މިއަދު، ދުނިޔޭގެ ފެންވަރުގެ ދިވެހި ކެއްކުންތެރިން އެބަތިބި: ރައީސް

މިއަދު, ދުނިޔޭގެ ފެންވަރުގެ ދިވެހި ކެއްކުންތެރިން އެބަތިބިކަމަށް ރާއްޖޭގެ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.

ސީޖީއެމް ޝެފްސް އެވޯރޑުގައި ވާހަކަފުޅުދައްކަވަމުން ރައީސް ވިދާޅުވީ، ރާއްޖޭގެ ފަތުރުވެރިކަމުގެ ރަންޔޫބީލް ހަރަކާތްތައް ފާހަގަކުރުން ނިމިގެންދާއިރު، މިފަދަ އެވޯރޑް ހަފްލާއެއް ބޭއްވުމަކީ ޓޫރިޒަމާ ނުހަނު ގުޅުންހުރި ކަމެއްކަމަށެވެ.

Advertisement

ރައީސް ވަނީ، މިއީ ފަތުރުވެރިކަމުގެ ތާރީޚުގައި ޚާއްސަގޮތެއްގައި ފާހަގަ ކުރެވިގެންދާނެ ރެއެއްގެގޮތުގައި ސިފަ ކުރައްވާފައެވެ. ސަބަބެއްގެ ގޮތުގައި ވިދާޅުވީ، މިއީ ފުރަތަމަ ފަހަރަށް، ކަލިނަރީ ދާއިރާގެ ފަންނުވެރިންނަށް ޚާއްސަކޮށް އެ ފަރާތްތަކުގެ އަގުހުރި މަސައްކަތުގެ އަގު ވަޒަންކުރެވިގެންދާ ފަހަރުކަމަށެވެ.

ރައީސް ވަނީ އެކަމަށްޓަކައި ސީޖީއެމްއަށް ޝުކުރު އަދާކުރައްވާފައެވެ. އެގޮތުން ސީޖީއެމްއަކީ ކަލިނަރީ ދާއިރާ ފުޅާ ކުރުމުގައި އިސް ދައުރެއް އަދާކުރާ ޖަމްއިއްޔާއެއްކަން ރައީސް ފާހަގަ ކުރެއްވިއެވެ.

ރައީސް ވިދާޅުވީ، ވޯރލްޑް ލީޑިންގ ޑެސްޓިނޭޝަން އެވޯރޑް ވިދިވިދިގެން 3 ފަހަރު ރާއްޖެއަށް ލިބި، އެ އެވޯރޑް މިލްކުކުރެވިފައިވާ ކަމަށާއި، މި ހުރިހާ ކާމިޔާބީއެއްގެ އެންމެ ބޮޑު އެއް ހިއްސާއެއް އަދާކުރާ އެއް ބަޔަކަށް ކަލިނަރީ ދާއިރާގެ ފަރާތްތައް ވާނެކަމަށެވެ.

އެ ފަރާތްތަކުން ފަރުދާގެ ފުރަގަހުގައި ކުރާ މަސައްކަތަކީ ފަތުރުވެރިކަމުގެ ދާއިރާގެ ކާމިޔާބީގެ އެއް ސިއްރު ގޮތުގައި ރައީސް ސިފަކުރެއްވިއެވެ.

ރައީސް ވިދާޅުވީ، ފަތުރުވެރިކަން ފެށިގެން އައިއިރު އެ ގޮންޖެހުން އޮތް ކަމަށާއި، ނަމަވެސް މިއަދު ދުނިޔޭގެ ފެންވަރުގެ ދިވެހި ކެއްކުންތެރިން އެބަތިބި ކަމަށެވެ. އަދި ރިސޯޓުތަކުގެ ކަލިނަރީ ދާއިރާގެ އިސް ފަރާތްތަކުގެ ގޮތުގައިވެސް ދިވެހިން ތިބިކަން ފާހަގަ ކުރައްވައި ރައީސް ވަނީ، ފަތުރުވެރިކަން ފުޅާވަމުންދާ މިންވަރަށް ބަލާއިރު އަދިވެސް ދިވެހިންގެ އަދަދު ދަށްކަން ފާހަގަ ކުރައްވާފައެވެ.

ރައީސް ވިދާޅުވީ، މިއީ ޒުވާނުންނަށް ބަލާއިރުވެސް ނުހަނު މުހިއްމު ފަންނެއްކަމަށެވެ. އެގޮތުން، ދިވެހި ޒުވާނުން މި ދާއިރާއަށް ނުކުންނަ ވަަރަކަށް މި ފަންނު އިތުރަށް ފުޅާވެގެންދާނެކަން ރައީސް ފާހަގަ ކުރެއްވިއެވެ.

އޭގެ އިތުރުން، ކެއްކުމަކީ މާ ފުޅާ ދާއިރާއެއްގައި ބަލަންޖެހޭ އެއްޗެއްގެ ގޮތުގައިވެސް ރައީސް ސިފަ ކުރެއްވިއެވެ. ރައީސް ވިދާޅުވިގޮތުގައި، ދުނިޔޭގެ ފަތުރުވެރިކަމުގެ ބާޒާރުގައި ދިވެހި ފަތުރުވެރިކަމަށް އޮތް މަޤްބޫލުކަން އިތުރު ކުރުމަށްޓަކައިވެސް ދިވެހި ޒުވާނުން މި ދާއިރާއަށް ވަންނަންޖެހޭ ކަމަށެވެ.

ދިވެހިން މި ދާއިރާއިން ނުކުމެ، އީޖާދީ ކެއުންތައް ތައާރަފުކޮށްފިނަމަ، ބޭރުގެ ކެއުންތަކެކޭ އެއްގޮތަށް ދިވެހި ކެއުންތަކުގެ ވާހަކަވެސް ދެެއްކެން އޮންނާނެކަމަށް ރައީސް ވިދާޅުވިއެވެ. އަދި ދިވެހި ޝެފުންގެ އެފަދަ އިސްނެގުމަކަށް އިންތިޒާރުކުރައްވާކަންވެސް ރައީސް ފާހަގަކުރެއްވިއެވެ.

ރައީސް ވަނީ އެވޯޑު ހާސިލު ކުރެއްވި ފަރާތްތަކަށްވެސް މަރުހަބާ ވިދާޅުވެފައެވެ.

ސީޖީއެމް ޝެފްސް އެވޯރޑް ހަފްލާގައި ފަސްޓްލޭޑީ ފަޒްނާ އަހުމަދުގެ އިތުރުން، ޓޫރިޒަމް މިނިސްޓަރ ޑރ. އަބްދުﷲ މައުސޫމާއި، ފަތުރުވެރިކަމުގެ ދާއިރާއާއި ކަލިނަރީ ދާއިރާގެ ފުންނާބުއުސް ބޭފުޅުން ބައިވެރިވެވަޑައިގަތެވެ.