ސްޓޫޑެންޓް ލޯނު މާފުކުރަން ތާއީދެއް ނުކުރަން، މާފު ކުރާނަމަ ދެމެހެއްޓެނިވި ގޮތެއްގައި އެކަން ނުކުރެވޭނެ: ހަޔަރ އެޑިއުކޭޝަން މިނިސްޓަރު
ރައީސް ވަނީ ކިޔަވަމުން ދަނިކޮށް މަރުވި ދަރިވަރުންތަކެއްގެ ލޯނު މާފުކޮށްދެއްވާފައި
ހަޔަރ އެޑިއުކޭޝަން މިނިސްޓަރު ޑރ. އިބްރާހިމް ހަސަން
ސްޓޫޑެންޓް ލޯނު މާފުކޮށްދިނުމަށް ތާއީދު ނުކުރައްވާ ކަމަށް ހަޔަރ އެޑިއުކޭޝަން މިނިސްޓަރު ޑރ. އިބްރާހިމް ހަސަން ވިދާޅުވެއްޖެއެވެ.
މިނިސްޓަރު މިފަދައިން ވިދާޅުވީ "ރާއްޖެޓީވީ" ގެ ފަށާއިރު ޕްރޮގްރާމަށް ދެއްވި ޚާއްސަ އިންޓަވިއުއެއްގައެވެ. ޕްރޮގްރާމުގައި މިނިސްޓަރު ވިދާޅުވީ މި ސަރުކާރުން މަތީ ތައުލީމު ހާސިލުކުރަން ބޭނުންވާ ފަރާތްތަކަށް އެ ފުރުސަތު ފަހިކޮށްދިނުމަށް ގިނަ ކަންކަން ކޮށްދީފައިވާ ކަމަށާއި އަދި ވެސް ބޭނުންވަނީ އެ ފަރާތްތަކަށް ލުއި ގޮތްތަކެއް ހޯދައިދިނުމަށް ކަމަށެވެ.
މަތީ ތައުލީމު ހާސިލުކުރަން ބޭނުންވާ ފަރާތްތަކަށް ދެމުން އަންނަ ލޯނާ ގުޅޭގޮތުން ވާހަކަދައްކަވަމުން މިނިސްޓަރު ވިދާޅުވީ ތަފާތު އެކި ހާލަތްތަކާ ގުޅިގެން ލޯނު އަނބުރާ ދައްކަން ދަތިވާ ދަރިވަރުން އެކަން މިނިސްޓްރީއާ ހިއްސާ ކުރާ ކަމަށެވެ. އެފަދަ ކުދިންނަށް ފަސޭހަ ކުރުމުގެ ގޮތުން ލޯނު ދައްކާ މުއްދަތު އިތުރުކޮށްދިނުން ފަދަ ލުއިތައް ހޯދައިދިނުމަށް އަބަދުވެސް މިނިސްޓްރީން މަސައްކަތް ކުރަމުން އަންނަކަން ވެސް ފާހަގަކުރެއްވިއެވެ.
ސްޓޫޑެންޓު ލޯނު އަނބުރާ ދެއްކުމަށް ލުއިތަކެއް ހޯދައިދެވުނު ނަމަވެސް ލޯނު މާފުކޮށްދިނުމަކީ ތާއީދު ކުރައްވާ ކަމެއް ނޫން ކަމަށް މިނިސްޓަރު ވިދާޅުވިއެވެ. އެކަމަށް ތާއީދު ނުކުރައްވަނީ މިފަދަ އެހީތަކަކީ ކުރިއަށް އޮތް ޖީލުތަކަށް ވެސް ފޯރުކޮށްދޭން ޖެހޭ އެހީތަކަކަށްވެފައި، ލޯނުތައް މާފު ކޮށްދޭނަމަ އެކަން ދެމެހެއްޓެނިވި ގޮތެއްގައި ނުކުރެވޭނެތީ ކަމަށް އޭނާ ވިދާޅުވިއެވެ.
ބައެއް ހާލަތްތަކުގައި ލޯނު މާފު ކޮށްދިނުން ރަނގަޅުކަން ފާހަގަކުރައްވައި މިނިސްޓަރު ވިދާޅުވީ އެއީ ރައީސުލްޖުމްހޫރިއްޔާއަށް ލިބިވަޑައިގެންފައިވާ ބާރެއް ކަމަށާއި ކިޔަވަމުން ދަނިކޮށް މަރުވި ދެތިން ކުއްޖެއްގެ ލޯނު ރައީސް އިބްރާހިމް މުޙައްމަދު ޞާލިހު މާފުކުރެއްވި ކަމަށެވެ. ނަމަވެސް އެއީ ތަފާތު ހާލަތެއްކަން އޭނާ ފާހަގަކުރެއްވިއެވެ.
ސްޓޫންޑެންޓް ލޯނު ދިނުމުގައި މީގެ ކުރިން އެޑްމިނިސްޓްރޭޓިވް ފީގެ ގޮތުގައި 5 އިންސައްތަ ނަގަމުން އައި ނަމަވެސް މި ސަރުކާރު އައިސް އެ އަދަދު އެއް އިންސައްތައަށް ބަދަލުކޮށްފައިވާކަން ވެސް މިނިސްޓަރު ފާހަގަކުރެއްވިއެވެ. އެހެންކަމުން އެކަމަށް އެދިފައިނުވާ ދަރިވަރުން ވެސް ވީހާވެސް އަވަހަށް އެކަމަށް އެދުމަށް މިނިސްޓަރު ވަނީ އިލްތިމާސްކުރައްވާފައެވެ.
