އިނގިރޭސިވިލާތާއި ނޯވޭ މެޗް: ފީފާ ވޯލްޑް ކަޕް ކުއާޓާ ފައިނަލުގެ ކުރިން އެނގެންޖެހޭ މުހިންމު ކަންތައްތައް

2026 ވަނަ އަހަރުގެ ވޯލްޑް ކަޕްގައި އިނގިރޭސިވިލާތާއި ނޯވޭ މިއާމީގައި ބައްދަލުކުރާ ފޯރިގަދަ މެޗުގެ ކުރިން، ހާލަންޑާއި ކޭންގެ ކުރިމަތިލުމަށް ގިނަ ބަޔަކު ދަނީ އިންތިޒާރު ކުރަމުންނެވެ.

ފްލޮރިޑާގެ މިއާމީގެ ހޫނުގަދަ މާހައުލުގައި އަންނަ ހޮނިހިރު ދުވަހުގެ ރޭ ފެނިގެންދާނީ ޔޫރަޕްގެ ދެ ބާރު ކަމަށްވާ އިނގިރޭސިވިލާތާއި ނޯވޭ ބައްދަލުކުރާ ފޯރިގަދަ ކުރިމަތިލުމެކެވެ.

2026 ވަނަ އަހަރުގެ ވޯލްޑް ކަޕްގައި ނޯވޭ ފެނިގެންދަނީ ހައިރާންކުރުވަނި ނަތީޖާތަކެއް ނެރެމުން އަންނަ ޓީމެއްގެ ގޮތުގަ އެވެ. ގަދަ 16 ގެ ބުރުގައި ފަސް ފަހަރުގެ ޗެމްޕިއަން ބްރެޒިލް ބަލިކޮށް، 1998 ވަނަ އަހަރުގެ ފަހުން ފުރަތަމަ ފަހަރަށް މުބާރާތަށް އެނބުރި އައިސް އެ ޓީމުން ދަނީ ތާރީޚީ ކާމިޔާބީތަކެއް ހޯދަމުންނެވެ. މިއީ އެ ގައުމުގެ ތާރީޚުގައި ވޯލްޑް ކަޕެއްގެ ނޮކްއައުޓް ބުރުގައި ޖެހިޖެހިގެން ދެ މެޗުން މޮޅުވި ފުރަތަމަ ފަހަރެވެ. އަނެއްކޮޅުން އިނގިރޭސިވިލާތް ނުކުންނާނީ ހަތަރުވަނަ ފަހަރަށް ސެމީ ފައިނަލަށް ދަތުރުކޮށް، ކުއާޓާ ފައިނަލުން އަށްވަނަ ފަހަރަށް ކެޓުމުގެ ހިތްދަތިކަމުން ސަލާމަތްވުމުގެ އަޒުމުގަ އެވެ.

ނަމަވެސް މި މެޗުގެ ނަތީޖާ ނެރޭނީ ކޮން ކަންތައްތަކެއް ބާވަ އެވެ؟

ރަން ބޫޓުގެ ރޭހުގައި ކުރި ހޯދާނީ ކޮން ކުޅުންތެރިއެއް ބާވަ އެވެ؟

މި މުބާރާތުގައި ފުރަތަމަ ފަހަރަށް، ރަން ބޫޓަށް އެންމެ ބޮޑަށް ވާދަކުރާ ދެ ކުޅުންތެރިން އެއް ދަނޑެއްގައި މި މެޗުގައި ބައްދަލުކުރާނެއެވެ.

ގްރޫޕް ސްޓޭޖުގައި މި ފުރުސަތު ނޯވޭގެ ކޯޗު ސްޓޭލް ސޯލްބަކެން ވަނީ ގެއްލުވާލާފަ އެވެ. އިރާގާއި ސެނެގޯލް އަތުން މޮޅުވި މެޗުތަކުގައި އާލިން ހާލަންޑް ދެ ގޯލު ޖެހި ނަމަވެސް، ފްރާންސާ ދެކޮޅަށް ކީލިއަން އެމްބާޕޭ ނުކުތް މެޗުގައި ހާލަންޑް ބޭންދީ ބެންޗުގަ އެވެ. އެއީ އޭރުވެސް ނޮކްއައުޓް ބުރުގެ ޖާގަ ކަށަވަރުވެފައި އޮތުމުންނެވެ.

