ޕޮލެންޑަށް އެރީ ޔޫކްރެއިންގެ މިސައިލެއް، އެކަމަކު ޒިންމާ ރަޝިއާއަށް؟

ނޮވެމްބަރ 15 ވަނަ ދުވަހު ޕޮލެންޑަށް އަމާޒުވީ ޔޫކްރައިންގެ ވައިގެ ދިފާއީ ނިޒާމުން ފޮނުވާލި މިސައިލް ހަމަލާއަކަށް ވެދާނެ ކަމަށާއި، ނަމަވެސް އެ ހަމަލާގެ ޒިންމާ އުފުލަންޖެހޭ ބަޔަކީ ރަޝިއާކަމަށް، އުތުރު އަސްކަރީ އިއްތިހާދު (ނޭޓޯ)ގެ ސެކްރެޓަރީ ޖެނެރަލް، ޖެންސް ސްޓޯލްޓަންބަރގް ވިދާޅުވެއްޖެއެވެ.

ޕޮލެންޑަށް އަމާޒުވީ ޔޫކްރެއިންގެ މިސައިލް ހަމަލާކަމުގައި ވީނަމަވެސް، އެ ހަމަލާގެ ޒިންމާ ރަޝިއާއިން އުފުލަންޖެހެނީ، އިސްވެ ހަނގުރާމަ ފެށި ބަޔަކީ ރަޝިއާ ކަމުގައި ވާތީކަމަށް ސްޓޯލްޓަންބަރގް ވިދާޅުވިއެވެ.

އަންގާރަ ދުވަހުގެ ހަމަލާ އަމާޒުވީ ޕޮލެންޑްގައި ގޮވާމުގެ މަސައްކަތް ކުރަމުން ދިޔަ ފެސިލިޓީއަކަށެވެ. އެ ހަމަލާގައި ޕޮލެންޑުން 2 މީހަކު މަރުވެފައިވާއިރު، އެ ހަމަލާ ވެގެން ދިޔައީ ޔޫކްރައިންގައި ރަޝިއާއިން ކުރަމުން ދާ ހަނގުރާމަ އަވައްޓެރި ގައުމުތަކަށްވެސް ފެތުރިގެން ހިނގައިދާނެކަމުގެ އިންޒާރުދެނިވި ރަނގަބީލަކަށެވެ.

ޕޮލެންޑަށް އަމާޒުވި ހަމަލާއަކީ ރަޝިއާގެ ހަމަލާއެއް ނޫންކަމަށް ބުނާ ޚަބަރުތައް ފެތުރިގެން ދިއުމާއެކު، ހިސާބަކަށް ޕްރެޝަރު ކުޑަވިއެވެ. ނަމަވެސް، ނޭޓޯގެ އެމްބެސެޑަރުންނާއެކު ކުރިއަށްގެންދެވި ކުއްލި ބައްދަލުވުމަކަށްފަހު ނޫސްވެރިންނާ މުޚާތަބުކުރައްވައި ވާހަކަފުޅުދައްކަވަމުން ސްޓޯލްޓަންބަރގް ވިދާޅުވީ، ޒިންމާއިން ރަޝިއާ ބަރީއަނުވާކަމަށެވެ.

ސްޓޯލްޓަންބަރގް ވިދާޅުވީ އެ ހަމަލާއަކީ ޔޫކްރެއިން ހަނގުރާމައިގެ ނުރައްކާ އޮތް މިންވަރު އަންގައިދޭ ހާދިސާއެއް ކަމަށާއި، ނަމަވެސް، މެންބަރު ގައުމުތަކަށް ނުރައްކާ އޮތް މިންވަރުގެ އަންދާޒާތަކަށް ބަދަލު ގެނެސްފައި ނުވާނެކަމަށެވެ.

ވައިގެ ދިފާއަށް ބޭނުންކުރާ އިތުރު ނިޒާމުތައް ފޯރުކޮށްދިނުމަށް މެމްބަރު ގައުމުތަކުން ތައްޔާރަށް އޮތްކަން ފާހަގަކުރައްވައި، ސްޓޯލްޓަންބަރގް ވަނީ އެކަމަށް މަރުހަބާ ވިދާޅުވެފައެވެ. އަދި ޕޮލެންޑްގައި ހިނގި ހާދިސާގެ މާނައަކީ، މެންބަރު ގައުމުތައް ހިމާޔަތް ކުރުމުގައި ނޭޓޯ ފެއިލްވުން ނޫންކަންވެސް ސްޓޯލްޓަންބަރގް ވަނީ ފާހަގަކުރައްވާފައެވެ.

ރަޝިއާގެ ރައީސް ވްލެޑްމީރް ޕޫޓިންގެ އަމުރުފުޅަކަށް އެ ގައުމުގެ އަސްކަރިއްޔާއިން ޚާއްސަ އޮޕަރޭޝަނެއްގެ ނަމުގައި، ފެބްރުއަރީ 24 ވަނަ ދުވަހު ޔޫކްރައިންއަށް އަރައި ފެށި ހަނގުރާމައަށް ސުލްހަވެރި ހައްލެއް ލިބިދާނެކަމުގެ އެއްވެސް ނިޝާނެއް އަދި ފެންނާކަށް ނެތެވެ. 8 މަހަށްވުރެ ގިނަ ދުވަހަށް ހަނގުރާމަ ދިގުލައި ގޮސްފައިވާއިރު، ސުލްހައިގެ މަޝްވަރާތަކަށް ރަޝިއާއިން އެދިފައި ނުވާކަމަށް، ޔޫކްރެއިންގެ ރައީސް ވްލޮޑޮމީރް ޒެލެންސްކީ ވަނީ ނޮވެމްބަރު 16 ވަނަ ދުވަހު ވިދާޅުވެފައެވެ.