ހަނަފަސްކަމޭ ބުނުމުން ސިފަކުރެވެނީ ހިކިފައި އޮތް ބިމެއްނަމަ، ދެވަނަ ވިސްނުމަކަށް ދާން މަޖުބޫރު!

އިސްހާގް ހަސަން ދިރިއުޅެމުންދަނީ ސޯމާލިއާގެ ބައިދޯއާ ސިޓީއަށް ހިޖުރަކުރާ ފަރާތްތަކަށް ޚާއްސަކޮށްފައިވާ ކޭމްޕެއްގައެވެ. އޭނާއަކީ، ޖެނުއަރީ މަހުން ފެށިގެން 5 ފަހަރެއްގެ މަތިން، ވިއްސާރަ މޫސުން ފެއިލްވުމުގެ ސަބަބުން ގެދޮރު ގެއްލުނު މިލިއަނަކަށްވުރެ ގިނަ މީހުންގެ ތެރެއިން އެކަކެވެ.

ސޯމާލިއާއަށް މިއަދު ކުރިމަތިލާންޖެހިފައިވާ ހަނަފަސްކަމަކީ، ފާއިތުވި 40 އަހަރެއްހާ ދުވަހުގެ ތާރީޚަށް ބަލާއިރު، އެ ގައުމަށް ތަޖުރިބާކުރަން ޖެހުނު އެންމެ ތަކުލީފު ބޮޑު ހަނަފަސްކަމެވެ. އުމުރުން 82 އަހަރުގެ އިސްހާގް ހަސަން ބުނިގޮތުގައި، ބަނޑުހައިހޫނުކަމުގެ ސަބަބުން މީހުންގެ ހަށިގަނޑަށް ނިކަމެތިކަން ކުރިމަތިވުމުގެ ނަތީޖާއެއްގެގޮތުން، ފުރާނަ ސަލާމަތްކުރުމަށްޓަކައި ހިޖުރަކުރަން މަޖުބޫރުވީއެވެ. ނަމަވެސް، އޭނާއަށްވެސް، ކާރިސާއިން މުޅިއަކުން ސަލާމަތްވެވޭ ގޮތެއް ނުވިއެވެ.

ހިޖުރަވެރިންނާ ބެހޭ އދ.ގެ ބައިނަލްއަގުވާމީ ޖަމްއިއްޔާއިން ބުނާގޮތުގައި، މޫސުމީ ނޭދެވޭ ބަދަލުތަކާއެކު އުފެދޭ ކާރިސާތަކުގެ ސަބަބުން ކޮންމެ އަހަރަކުވެސް، އިސްހާގް ހަސަން ފަދަ 22 މިލިއަނެއްހާ މީހުންގެ ގެދޮރު ގެއްލެއެވެ.

ބައެއް މީހުންނަކީ، އުފުލެމުންދާ ކަނޑުތަކާ ގުޅިފައިވާ ގޮނޑުދޮށްތަކުގައި ނުވަތަ ރަށު ތެރޭގައި ދިރިއުޅުން ބިނާކޮށްގެން އުޅެމުން ދިޔަ މީހުންނެވެ. އަނެއްބައި މީހުންނަކީ، ހޫނުގަދަވެ، ގަނޑުފެންތައް ވިރި، ކަނޑައިގެންދާ ފަރުބަދަތަކުގެ ސަބަބުން ގެދޮރު ގެއްލިގެންދާ މީހުންނެވެ.