ނަމަވެސް ނޮކްއައުޓް ބުރުގައި ހާލަންޑް ވަނީ އޭނާގެ ފެންވަރު ދައްކާލާފަ އެވެ. އައިވަރީ ކޯސްޓާ ދެކޮޅަށް ކުޅުނު ފުރަތަމަ މެޗުގައި މޮޅުވި ލަނޑު ޖަހައިދިނީ އޭނާ އެވެ. އަދި ބްރެޒިލް އަތުން 2-1 އިން މޮޅުވި މެޗުގައި ދެ ލަނޑުވެސް ޖަހައި، ޓީމު ކުއާޓާ ފައިނަލަށް ގެންގޮސްދިނެވެ.

ހާލަންޑް ވަނީ މިހާތަނަށް ކުޅުނު ހަތަރު މެޗުގައި ހަތް ލަނޑު ޖަހާފަ އެވެ. މިއާއެކު އޭނާ ނޯވޭއަށް ކުޅުނު ފަހު 14 މެޗުގައިވެސް ވަނީ ލަނޑު ޖަހާފަ އެވެ. އެ 14 މެޗުގައި ޖުމްލަ 27 ލަނޑު ޖަހާފައިވާއިރު، ގައުމީ ޓީމަށް ކުޅުނު 54 މެޗުން އޭނާ ވަނީ 62 ލަނޑު ހަމަކޮށްފަ އެވެ.

އުމުރުން 25 އަހަރުގެ ހާލަންޑް މިވަގުތު އޮތީ ރަން ބޫޓުގެ ރޭހުގައި އެމްބާޕޭ އާއި މެސީއަށްވުރެ އެއް ލަނޑު ފަހަތުގަ އެވެ. އަދި ހެރީ ކޭންއަށްވުރެ އެއް ލަނޑު ކުރީގަ އެވެ. އުމުރުން 32 އަހަރުގެ ކޭން ވަނީ ކްރޮއޭޝިއާއާ ދެކޮޅަށް ކުޅުނު ފުރަތަމަ މެޗުގައި ދެ ލަނޑު ޖަހާފަ އެވެ. އަދި ޕެނަމާ މެޗުގައި ޖެހި ލަނޑާއެކު ގްރޫޕްގެ އެއްވަނަ ކަށަވަރުކޮށްދިނެވެ. ގަދަ 32 ގެ ބުރުގައި ކޮންގޯ އަތުން މޮޅުވި މެޗުގައި ދެ ލަނޑު ޖެހިއިރު، މެކްސިކޯ އަތުން 3-2 އިން މޮޅުވި ފޯރިގަދަ މެޗުގައި މޮޅުވި ލަނޑު ޖެހީވެސް އޭނާ އެވެ.

މި ދެ ކުޅުންތެރިންގެ މެދުގައި އެއްގޮތް ކަންތައްތަކެއް އެބަހުއްޓެވެ. ދެ ކުޅުންތެރިންވެސް ވަނީ ޕްރިމިއާ ލީގުގެ ރަން ބޫޓު ތިން ފަހަރު ހޯދާފަ އެވެ. އަދި ދެ ކުޅުންތެރިންނަކީވެސް ޖަރުމަނު ލީގުގައި ކާމިޔާބު ދުވަސްތަކެއް ހޭދަކުރި ދެ ކުޅުންތެރިންނެވެ. ނަމަވެސް މީގެ ކުރިން މި ދެ ކުޅުންތެރިން އެއް ދަނޑެއްގައި ބައްދަލުކޮށްފައިވަނީ އެންމެ ދެ ފަހަރު އެވެ. އެއީ 2022/23 ވަނަ އަހަރުގެ ސީޒަނުގަ އެވެ.

އެ ދެ މެޗުގައިވެސް ޓޮޓެންހަމް ހޮޓްސްޕާ އާއި މެންޗެސްޓާ ސިޓީ ބައްދަލުކުރިއިރު، ކޮންމެ ކުޅުންތެރިއަކުވެސް ވަނީ ލަނޑެއް ޖަހައި، އެއް މެޗުން މޮޅުވެފަ އެވެ.

