާ ޓީމުގެ އެހެން ކުޅުންތެރިން ވެސް އެމީހުންގެ ލީޑަރަކަށް ބޭނުންވަނީ ޓައިލަރ ކަމަށެވެ.

އެ ޕްރެސްގައި ވާހަކަ ދައްކަމުން އެމެރިކާގެ ކެޕްޓަން ޓައިލަރ ބުނީ، ކެޕްޓަނެއްގެ ގޮތުގައި ޒިންމާ ނަގައިގެން ކުޅުމަކީ އޭނާ އަށް ލިބޭނެ ޝަރަފެއް ކަމަށެވެ. ޓައިލަރ ބުނީ އެމެރިކާގެ ޒުވާން ސްކޮޑުގައި ހިމެނޭ ކޮންމެ ކުޅުންތެރިޔަކީ ވެސް އެ ޒިންމާ ނަގަން ކެރޭނެ ވަރުގެ ކުޅުންތެރިޔެއް ކަމަށެވެ. އޭނާ ބުނީ ޓީމުގެ ކުޅުންތެރިންގެ އަޒުމަކީ މޮޅުވުން ކަމަށާއި، އެންމެ ފަހު ވަގުތާ ހަމައަށް ވެސް މަސައްކަތް ކުރާނެ ކަމަށެވެ.

ވޭލްސް އާ ދެކޮޅަށް އެމެރިކާ އިން ނިކުންނާނީ ހޯމަ ދުވަހުގެ ރޭ ރާއްޖެ ގަޑިން 12 ޖަހާއިރުއެވެ.