ކ. މާލެ
|
14 ނޮވެންބަރ 2022 | ހޯމަ 23:38
ސައެންސްވެރިން ވަނީ ފަރުތަކުން އިވެމުންދާ މިފަދަ އަޑުތައް ރެކޯޑް ކޮށްފައި، މި އަޑުތައް ފުރޭނުމުގެ މަސައްކަތުގައި ސައެންސްވެރިންނާ އެންމެ ގާތުން މަސައްކަތް ކުރަމުން ދަނީ ގޫގްލް
ފަރުތަކުން އިވޭ އަޑުތައް ރިކޯޑްކުރުން
މުރަކައިގެ ފަރުތަކުގެ އަޑު ކަންފަތަށް: އަހާލަން ބޭނުންތަ؟
 
އެތައް ސަތޭކަ ގަޑިއިރަކަށް ދެމިގެންދާ އެ އަޑުތަކުގެ ތެރޭގައި، ނެތި މަރުވަމުންދާ ފަރުތަކުން އިވޭ އަޑުތައްވެސް ހިމެނޭ
 
އަޑުތައް ރެކޯޑް ކޮށްފައިވާ ބައެއް ސަރަޙައްދުތަކަށް ބަލާއިރު، އާދަޔާ ޚިލާފު ގަދައަށް މަސްވެރިކަން ކުރާ ސަރަޙައްދުތަކާއި، ހިމާޔަތް ކޮށްފައި ވާ ކަނޑުގެ ސަރަޙައްދުތައްވެސް ހިމެނޭ
 
ގޫގްލް އަރޓްސްއެންޑް ކަލްޗަރއިން އަމާޒު ހިފާފައި ވަނީ، ދުނިޔޭގެ ކޮންމެ ހިސާބެއްގައި ހުރެގެންވެސް ކަނޑުގެ ދިރުންތަކުގެ ތަފާތު އަޑުތައް އަހާލެވޭނެ ފަދަ އޯޑިއޯ ޑޭޓާބޭސްއެއް ތަޢާރަފު ކުރުމަށް

ސީދާ ކަންފަތަށް މާ ސާފު ނުވި ކަމުގައި ވީ ނަމަވެސް، ކޮންމެ އެއްޗެއްގައިވެސް ކޮންމެވެސް ކަހަލަ އަޑެއް ހުރެއެވެ. ބައެއް އަޑުތަކަކީ މާ ގަދަވުމުގެ ސަބަބުން ކަންފަތަށް ސާފު ނުވާ އަޑުތަކަކަށް ވާ އިރު، އަނެއް ބައި އަޑުތަކަކީ މާ މަޑުވުމުގެ ސަބަބުން ނީވިދާ އަޑުތަކެކެވެ. އަނެއް ބައި އަޑުތަކަކީ މާ ބޮޑު ސަމާލުކަމެއް ނުދެވި އޮތުމުގެ ސަބަބުން، އިވެއޭވެސް ހީވެފައި ނުވާ އަޑުތަކެކެވެ. ފަހަރުގައި، މިއީވެސް އެފަދަ އަޑަކަށް ވެދާނެއެވެ.

އެއީ މިޞްރުގެ ޝަރަމްއަލް ޝައިޚްގެ ދުޅަހެޔޮ ފަރަކުން އިވެމުން ދިޔަ ހިތްގައިމު އަޑެވެ. ސައެންސްވެރިން ވަނީ ފަރުތަކުން އިވެމުންދާ މިފަދަ އަޑުތައް ރެކޯޑް ކޮށްފައެވެ. އެތައް ސަތޭކަ ގަޑިއިރަކަށް ދެމިގެންދާ އެ އަޑުތަކުގެ ތެރޭގައި، ނެތި މަރުވަމުންދާ ފަރުތަކުން އިވޭ އަޑުތައްވެސް ހިމެނެއެވެ.

މި އަޑުތައް ފުރޭނުމުގެ މަސައްކަތުގައި ސައެންސްވެރިންނާ އެންމެ ގާތުން މަސައްކަތް ކުރަމުން ދަނީ ގޫގްލްއެވެ. ގޫގްލްއިން އެ މަސައްކަތް ކުރިއަށް ގެންދަނީ މަސްނޫއީ ތޫނުފިލިކަން ނުވަތަ އޭއައި ޓެކްނޮލޮޖީގެ އެހީއާ އެކުގައެވެ. އަޑުތައް ރެކޯޑް ކޮށްފައިވާ ބައެއް ސަރަޙައްދުތަކަށް ބަލާއިރު، އާދަޔާ ޚިލާފު ގަދައަށް މަސްވެރިކަން ކުރާ ސަރަޙައްދުތަކާއި، ހިމާޔަތް ކޮށްފައި ވާ ކަނޑުގެ ސަރަޙައްދުތައްވެސް ހިމެނެއެވެ. މި މަޝްރޫޢަކީ ދުނިޔޭގައިވާ މުރަކައިގެ ދުޅަހެޔޮކަން ވިލަރެސް ކުރުމުގެ އަމާޒުގައި ހިންގާ މަޝްރޫއެކެވެ.

