ވޯލްޑް ކަޕް ބެލުމަށް މާލެ ސަރަހައްދުގައި ބަހައްޓާ އެންމެ ބޮޑު ސްކްރީން ހުޅުމާލޭގައި ބެހެއްޓުމުގެ މަސައްކަތް ފަށައިފި
19 ނޮވެމްބަރު 2022 | ހޮނިހިރު 02:26ދެ ސަރަހައްދެއްގައި 20 ފޫޓު 40 ފޫޓުގެ ބޮޑު ސްކްރީނެއް ބެހެއްޓުމަށް ނިންމާފައިވޭ
އެޗްޑީސީގެ "ބޯޅަ ފޯރި"
ވޯލްޑްކަޕް ބެލުމަށް މާލެ ސަރަހައްދުގައި ބަހައްޓާ އެންމެ ބޮޑު ސްކްރީން ހުޅުމާލޭގެ ދެސަރަހައްދެއް ގައި ބެހެއްޓުމުގެ މަސައްކަތް ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ)ން ފަށައިފިއެވެ.
އެޗްޑީސީން ބުނީ މި ދެ ސަރަހައްދުގައި ވެސް 20 ފޫޓު 40 ފޫޓުގެ ބޮޑު ސްކްރީނެއް ބަހައްޓާނެ ކަމަށެވެ.
ގަތަރުގައި ބޭއްވުމަށް ހަމަޖެހިފައިވާ ފީފާ ވޯލްޑް ކަޕް ހުޅުމާލެގައި ދެއްކުމުގެ ގޮތުން އެޗް.ޑީ.ސީ އިން ހުޅުމާލޭގެ ދެ ސަރަހައްދެއްގައި ދަނީ ބޮޑު ސްކްރީން ބެހެއްޓުމުގެ މަސައްކަތްކުރަމުންނެވެ. އެގޮތުން, ހުޅުމާލޭގެ ސިންތެޓިކް ޓްރެކާއި ހިޔާ ސަރަހައްދުގައި މި ކޯޕަރޭޝަނުން ބަހައްޓާ ސްކްރީން ވެގެންދާނީ މާލެ ސަރަހައްދުގައި ބެހެއްޓޭނެ އެންމެ ސައިޒުން ބޮޑު ދެ ސްކްރީނަށެވެ.
ހުޅުމާލޭގައި ދިރިއުޅޭ ރައްޔިތުންނަށް ފޯރީގައި އެއްތަނަކުން ވޯލްޑްކަޕް ބެލޭނެ އިންތިޒާމް އެ ކޯޕަރޭޝަނުން ހަމަޖައްސައި ދިނުމަށް ވަރަށް ގިނަ ބައެއްގެ އެއްބާރުލުން ލިބިފައިވާކަމަށް އެޗްޑީސީން ބުނެފައިވެއެވެ. އެގޮތުން ސްކްރީން ބެހެއްޓުމަށް ލެޑް ޕެނަލް ދިނީ ސްޓެލްކޯގެ ފަރާތުންނެވެ. ޕްރިންޓިންގ ޕާޓްނާގެ ގޮތުގައި ތިންކް, ބެވެރެޖް ޕާޓްނާރގެ ގޮތުގައި ކޮކާކޯލާ އަދި ސަޕޯޓިންގ ޕާޓްނަރުގެ ގޮތުގައި ހިމެނޭ ވެލިގާ އިންވަނީ ގިނަގުނަ އެހީތެރިކަން ފޯރުކޮށްދީފައިވާ ކަމަށް ވެސް މައުލޫމާތުދީފައިވެއެވެ.
ދިވެހިންގެ މެދުގައި މަގުބޫލު ކުޅިވަރެއްކަމުގައިވާ ފުޓްބޯޅައިގެ އެންމެ ބޮޑު އީދު ކަމަށްވާ ވޯލްޑް ކަޕް ބެލުގެ އިންތިޒާމް އެ ކޯޕަރޭޝަނުން ކުރަން ނިންމީ ދިވެހިންނަށް ފޯރި ނަގަމުން މި މުބާރާތް ބަލާލެވި, އެކުވެރި މާހައުލެއްގައި ފުޓު ބޯޅައިގެ އީދުގައި ބައިވެރިވުމުގެ ފުރުސަތު ހޯދައިދިނުގެ ގޮތުން ކަމަސް އެޗްޑީސީ އިން ބުނެއެވެ.
އެ ކޯޕަރޭޝަނުން އަބަދުވެސް މަސައްކަތް ކުރަމުންދަނީ ރައްޔިތުންނަށް ބޭނުންވާ ކަންކަން ދެނެގަނެ އެންމެ ފުރިހަމަ ގޮތުގައި އެކަންކަން ފޯރުކޮށްދިނުމަށް ކަމަށް ބުނެފައިވެއެވެ. އެގޮތުން އާންމުން ބޭނުންވާ ކަންކަން ގާތުން ބަލާ އެކަންކަން ފަހިކޮށްދިނުމުގެ މަސައްކަތް އެ ކޯޕަރޭޝަންގެ ފަރާތުން އަބަދުވެސް ދަނީ ކުރަމުންކަމަށް ބުނެއެވެ.
