ފީފާ ވޯލްޑް ކަޕްގައި ވާދަކުރުމަށް ދެކެނު އެމެރިކާގެ ޗެމްޕިއަން އާޖެންޓީނާ ޤަތަރަށް ގޮސްފިއެވެ.

އާޖެންޓީނާ އިން ޤަތަރަށް ދިޔައީ މުބާރާތުގެ ކުރިން ޔުނައިޓެޑް އަރަބް އެމިރޭޓްސް (ޔޫއޭއީ) އާ ދެކޮޅަށް ކުޅުނު އެކުވެރިކަމުގެ މެޗަށްފަހު، ބުދަ ދުވަހުގެ ރޭގެ ވަގުތެއްގައެވެ. އެ މެޗުން އާޖެންޓީނާ ވަނީ 5-0 އިން މޮޅުވެފައެވެ.

އާޖެންޓީނާ އަކީ މިއަހަރުގެ މުބާރާތުގެ ފޭވަރިޓުންގެ ގޮތުގައި ގިނަ ބަޔަކު ދެކެމުން އަންނަ ޤައުމެކެވެ. ޚާއްސަކޮށް މިފަހަކަށް އައިސް އެ ޓީމުން ދައްކަމުން އަންނަ ކުޅުމާއި، ޓީމުގެ ކުޅުންތެރިންގެ ފޯމު މި ވަގުތު ރަނގަޅުވުމުންނެވެ. އާޖެންޓީނާ ޓީމު ޤަތަރަށް ދިޔައީ އެ ޤައުމަށް ޚާއްސަ ކުރެވިފައިވާ ފްލައިޓުންނެވެ. އެ ފްލައިޓުގެ ބޭރުގައި އެ ޓީމުގެ ކެޕްޓަން ލިއޮނެލް މެސީގެ އިތުރުން އެހެން ކުޅުންތެރިން ފޮޓޯ ވަނީ ޖަހާފައެވެ.

އާޖެންޓީނާ އިން ވަނީ އެންމެ ފަހުން ކުޅުނު 36 މެޗުން ބަލިނުވެ ނިންމާލާފައެވެ. ބަލިނުވެ އެންމެ ގިނަ މެޗު ނިންމާލުމުގެ ރެކޯޑު އޮތީ ޔޫރަޕުގެ ޗެމްޕިއަނުން އިޓަލީ އަތުގައެވެ. އެ ޓީމު ވަނީ ބަލިނުވެ 37 މެޗު ހަމަކޮށްފައެެވެ. އެ ރެކޯޑު މުގުރާލުމަށް އާޖެންޓީނާ އަށް ބޭނުންވަނީ ދެ މެޗުން ބަލިނުވެ ނިންމާލުމެވެ.

މި އަހަރުގެ މުބާރާތުގައި އާޖެންޓީނާ އޮތީ ސައުދީ އަރަބިއްޔާ، ޕޮލެންޑް އަދި މެކްސިކޯއާއެކު ގްރޫޕް ސީ ގައެވެ. އާޖެންޓީނާގެ ފުރަތަމަ މެޗުގައި އެ ޤައުމު ނުކުންނާނީ މި މަހުގެ 22 ވަނަ ދުވަހު ސައުދީއާ ދެކޮޅަށެވެ. ދެ ވަނަ މެޗުގައި މެކްސިކޯއާ ދެކޮޅަށް ނުކުންނާނީ މި މަހުގެ 27 ގައެވެ. ގްރޫޕް ސްޓޭޖުގެ ފަހު މެޗުގައި ޕޮލެންޑާ ދެކޮޅަށް އެ ޤައުމު ނުކުންނާނީ ޑިސެމްބަރު މަހުގެ އެއް ވަނަ ދުވަހުއެވެ.