މެލޭޝިޔާގައި ހޮނިހިރު ދުވަހު ބޭއްވުނު އާންމު އިންތިޚާބްގައި އެއްވެސް ބަޔަކަށް އަޤުލަބިއްޔަތު ނުލިބުނެވެ. އެންމެ ގިނަ ވޯޓު ލިބުނީ އިދިކޮޅު ލީޑަރު އަންވަރު އިބްރާހިމް އަށެވެ. ނަމަވެސް އޭނާގެ ޕަކަތަން ހަރަޕަން އެލަޔަންސްއަށް ވެސް މެޖޯރިޓީ ލިބުމާ ގާތަށް ވެސް އާދެވިފައެއް ނުވެއެވެ.

އިސްމާއިލް ސަބްރީ ޔާގޫބް އިސްވެ ހުންނެވި ވެރިކަންކުރާ ކޮއެލިޝަން އަށް ވެސް ދުވަހަކު ނުވާވަރު ބައްޔަކާ ވަނީ ކުރިމަތިލާން ޖެހިފައެވެ. ވެރިކަންކުރާ ކޮއެލިޝަން އިން ކުރިމަތިލި 178 ގޮޑީގެ ތެރއިން ކާމިޔާބު ކުރެވިފައިވަނީ އެންމެ 30 ގޮޑިއެވެ.

ކުރީގެ ބޮޑުވަޒީރު މަހާތިރު މުހައްމަދު ވެސް ކުރިމަތިލެއްވި ގޮނޑި ކާމިޔާބެއް ނުކުރެއްވުނެވެ. މިއީ ފާއިތުވި 53 އަހަރުގެ ތެރޭ މަހާތިރު އިންތިޚާބަކުން ބަލިވެވަޑައިގެންނެވި ފުރަތަމަ ފަހަރެވެ. މިފަހަރުގެ ވޯޓުގައި ވާދަ ކުރެއްވި ދާއިރާއިން 8 އިންސައްތަ ވޯޓު ވެސް ލިބިވަޑައިގެންފައެއް ނުވެއެވެ.

އުމުރުފުޅުން 97 އަހަރުގެ މަހާތިރު މެލޭޝިޔާގެ ސިޔާސީ މައިދާނުގައި އިސްދައުރެއް އަދާކުރައްވަމުން ގެންދަވާތާ ސާޅީހަކަށް އަހަރު ވެދާނެއެވެ.  

1981ވަނަ އަހަރުން 2003 ވަނަ އަހަރަށް ފުރަތަމަ ފަހަރަށް ބޮޑުވަޒީރުކަން ކުރައްވާފައިވެއެވެ. އެއާއެކު އަށްޑިހައިގެ އަހަރުތަކުން ފެށިގެން މެލޭޝިޔާއަށް އަންނަމުން އައި އިގްތިސާދީ ކުރި އެރުން އައީ މަހާތިރުގެ މޭސްތިރިކަމުގެ ދަށުގައި ކަމަށް ގިނަބަޔަކު ގަބޫލު ކުރިއެވެ.

މަހާތިރު މިފަހަރު ވާދަ ކުރައްވާފައިވަނީ ރިސޯޓް ޖަޒީރާއެއްކަމަށްވާ ލަންގކާވީ އިންނެވެ. ނަމަވެސް ބެހެއްޓެވި ޑިޕޮސިޓް އަބުރާ ލިބޭވަރަށް ވެސް ވޯޓު ލިބިވަޑައިގެންފައެއް ނުވެއެވެ. 2018 ވަނަ އަހަރު ހަމަ އެ ދާއިރާއިން ކުރިމަތިލައްވާ ބޮޑު އަޤުލަބިއްޔަތަކުން ކާމިޔާބު ކުރެއްވި އެވެ. އަދި އުމުރުފުޅުން 93 އަހަރުފުޅުގައި ދެވަނަ ފަހަރަށް ބޮޑުވަޒީރުކަމަށް ވަޑައިގެންނެވިއެވެ.   

މިފަހަރުގެ އިންތިޚާބްގައި މަހާތިރުގެ ޕާޓީ އަށް އެންމެ ގޮނޑިއެއް ވެސް ކާމިޔާބު ނުކުރެވެއެވެ. އެއާއެކު މަހާތިރުގެ ސިޔާސީ ކެރިއަރު ނިމުމަކަށް ގެންނަވާނެކަމަށް ދަނީ ބެލެމުންނެވެ.