ފިލިޕީންސްގަ އަހަރެން ކުރި ކަމަކީ، ހިމާޔަތް ކޮށްފައިވާ ސަރަޙައްދުތަކާއި، އާދަޔާ ޚިލާފު ގަދައަށް މަސްވެރިކަން ކޮށް އުޅޭ ސަރަޙައްދުތަކުގައި މި ރެކޯޑަރުތައް ހަރުކުރީ. ކަނޑުތަކުގެ އަޑުތަކުގައި ތަފާތުތަކެއް ހުރި ތޯ ބަލަންވެގެން އެކަން ކުރީ. އިތުރު ދިރާސާތަކުން މި އެނގުނީ، ކަނޑުތަކުގައި މަސްމަހާމެހި ގިނަވުމާއި، އިތުރު އެކި ބާވަތްތައް ގިނަވީމަ ދެން އެ އިވޭ އަޑުތައް ތަފާތުކަން. އަހަރެން އަތުގަ އެބަހުރި އެތައް ސަތޭކަ ގަޑިއިރެއްގެ އަޑުތައް. އެކަމަކު، މައްސަލައަކީ އެ ހުރިހާ ރެކޯޑިންގްއެއް ފުރޭނުން. އެކަން ކުރާނެ ބައެއް ގޮތްގޮތް އެބަހުރި. އެކަމަކު، އެއީ މެނުއަލްކޮށް މި އަޑުތައް އެހުންހާ ފުރިހަމަ ގޮތްތަކެއް ނޫން. ދެން، މި ލިބުނީ މި ފުރުޞަތު. އާންމުންނަށް މި އަޑުތައް އިއްވައިގެން، މި އަޑުތައް ފުރާނަން އަހަރަމެންނަށް އެހީ ލިބިދާނެކަން މި އެނގުނީ.
މޭރީ ސްކޮޑީޕޯ؛ މެރީން ބައޮލޮޖިސްޓް

މުރަކައިގެ ފަރުތަކުގެ އަޑުތައް ރެކޯޑް ކުރުމުގެ މަސައްކަތް ކުރިއަށް ގެންދިޔައީ މިއުޒިކް ޓެކްނޮލޮޖީގެ ތަޖުރިބާ ލިބިފައިވާ މެރީން ބައޮލޮޖިސްޓެއް ކަމަށް ވާ، ސައެންސްވެރިޔާ މޭރީ ސްކޮޑީޕޯއާއި ޑޭވް އިރަސްމަސް، ކަނޑުމަގުން، ކޮޕް ބައްދަލުވުމަށް ކުރި ދަތުރުގެ ތެރޭގައެވެ. ގޫގްލް އަރޓްސްއެންޑް ކަލްޗަރއިން އަމާޒު ހިފާފައި ވަނީ، ދުނިޔޭގެ ކޮންމެ ހިސާބެއްގައި ހުރެގެންވެސް ކަނޑުގެ ދިރުންތަކުގެ ތަފާތު އަޑުތައް އަހާލެވޭނެ ފަދަ އޯޑިއޯ ޑޭޓާބޭސްއެއް ތަޢާރަފު ކުރުމަށެވެ. އޭގެ ތެރޭގައި ސިއްޙަތު ރަނގަޅު ފަރުތަކާއި ދުޅަހެޔޮކަމެއް ނެތް ފަރުތައްވެސް ހިމެނެއެވެ.

ފިލިޕީންސްއިން ފެށިގެން އެންމެ ފަހުން މިޞްރުގެ ޝަރަމްއަލް ޝައިޚްގައި ހަދާފައިވާ ރެކޯޑިންގްތަކަކީ، ޤަވައިދާ ޚިލާފަށް ކަނޑުގެ ދިރުންތައް ނަގަމުންދާ ދިއުން ފަދަ ހަރަކާތްތައް ޓްރެކްކޮށް، އާރޯކަމާއި ތާޒާކަން ގެނެސްދޭން ޖެހޭ ސަރަޙައްދުތައް ފާހަގަކޮށް، އިޔާދަކޮށްފައިވާ ސައިޓްތަކަށް ލިބެމުންދާ ކުރިއެރުންތައް ޓްރެކް ކުރުމަށް އެހީވެދޭނެ އަޑުތަކެއް ކަމަށް މަޢުލޫމާތު ލިބެއެވެ.