މިއާމީގައި ކުޅޭ މި މެޗަކީވެސް މިފަދަ ގާތް ކުރިމަތިލުމަކަށް ވާނެ ކަމަށް ބެލެވެއެވެ. އަދި މި ދެ ތަރިންގެ ތެރެއިން ކުރި ހޯދާ ކުޅުންތެރިއަކަށް، މިވަގުތު ދުނިޔޭގައި ހުރި އެންމެ މޮޅު ސްޓްރައިކަރަކީ އޭނާކަން ސާބިތުކޮށްދިނުމުގެ ފުރުސަތު ބޮޑުވާނެއެވެ.

އިނގިރޭސިން ހާލަންޑް ހުއްޓުވާނީ ކިހިނެއް؟

މި ސުވާލުގެ ޖަވާބަކީ ޑޭން ބާން މެޗު ފެށުމުން ހިމެނުން ހެއްޔެވެ؟

ނިއުކާސަލްގެ 6 ފޫޓު 7 އިންޗީގެ މި ޑިފެންޑަރަކީ ތޯމަސް ޓުޗެލްގެ ވޯލްޑް ކަޕް ސްކޮޑުން ފުރުސަތު ލިބުނު ހައިރާންކުރުވަނި ނަމެކެވެ. އޭނާ އިނގިރޭސި ގައުމީ ޓީމަށް ފުރަތަމަ މެޗެއް ކުޅެދިނީ 2025 ވަނަ އަހަރުގެ މާޗް މަހު، އުމުރުން 33 އަހަރު ފުރުނު ފަހުންނެވެ. އަދި މިހާތަނަށް ފުރަތަމަ އެގާރައިގައި ހިމެނިގެން ކުޅުނީ އެންމެ ހަތަރު މެޗެވެ. އެއީވެސް ކޮލިފައިންގައި އެންޑޯރާ އާއި އަލްބޭނިއާއާ ދެކޮޅަށެވެ.

ނަމަވެސް އާދިއްތަ ދުވަހުގެ ރޭ މެކްސިކޯއާ ދެކޮޅަށް ކުޅުނު މެޗުގެ ފަހު 15 މިނެޓުގައި ބަދަލު ކުޅުންތެރިއެއްގެ ގޮތުގައި އޭނާ ނުކުމެ ދެއްކި ކުޅުމަކީ ޓުޗެލްގެ މޮޅު ނިންމުމެކެވެ. 10 ކުޅުންތެރިންނާއެކު އިނގިރޭސިން 3-2 ގެ ލީޑު ދިފާއުކުރަމުން ދިޔައިރު، އިތުރު ވަގުތުގެ 12 މިނެޓާއެކު އޭނާ ވަނީ މެކްސިކޯއިން ފޮނުވާލި ގިނަ ހުރަސްތަކެއް ދިފާއުކޮށް، ހަށިގަނޑުން ބޮޑު ގުރުބާނީއެއް ވެފަ އެވެ.

ހާލަންޑާ އަޅާބަލާއިރު ބާންގެ ހަލުވިމިން ކުޑަވެފައި، އޭނާއަށްވުރެ ނުވަ އަހަރު ދޮށި ނަމަވެސް، ބާން އަކީ ހާލަންޑަށްވުރެ ދެ އިންޗި އިސްކޮޅުން ދިގު ކުޅުންތެރިއެކެވެ. އަދި މީގެ ކުރިން އިނގިރޭސި ލީގުގައި ހާލަންޑާ ދެކޮޅަށް ކުޅުނު މެޗުތަކުގައި އޭނާ ވަނީ ހާލަންޑަށް ވަރަށް ބޮޑަށް އުނދަގޫތައް ކުރިމަތިކޮށްފަ އެވެ.

2022 ވަނަ އަހަރު ހާލަންޑް މެންޗެސްޓާ ސިޓީއާ ގުޅުނު ފަހުން ބާންއާ ދެކޮޅަށް އަށް މެޗު ކުޅެފައިވެ އެވެ. މީގެ ތެރެއިން ހަ މެޗަކީ ޕްރިމިއާ ލީގު މެޗުތަކެވެ. އަދި އެފްއޭ ކަޕާއި ލީގު ކަޕްގައި ދެ މެޗު ކުޅުނެވެ.

