ގާޔާގެ ބަދަލު ބާލްޑޭ ސްޕެއިން ޓީމުގައި ހިމަނައިފި

ފީފާ ވޯލްޑް ކަޕްގައި ވާދަކުރާ ސްޕެއިން ޓީމުގައި ބާސެލޯނާ އަށް ކުޅެމުން އަންނަ އަލެހަންދްރޯ ބާލްޑޭ ހިމަނައިފިއެވެ.

ބާލްޑޭ ސްޕެއިން ޓީމުގައި ހިމަނާފައިވަނީ ވެލެންސިއާގެ ކެޕްޓަން ހޯސޭ ގާޔާގެ ބަދަލުގައެވެ. ގާޔާ އަށް ވަނީ މުބާރާތުގައި ނުކުޅެވޭނެކަން ޔަޤީންވެފައެވެ. ސްޕެއިން އިން މުބާރާތަށް ތައްޔާރުވުމުގެ ގޮތުން ބުދަ ދުވަހު ކުރިއަށް ގެންދިޔަ ފަރިތަކުރުންތަކުގެ ތެރެއިން ގާޔާ އަށް ވަނީ އަނިޔާވެފައެވެ. އޭނާގެ ފައިގެ ކުޑަހުޅަށް ލިބުނު އަނިޔާގެ ސަބަބުން ގާޔާ އަށް މުބާރާތުގައި ނުކުޅެވޭނެކަން ވަނީ ޔަގީންވަފައެވެ. ނަމަވެސް ގާޔާ އަށް ގެއްލޭނީ ގްރޫޕް ސްޓޭޖުގެ ފުރަތަމަ ދެ މެޗެވެ. އެއީ ސްޕެއިންގެ މެޑިކަލް ޓީމުން ލަފާ ކުރާ ގޮތުގައި 10 ވަރަކަށް ދުވަހުގެ ތެރޭގައި ގާޔާ އަނިޔާއިން ރަނގަޅުވެ، ކުޅެވޭ ވަރުވާނެއެވެ.

ނަމަވެސް ސްޕެއިންގެ ކޯޗު ލުއިސް އެންރީކޭ ނިންމީ ގާޔާގެ ބަދަލު ބާލްޑޭ ޓީމުގައި ހިމަނާށެވެ. މިއީ ބާލްޑޭ ސްޕެއިންގެ ޤައުމީ ޓީމުގައި ހިމެނުނު ފުރަތަމަ ފަހަރެވެ. އުމުރުން 19 އަހަރުގެ ބާލްޑޭ ވަނީ މީގެ ކުރިން ސްޕެއިންގެ ޤައުމީ ޒުވާން ޓީމުތަކަށް ކުޅެފައެވެ. ބާސެލޯނާއިން ކެރިއަރު ފެށި ބާލްޑޭ ވަނީ އެ ޓީމުގައި ވެސް މޮޅު ކުޅުމެއް ދައްކާފައެވެ. ބާލްޑޭ ވަނީ މިހާތަނަށް ބާސެލޯނާ އަށް 23 މެޗު ކުޅެދީފައެވެ.