އަމިއްލަ ވަޒަން ދޫކޮށްލަން މަޖުބޫރުވުމާއެކު، ތަފާތު އެކި ކަހަލަ ނުރައްކަލަށް އެފަދަ މީހުން ހުށަހެޅެއެވެ. ހަމަނުޖެހުންތަކާއި، ބަނޑުހައިހޫނު ކަމާއި، ތަފާތު އެކި ކަހަލަ ބަލިތަކަކީ ކުރިމަތިލާން ޖެހޭ ބައެއް ގޮންޖެހުންތައް ކަމަށް ތަޖުރިބާކާރުން ފާހަގަ ކުރައްވައެވެ. މޫސުމީ ނޭދެވޭ ބަދަލުތަކުގެ ސަބަބުން ދުނިޔޭގެ މޫސުމަށް ބޮޑެތި ބަދަލުތަކެއް ކުރިމަތިވަމުންދާއިރު، މި ހިނގާ 21 ވަނަ ގަރުނުގެ މެދަކާ ހިސާބަށް ދެވޭއިރު، މި ސަބަބާ ހެދި ގެދޮރު ގެއްލޭ މީހުންގެ އަދަދު 143 މިލިއަނަށް އަރާނެ ކަމަށްވެސް ތަޖުރިބާކާރުން އަންދާޒާ ކުރައްވައެވެ.

އަދުގެ ހާލަތު މިފަދަ ގޮތަކަށް އޮތްއިރު، މިސްރުގެ ޝަރަމުއްޝައިޚްގައި ކުރިއަށްދާ ކޮޕް27ގައި ބައިވެރިވާ، ތަރައްގީވަމުން އަންނަ ގައުމުތަކުން ދަނީ، މުއްސަނދި ގައުމުތަކުން މިކަމަށް އެހީވުމަށް ޑިމާންޑްތައް ކުރަމުންނެވެ.

ބައެއް ފަރާތްތަކުން ޑިމާންޑް ކުރަމުން ދަނީ މޫސުމީ ނޭދެވޭ ބަދަލުތަކަށް އަހުލުވެރި ވުމަށްޓަކައި، އިތުރު މާލީ އެހީތެރިކަން ފޯރުކޮށްދިނުމަށެވެ. އަދި މިހާރު ލިބެމުންދާ ގެއްލުންތަކަށް، މުއްސަނދި ގައުމުތަކުން ބަދަލު ދިނުމަށްވެސް ދަނީ ޑިމާންޑް ކުރަމުންނެވެ.

އިމްތިތާލް މަހްމޫދަކީ ޔޫއެންއެޗްސީއާރްގެ ގުޑްވިލް އެމްބެސެޑަރެކެވެ. ސޫދާންގެ އެމެރިކާ ދަރިކޮޅަށް ނިސްބަތްވާ ޝާއިރެކެވެ. ސޫދާން ހަނގުރާމައިގެ ސަބަބުން އުފަން ފަސްގަނޑު ދޫކޮށްލި މީހެކެވެ. މޫސުމީ ނޭދެވޭ ބަދަލުތަކުން ކުރިމަތިކުރުވާ ތަކުލީފުތައް އެނގޭ ޒުވާނެކެވެ.

މޫސުމީ ނޭދެވޭ ބަދަލުތަކާ ގުޅިގެން ހިޖުރަކުރާ ގިނަ މީހުން އަދިވެސް ވަޒަންވެރިވަމުން ދަނީ އެމީހުން ނިސްބަތްވާ ގައުމުގެ ސަރަހައްދީ އިމުގެތެރޭގައެވެ. އެއީ ސަރުކާރުތަކުން، އެ ގައުމެއްގެ ރައްޔިތުންގެ ދަރަޖަ ދޭނެކަމަށްޓަކައެވެ. ނަމަވެސް ސަރަހައްދީ އިން ހުރަސްކޮށް ހިޖުރަކުރާ މީހުންނަށް ނުރައްކާ ބޮޑެވެ. އިނދަޖެހިގެންދާ ދިއުމަކުން ސަލާމަތްކޮށްދޭނެ ސޭފްޓީ ބެލްޓެއްވެސް ނޯވެއެވެ. ރެފިއުޖީންނާ ބެހޭ އދ.ގެ މުޢާހަދާއަށް ބަލާއިރު، މޫސުމީ ބަދަލުތަކާ ގުޅިގެން ހިޖުރަކުރާ މީހުންނަކީ ރެފިއުޖީން ކަމުގައި ބެލޭކަށްވެސް ނޯވެއެވެ.