މި ދެ ކުޅުންތެރިން އެކުގައި ދަނޑުމަތީގައި ހޭދަކުރި 10 ގަޑިއިރަށްވުރެ ގިނަ ވަގުތުގެ ތެރޭގައި، ހާލަންޑަށް ބާންގެ މައްޗަށް ކުރިހޯދައި ޖެހުނީ އެންމެ ލަނޑެކެވެ. އެއީ 2022 ވަނަ އަހަރުގެ އޮގަސްޓް މަހު އެ ދެ ކުޅުންތެރިން ބައްދަލުކުރި ފުރަތަމަ މެޗުގަ އެވެ.

ބައިނަލްއަގުވާމީ ފުޓްބޯޅައިގައި ކޮންމެ 73 މިނެޓަކުން ލަނޑެއް ޖަހާ ސްޓްރައިކަރަކަށް ބަލާއިރު، މިއީ ސަމާލުކަން ދޭންޖެހޭ ފަދަ ރެކޯޑެކެވެ.

މީގެ އިތުރުން، އެޒްރީ ކޮންސާއާ ދެކޮޅަށް ކުޅުނު ފަސް މެޗުގައި (406 މިނެޓު) ވެސް ހާލަންޑަށް ޖެހުނީ އެންމެ ލަނޑެކެވެ. އެ ލަނޑުވެސް ޖެހީ 2022 ވަނަ އަހަރުގެ ސެޕްޓެމްބަރު މަހު އެސްޓަން ވިލާއާ ދެކޮޅަށް ކުޅުނު ފުރަތަމަ މެޗުގަ އެވެ.

ހާލަންޑް ވަނީ ޕްރިމިއާ ލީގުގެ ހަތަރު ސީޒަނުގައި 132 މެޗުން 112 ލަނޑު ޖަހައި، ތިން ފަހަރު ރަން ބޫޓު ހޯދާފައެވެ. އެހެންކަމުން މި ތަފާސްހިސާބުތަކަކީ ޓުޗެލްއަށް ލިބޭނެ ބޮޑު ހިތްހަމަޖެހުމެކެވެ.

މީގެ އަނެއްކޮޅަށް ބަލާއިރު، މާކް ގޭހީއާ ދެކޮޅަށް ކުޅުނު ފަސް މެޗުގައި ހާލަންޑް ވަނީ ހަތް ލަނޑު ޖަހާފަ އެވެ. ނަމަވެސް މިހާރު ގޭހީ އަކީ ސިޓީގައި ހާލަންޑްގެ ޓީމު ބައިވެރިއެކެވެ. އަދި ޖޯން ސްޓޯންސްއާ ދެކޮޅަށް ހާލަންޑް ދުވަހަކުވެސް ކުޅެފައެއް ނުވެ އެވެ.

މެދުތެރޭގައި އޮޑެގާޑާއި ރައިސްގެ ކުރިމަތިލުން

ބްރެޒިލާ ދެކޮޅަށް ކުޅުނު މެޗުގައި ނޯވޭގެ ކެޕްޓަން މާޓިން އޮޑެގާޑް ވަނީ 61 ފަހަރު ބޯޅަ ހިފައިގެން ކުރިއަށް އަރައި، އޭނާ ފޮނުވާލި 109 ޕާހުގެ ތެރެއިން 101 ޕާސް ކާމިޔާބުކަމާއެކު ފޯރުކޮށްދީފަ އެވެ. އަނެއްކޮޅުން ބްރެޒިލްގެ މުޅި ޓީމަށް އެ މެޗުގައި ޖުމްލަ ޖެހުނީ އެންމެ 331 ޕާހެވެ.

އޮޑެގާޑްގެ މޮޅު ކުޅުމާއެކު ނޯވޭއިން ވަނީ ބްރެޒިލްގެ ބޯޅަ ހިފެހެއްޓުމުގެ ރޭޓު 33.6 އިންސައްތައަށް ދަށްކޮށްފަ އެވެ. މިއީ ވޯލްޑް ކަޕް ތާރީޚުގައި ބްރެޒިލްގެ މި ރޭޓު މިހާ ދަށަށް ދިޔަ ފުރަތަމަ ފަހަރެވެ. ނަމަވެސް މިއީ އާދިއްތަ ދުވަހު މެކްސިކޯއާ ދެކޮޅަށް ކުޅުނު މެޗުގައި އިނގިރޭސިން ބޯޅަ ހިފެހެއްޓި މިންވަރަށްވުރެ 0.4 އިންސައްތަ އިތުރު އަދަދެކެވެ. އެ މެޗުގެ ފަހު ބައިގަޑިއިރު އިނގިރޭސިން ހޭދަކުރީ އެކަކު މަދުކޮށް އަމިއްލަ އޭރިއާ ތެރޭގައި ދިފާއީ ކުޅުމެއްގަ އެވެ.

