ރަފައެލް ލިއޯގެ ވިސްނުން ހުރީ އޭސީ މިލާންގައި މަޑުކުރުމަށް

އީޓާލިއަން ލީގުގެ އޭސީ މިލާނަށް ކުޅެމުން އަންނަ ޕޯޗުގަލްގެ ޒުވާން ފޯވާޑް ރަފައެލް ލިއޯގެ ވިސްނުމަކީ އެ ކުލަބުގައި މަޑުކުރުން ކަމަށް އޭނާގެ ބައްޕަ ބުނެފިއެވެ.

ލީގު ދޫކޮށް ލިއޯ އޭސީ މިލާނަށް ބަދަލުވީ 2019 ވަނަ އަހަރުއެވެ. އޭނާ އެ ކުލަބަށް ގުޅުނީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. އެ އެއްބަސްވުމުގެ މުއްދަތު ހަމަވާނީ 2024 ވަނަ އަހަރުއެވެ. މިލާންގައި ލިއޯ އަންނަނީ މޮޅު ކުޅުމެއް ވެސް ދައްކަމުންނެވެ. އެހެންވެ އޭނާ ހޯދުމަށް ޔޫރަޕުގެ ބައެއް ކުލަބުތަކުން ފާރަލަމުން އަންނަ ކަމަށް ރިޕޯޓުތައް ބުނެއެވެ.

އެކަމާ ގުޅިގެން ލިއޯގެ ބައްޕަ ބުނީ މިލާނާއެކު 2024 ވަނަ އަހަރާ ހަމައަށް ލިއޯ ހަދާފައިވާ އެއްބަސްވުމެއް އޮތް ކަމަށެވެ. އޭނާ ބުނީ މިހާރު ކުރަމުން އަންނަނީ މިލާނާއެކު އައު އެއްބަސްވުމެއް ހެދުމުގެ މަޝްވަރާތައް ކަމަށެވެ. އޭނާ ބުނީ އެ މުއްދަތާ ހަމައަށް ލިއޯ ހުރިިހާ ކަމަކާ ކުރިމަތިލާނެ ކަމަށެވެ. މީގެ އިތުރުން އޭނާ ބުނީ އިޓާލިއަން ލީގުގައި ހުރުމަކީ ލިއޯ އެންމެ ބޭނުންވާ ގޮތް ކަމަށެވެ.

މިލާނަށް ބަދަލުވުމަށްފަހު ލިއޯ ވަނީ މިހާތަނަށް އެ ޓީމަށް ކުޅެދިން 135 މެޗުން 34 ލަނޑު ޖަހާފައެވެ. މި ސީޒަންގައި އޭނާ ވަނީ 20 މެޗު ކުޅެ ހަތް ލަނޑު ޖަހާފައެވެ. ލިއޯ އުމުރުން 23 އަހަރުގެ ލިއޯ އަންނަނީ މިދިޔަ އަހަރުން ފެށިގެން ޕޯޗުގަލް ޤައުމީ ޓީމުގައި ވެސް ކުޅެމުންނެވެ.