މީ އަހަރަމެން މިތާ ހެދި ސެޓްއަޕްއެއް. އެކަމަކު އަސްލު މިކަން ހިނގާނީ އޮންލައިން ޕްލެޓްފޯމެއްގަ. ކޮންމެ މީހަކަށްވެސް އެކްސެސް އޮންނާނެ. އެހެންވީމަ، ދުނިޔޭގެ އެކި ކަންކޮޅުތަކުން، މި އަޑުތައް އަހާނެ ކަންފަތްތަކެއް މި ލިބުނީ. އެހެން ނޫނަސް، އެކި މީހުންނަށް އަޑުތައް އިވުމުގައިވެސް ތަފާތު ހުރޭ. ޒުވާނުންނަށް ހައި ފްރީކުއަންސީގެ އަޑުތައް އިވޭނެ. އެހެންވީމަ، ދޮށީ އުމުރުގެ މީހަކަށް ފާހަގަ ނުވެދާ މަހެއްގެ އަޑު، ޒުވާނަކަށް އިވިދާނެ. އެހެންވީމަ، މިއީ ގުޅިފައިވާ ޤާބިލު ހުނަރުތަކެއްގެ އެހީ ހޯދުން ކަހަލަ ކަމެއް. އަހަރަމެންގެ ޑޭޓާބޭސް ބަލާލުމުގެ އިތުރުން، ހޭލުންތެރިކަންވެސް އިތުރުވާނެ.
މޭރީ ސްކޮޑީޕޯ؛ މެރީން ބައޮލޮޖިސްޓް

އާދަޔާ ޚިލާފު ގަދައަށް މަސްވެރިކަން ކުރުމާއި، މޫސުމީ ނޭދެވޭ ބަދަލުތަކުގެ ސަބަބުން ދުނިޔެ ހޫނުވަމުން ދާ ދިއުމުގެ ސަބަބުން، ޤުދުރަތީ ވެށީގެ ނިޒާމުގައި އޮތް ބެލަންސް ގެއްލި، ފަރުތަކުގެ ކޮލިޓީއަށް ބަދަލު އައުން އެކަށީގެންވާ ކަމަށާ، ދުޅަހެޔޮ ވެށީގެ ނިޒާމެއް ބަރޯސާ ވަނީ ބެލަންސްގެ މައްޗަށް ކަން ސްކޮޑީޕޯ ވަނީ ފާހަގަ ކޮށްފައެވެ.

މުސްތަޤުބަލުގަ ވަރަށް ގިނަ ކަންކަން ކުރަން އެބަ ހުރި. މީވެސް ވަރަށް ޒަމާނީ ކަމެއް. މީ ވަރަށް އާވެސް ކަމެއް. މިހާތަނަށް ހަދަން ފަށާފައި ވަނީވެސް ވަރަށް މަދު ދިރާސާތަކެއް. އެހެންވެ، ވަރަށް އެކްސައިޓް ވެފަ މި ހުންނަނީ. މީ އަހަރެން ވަރަށް ގަޔާވާ ކަމެއް. ބައިވަރު މަސްމަހާމެހީގެ އަޑުތައް އެބަހުރި. އެއަޑުތައް ލައްވަނީ ކޮން ކަމެއްކަމެއް ނޭނގޭ. އިންސާނުންހެން އަޑުލައްވަން ތުންތަޅުވާ އެއްޗެއް ނޫންވިއްޔާ އެއީ. މަސްމަހާމެހި އެ އަޑުތައް ލައްވަނީ އަދި މުޅިން އެހެން ނިޒާމަކުން.
މޭރީ ސްކޮޑީޕޯ؛ މެރީން ބައޮލޮޖިސްޓް

ވައިލްޑްލައިފް ކޮންޒަރވޭޝަން ސޮސައިޓީގެ ދިރާސާއެއް ބުނާ ގޮތުގައި، ދުނިޔޭގެ އެކި ކަންކޮޅުތަކަށް ފެތުރިފައިވާ ފަރުތަކުގެ ތެރެއިން، ފުރިހަމައަށް ހިމާޔަތް ކޮށްފައި ވަނީ އެންމެ 2.5 ޕަސެންޓްގެ ސަރަޙައްދެކެވެ. ނަމަވެސް ފަރުތަކަކީ އިންސާނާގެ ދިރިހުރުމާ ގުޅިފައިވާ މުހިންމު ވެއްޓަކަށް ވާ ހިނދު، ފަރުތައް ހިމާޔަތް ނުކޮށްފިނަމަ އޭގެ ނަތީޖާއަކީ ގެއްލުން ދެނިވި ނަތީޖާއަކަށް ވެގެންދާނެ ކަމުގެ އިންޒާރުވެސް، ސްކޮޑީޕޯ ވަނީ ދެއްވާފައެވެ.

އެންމެ ފަހުން އަޕްޑޭޓް ކުރީ: 4 ހަފްތާ ކުރިން
ރިވިއު ކުރީ: ފާޠިމަތު ޒުހައިރާ
100%
0%
0%
0%
0%
0%
ކޮމެންޓް