މިއީ ރެކޯޑްތައް ބަލަން ފެށި ފަހުން އިނގިރޭސި ޓީމުން އެންމެ މަދުން ބޯޅަ ހިފެހެއްޓި މެޗެވެ. 2018 ގެ ފަހުން ފުރަތަމަ ފަހަރަށް ސެމީ ފައިނަލަށް ދާން ބޭނުންނަމަ، އިނގިރޭސިންނަށް ބޯޅަ ހިފެހެއްޓުން މުހިންމެވެ. އެކަން ކުރެވެން އޮތީ އޮޑެގާޑްގެ ކުޅުން ހުއްޓުވައިގެންނެވެ.

އޮޑެގާޑް ހުއްޓުވާނެ ގޮތް ޑެކްލަން ރައިސްއަށްވުރެ ބޮޑަށް އެނގޭނެ އެހެން ކުޅުންތެރިއަކު ނުހުންނާނެ އެވެ. މި ދެ ކުޅުންތެރިން ވަނީ ފާއިތުވި ތިން ސީޒަނުގައި އާސެނަލްގެ މެދުތެރޭގައި 117 މެޗު އެކުގައި ކުޅެފަ އެވެ. އަދި އާސެނަލްއަށް ޕްރިމިއާ ލީގު ކާމިޔާބުކޮށްދީ، ޗެމްޕިއަންސް ލީގުގެ ފައިނަލަށް ގެންގޮސްދިނުމުގައި މުހިންމު ދައުރެއް އަދާކޮށްފަ އެވެ.

ނަމަވެސް ރައިސްއަށް ވަނީ ފާއިތުވި މަސްތަކުގައި ފިޓްނެސްގެ މައްސަލަތައް ކުރިމަތިވެފަ އެވެ. މިއީ އޮޑެގާޑަށް ރަނގަޅަށް އެނގޭނެ ކަމެކެވެ. ރައިސް މި ސީޒަނުގައި ޕްރިމިއާ ލީގުގައި 3,094 މިނެޓު ކުޅެފައިވާއިރު، އޮޑެގާޑް ކުޅުނީ އެންމެ 1,369 މިނެޓެވެ. އެހެންކަމުން އޮޑެގާޑްގެ ތާޒާކަން މި މެޗުގައި މުހިންމު ދައުރެއް އަދާކޮށްފާނެ އެވެ.

ހޫނަށް ކެތްކުރާނީ ބޮޑަށް ކޮން ބައެއް؟

އިނގިރޭސިންނާއި ނޯވޭ ފަދަ ގައުމުތަކުގެ މީހުންނަކީ މިއާމީގެ ހޫނުގަދަ އަދި ތެތްފިނިކަން ބޮޑު މާހައުލަށް އާދަވެފައިވާ ބައެއް ނޫނެވެ.

ނަމަވެސް މި މުބާރާތުގެ ފުރަތަމަ ފަސް މެޗަށް ބަލާއިރު، އިނގިރޭސިންނަށްވުރެ ބޮޑަށް ނޯވޭގެ ކުޅުންތެރިން މިފަދަ މާހައުލަކަށް އާދަވެފައިވާ ކަމަށް ބެލެވެ އެވެ. ނޯވޭއިން ވަނީ ހޫނުގަދަ މާހައުލުތަކުގައި ހަތަރު މެޗު ކުޅެފަ އެވެ.

ނޯވޭގެ ފުރަތަމަ މެޗު ބޮސްޓަންގައި އިރާގާ ދެކޮޅަށް ކުޅުނުއިރު، ސެނެގޯލްއާ ދެކޮޅަށް ކުޅުނީ ނިއު ޔޯކްގަ އެވެ. ފްރާންސް އަތުން ބަލިވި މެޗު ބޮސްޓަންގައި ކުޅުނުއިރު، އައިވަރީ ކޯސްޓާ ދެކޮޅަށް ކުޅުނީ ޑަލަސްގެ ބަންދު ދަނޑެއްގައެވެ. ބްރެޒިލް އަތުން މޮޅުވި މެޗުވެސް ކުޅުނީ ނިއު ޔޯކްގެ ހޫނުގަދަ މާހައުލުގަ އެވެ.

