ފާއިތުވި ހަތަރު އަހަރު ދަނޑުވެރިންނަށް ލޯނުގެ ގޮތުގައި 6.88 މިލިއަން ރުފިޔާ ދޫކޮށްފައިވާ ކަމަށް މިނިސްޓްރީ އޮފް ފިޝަރީސް، މެެރިން ރިސޯސަސް އެންޑް އެގްރިކަލްޗަރ އިން ބުނެފިއެވެ.

އެ މިނިސްޓްރީން އާއްމުކޮށްފައިވާ ތަފާސްހިސާބުތައް ދައްކާގޮތުގައި ސަރުކާރުގެ ދަނޑުވެރި ނަފާ ލޯނު ޕްރޮގްރާމުގެ ދަށުން މިހާތަނަށް 25 ފަރާތަކަށް ލޯނު ވަނީ ދޫކޮށްފައެވެ. މީގެ ތެރޭގައި ހިމެނެނީ ތިން ކުންފުންޏަކާއި 20 ފިރިހެން ދަނޑުވެރިންނާއި ދެ އަންހެން ދަނޑުވެރިންނެވެ.

މި ޕްރޮގްރާމުގެ ދަށުން ކުންފުނިތަކަށް މިހާތަނަށް ދޫކޮށްފައިވަނީ 3،520،820 (ތިން މިލިއަން ފަސް ލައްކަ ވިހި ހާސް އަށްސަތޭކަ ވިހި) ރުފިޔާގެ ލޯނެވެ. އަދި ފިރިހެން ދަނޑުވެރިންނަށް 3،216،909 (ތިން މިލިއަން ދެ ލައްކަ ސޯޅަ ހާސް ނުވަސަތޭކަ ނުވަ) ރުފިޔާގެ ލޯނު ދޫކޮށްފައިވާއިރު އަންހެން ދަނޑުވެރިންނަށް ދޫކޮށްފައިވަނީ 150،000 (އެއްލައްކަ ފަންސާސް ހާސް) ރުފިޔާގެ ލޯނެވެ.

ދަނޑުވެރި ނަފާ ލޯނުގެ ޕްރޮގްރާމުގެ ދަށުން ޖުމްލަ ދަނޑުވެރިންނަށް ދޫކޮށްފައިވާ ލޯނުގެ އަދަދު 6،887،729 (ހަ މިލިއަން އަށް ލައްކަ އައްޑިހަ ހަތް ހާސް ހަތްސަތޭކަ ނަވާވީސް) ރުފިޔާއަށް އަރައެވެ.

ދަނޑުވެރި ނަފާ ޕްރޮގްރާމުގެ ދަށުން ދެމުން އަންނަ ލޯނަކީ އެސްއެމްއީ ޑިވެލޮޕަމަންޓް ފައިނޭންސް ކޯޕަރޭޝަން (އެސްއެމްއީ ބޭންކް) މެދުވެރިކޮށް ދަނޑުވެރިންނަށް ހާއްސަކޮށްގެން ދެމުން އަންނަ ލޯނެކެވެ. މި ލޯނަށް އެންމެ ފުރަތަމަ ފުރުސަތު ހުޅުވާލީ 18 މާޗު 2019ގައެވެ.

މި ލޯނު ދިނުމުގައި ބަލަނީ ޓެކްނޮލޮޖީ ބޭނުންކޮށްގެން ޒަމާނީ ދަނޑުވެރިކަމުގެ މަޝްރޫއުތަކަށެެވެ. އެގޮތުން އަރބަން އެގްރިކަލްޗަރާއި ޕްރޮޓެކްޓެޑް އެގްރިކަލްޗަރާއި ވަރޓިކަލް ގަރޑެނިންގ އާއި ޕޯލްޓްރީ ފާމިންގެ އިތުރުން ގަސް އުފައްދާ ނާސަރީތައް ޤާއިމްކުރުން ފަދަ ކަންކަން މީގެ ތެރޭގައި ހިމެނެއެވެ.

މި ލޯނަކީ ހަ އިންސައްތައިގެ އިންޓްރެސްޓް ރޭޓާއެކު ދޫކުރާ ލޯނެކެވެ. މި ލޯނަށް އެދޭ ފަރާތްތަކުގެ ތެރެއިން ކުންފުނިތަކަށާއި ވަކި ފަރުދުންނަށް ވެސް 75،000 ރުފިޔާއާއި ދެ މިލިއަން ރުފިޔާއާ ދެމެދުގެ އަދަދަކަށް އެދި ހުށަހެޅޭނެއެވެ.