މިއީ ކުރިއަށް އެޅުނު ފިޔަވަޅެއް ކަމަކަށް ނުބަލަން: އީޔޫގެ ކްލައިމެޓް ޗީފް

މޫސުމަށް އަންނަ ނޭދެވޭ ބަދަލުތަކުގެ ސަބަބުން މޫސުމީ ކާރިސާތައް ކުރިމަތިވާ ގައުމުތަކަށް އެހީވުމަށް ޚާއްސަ ފަންޑެއް ހުޅުވުމަށް ކޮޕް27 ސަމިޓުގެ ބައިވެރިން އެއްބަސްވި އެއްބަސްވުމަށް އީޔޫގެ ކްލައިމެޓް ޕޮލިސީ ޗީފް ފާޑު ވިދާޅުވެއްޖެއެވެ. ކޮޕް 27 ސަމިޓުގެ ނިންމުން އިއުލާން ކުރެވުމާ އެކު ބައްދަލުވުމާއި މުޚާތަބު ކުރައްވާ އީޔޫގެ ކްލައިމެޓް ޕޮލިސީ ޗީފް ފްރޭންސް ޓިމަރމަންސް ވިދާޅުވީ މޫސުމާ ބެހޭ ޕޮލިސީ އާ މޫސުމާބެހޭ ސައިންސް އާ ދެމެދު ވަރަށް ބޮޑު ފަރަގު އެބަހުރި ކަމަށެވެ. އަދި މިއެއްބަސްވެވުނު ޕްރޮގްރާމް އޮތް ގޮތުން ބައެއް ގައުމުތަކަށް ޒިންމާއިން ރެކިގަތުމުގެ ފުރުސަތު ވެސް އެބައޮތް ކަމަށް ވިދާޅުވިއެވެ.

މި ހިނގާ ދިހަ އަހަރަކީ ދުނިޔެ ސަލާމަތް ކުރެވޭނެ ނުވަތަ ނެތިކޮށްލާނެ ދިހަ އަހަރު ކަމަށާއި، ނަމަވެސް ކުރިމަތީގައި މިއޮތް އެއްބަސްވުމަކީ ދުނިޔެ ސަލާމަތް ކުރެވޭނެ ފަދަ އެއްބަސްވުމެއް ނޫން ކަމަށް ވިދާޅުވިއެވެ. އަދި ހުރިހާ ގައުމުތަކުން ވެސް މިއީ ހަގީގަތް ކަމަށް ގަބޫލު ކުރުމަށް ގޮވާލެއްވިއެވެ. ޓިމަރމަންސް ވިދާޅުވީ މޫސުމީ ކާރިސާ ހުއްޓުވުމަށް ވާންޖެހޭ ގުރުބާނީއާ މެދު ގިނަ ގައުމުތަކުން ޖެހިލުންވާ ކަމަށާއި އެކަމަށް ދާނެ ޚަރަދަށް ވެސް ތައްޔާރުނުވާކަމަށެވެ.

ދުނިޔޭގެ ހޫނުމިން މިއަދު ވަނީ 19 ވަނަ ގަރުނުގައި ހުރި ވަރަށް ވުރެ 1.1 ޑިގްރީ ސެންޓިގްރޭޑް މައްޗަށް ޖެހިފައެވެ. އަދި ޖައްވުހޫނުވުމަށް މެދުވެރިވާ ކާބަންޑައިއޮކްސައިޑް ގޭސް ދޫކުރެވޭ މިންވަރު ވެސް މިއަދުވަނީ 50 އިންސައްތަ އިތުރުވެފައެވެ. މައިގަނޑު ގޮތެއްގައި ޖައްވު ހޫނުވަނީ ތަރައްގީ ވެފައިވާ ގައުމުތަކުން އިންޖީނުގެތަކުގައި ފޮސިލް ފިއުލް އަންދަމުން ދިއުމުގެ ސަބަބުންނެވެ. ނަމަވެސް ޖައްވު ހޫނުވުމުގެ ސަބަބުން ކަނޑުގެ ލޮނުގަޑު އުފުލި ރާޅު އެރުންފަދަ ކާރިސާތައް ކުރިމަތިވަނީ ފޮސިލް ފިއުލް އެއްވެސް ވަރަކަށް ނުއަންދާ ގައުމުތައް ކަމަށްވާ ދިވެހިރާއްޖެ ފަދަ ބިންތިރި ގައުމުތަކަށެވެ.

ދުނިޔޭގެ މޫސުން ކޮންޓްރޯލް ކުރުމަށް އެދެވޭ ގޮތުގައި މަސައްކަތް ނުކޮށްފި ނަމަ މިހާރު ވެސް އަންނަން ފަށާފައިވާ ގޮތަށް ހީޓްވޭވްތައް އައިސް، ޖަންގަލިތަކުގައި ރޯވުން އިތުރު ވެ، ކަނޑުގެ ލޮނުގަނޑު އުފުލި، ރާޅު އެރުމާއި ފެންބޮޑުވުން އިތުރުވެ، އިންސާނުންގެ ދިރިތިބުމަށް ނުރައްކާވުމުގެ އިތުރުން ބައެއް ބާވަތުގެ ޖަނަވާރާއި ގަސްގަހާގެހި ނެތި ދިއުމަކީ ވެސް އެކަށީގެންވާ ކަމެއްކަމަށް ބައްދަލުވުމުގައި މާހިރުން ހާމަކުރައްވާފައިވެއެވެ.