އިނގިރޭސިން ފުރަތަމަ މެޗު ޑަލަސްގެ ބަންދު ދަނޑުގައި ކުޅުނުއިރު، ބޮސްޓަންގައި ގާނާއާ ދެކޮޅަށް ކުޅުނު މެޗާއި ނިއު ޔޯކްގައި ޕެނަމާއާ ދެކޮޅަށް ކުޅުނު މެޗުގައިވެސް ވަނީ ވާރޭ ވެހިފަ އެވެ. ކޮންގޯއާ ދެކޮޅަށް ކުޅުނީ އެޓްލާންޓާގެ އޭސީ ކުރި ދަނޑެއްގައެވެ. އަދި މެކްސިކޯ މެޗު ކުޅުނީ މާ ފިނި މާހައުލެއްގަ އެވެ.

މިއާމީގައި އަންނަ ހޮނިހިރު ދުވަހު ހޫނުމިން ހުންނާނެ ކަމަށް ބެލެވެނީ 33 ޑިގްރީ ސެލްސިއަސްގައެވެ. އަދި ތެތްފިނިކަން 58 އިންސައްތައިގައި ހުންނާނެ ކަމަށް ލަފާކުރެވެ އެވެ. މި ހާލަތަށް އެންމެ ރަނގަޅަށް ހޭނޭ ޓީމަކަށް ސެމީ ފައިނަލުގެ ޖާގަ ލިބުމުގެ ފުރުސަތު ބޮޑެވެ.

ނޫސާ/ޝެލްޑަރަޕް އާއި އިނގިރޭސި ރައިޓް-ބެކްގެ ކުރިމަތިލުން

މިއާމީގައި ފެނިގެންދާނެ އަނެއް މުހިންމު ކުރިމަތިލުމަކީ ނޯވޭގެ ވާތް ފަރާތު ވިންގާއި އިނގިރޭސިވިލާތުގެ ކަނާތް ފަރާތު ޑިފެންސެވެ.

ޗެލްސީގެ ރައިޓް-ބެކް ރީސް ޖޭމްސްއަށް ވަނީ އަނިޔާގެ ސަބަބުން ފަހު ތިން މެޗު ގެއްލިފަ އެވެ. ޓީނޯ ލިވްރަމެންޓޯއަށްވެސް އަނިޔާވެފައިވުމުން، ސްކޮޑުގައި ހުރި ހަމައެކަނި ރައިޓް-ބެކަކީ ޖޭމްސް އެވެ. އޭނާ ނެތްތަން ފޫބެއްދުމަށް ޓުޗެލް ވަނީ ޖެޑް ސްޕެންސް، އެޒްރީ ކޮންސާ، ޖޯން ސްޓޯންސް އަދި ޖަރެލް ކުއާންސާ ބޭނުންކޮށްފަ އެވެ.

ކުއާންސާ ސަސްޕެންޝަނުގައި ހުރުމުން، ޖޭމްސް ފިޓްވެއްޖެނަމަ އެއީ ޓުޗެލްއަށް ލިބޭނެ ބޮޑު ހިތްހަމަޖެހުމެކެވެ. ނޫންނަމަ އެ މަގާމަށް ކޮންސާ ނުކުތުން ގާތެވެ.

ނޯވޭގެ އެންޓޯނިއޯ ނޫސާ އަކީ ވަރަށް ހަލުވި އަދި ހުނަރުވެރި ކުޅުންތެރިއެކެވެ. އޭނާ ވަނީ އައިވަރީ ކޯސްޓް މެޗުގައި މޮޅު ލަނޑެއް ޖަހާފަ އެވެ. ނަމަވެސް ބްރެޒިލް މެޗުގައި ބަދަލު ކުޅުންތެރިއެއްގެ ގޮތުގައި ނުކުތް އެންޑްރިއަސް ޝެލްޑަރަޕް ވަނީ މެޗުގެ އޮއިވަރު ބަދަލުކޮށްލާފަ އެވެ. އުމުރުން 22 އަހަރުގެ މި ކުޅުންތެރިޔާ ވަނީ ހާލަންޑް ޖެހި ދެ ލަނޑު ޖެހުމަށްވެސް އެހީތެރިވެދީފަ އެވެ.