"ސްޕައިޑާމެން-ހޯމް ކަމިން" ގެ ހިންދީ ވާޝަންއަށް އަޑުއަޅަނީ ޓައިގާ ޝްރޮފް

ޖުލައި މަހުގެ 7 ވަނަ ދުވަހު ރިލީޒްކުރާ ހޮލީވުޑްގެ ފިލްމު "ސްޕައިޑާމެން-ހޯމް ކަމިން" ގެ ހިންދީ ވާޝަނަށް އަޑުއަޅަނީ ޓައިގާ ޝްރޮފް ކަމަށް އޭނާ ބުނެފިއެވެ.

ޓައިގާ ބުނީ އޭނާއަށް އަޑުއަޅަން ލިބުމަކީ ބުނެދޭން ނޭނގޭ ކަހަލަ އުފާވެރިކަމެއް ގެނުވި ކަމެއް ކަމަށެވެ. އަދި "ސްޕައިޑާމެން"އަކީ ކުޑައިރުއްސުރެ އޭނާ އަށް އެންމެ ކަމުދާ ކެރެކްޓާ ކަމަށާއި އެއީ އަބަދުވެސް އެންމެ ކުޅެން ބޭނުންވާ އެއް ކެރެކްޓާ ކަމަށް އޭނާ ބުނެފައި ވެއެވެ.

"އަހަންނަށް ސްޕައިޑާމެންގެ އަޑު ހިންދީ ބަހުން އަޅަން ލިބުމަކި ބުނެދޭން ނޭނގޭ ކަހަލަ އުފާވެރި އިހުސާސްތައް ގެނުވާކަމެއް. އަހަރެން ބޮޑުވީ ސްޕައިޑާމެން ބަލާ. އެއީ އަހަރެން އެންމެ ކުޅެން ބޭނުންވާ ކެރެކްޓާ،" ޓައިގާ ނެރުނު ސްޓޭޓްމެންޓުގައި ބުނެފައި ވެއެވެ.

"ސްޕައިޑާމެން-ހޯމް ކަމިން"ގެ ހިންދީ ވާޝަނަށް ޓައިގާ އަޑު އަޅާނެ ކަމަށްބުނެ ސެޓޭޓްމެންޓެއް ނެރެފައި ވަނީ އަންގާރަ ދުވަހުއެވެ.

އިންޑީއާގައ"ސްޕައިޑާމެން-ހޯމް ކަމިން" އަޅުވަނީ ސޮނީ ޕިކްޗާސް އެންޓަޓެއިންމަންޓް ގުޅިގެންނެވެ. އިންޑިއާގައި "ސްޕައިޑާމެން-ހޯމް ކަމިން"ހިންދީބަހުގެ އިތުރުން ތަމަޅަ ތެލުގޫ ބަހުން ޑަބްކޮށްގެން ގެނެސްދޭނެއެވެ. އިންޑިއާގައި ވެސް މި ފިލްމު އަޅުވާނީ ފިލްމު ރިލީޒްވާ ދުވަސް ކަމުގައިވާ ޖުލައި 7 ގައެވެ.

ޓައިގާ ބުނެފައިވަނީ އޭނާގެ އުއްމީދަކީ "ސްޕައިޑާމެން-ހޯމް ކަމިން"ގެ ހިންދީ ވާޝަންގައި އޭނާ އަޅައިދޭ އަޑަކީ ބެލުންތެރިން ބަލައިގަންނާނެ އަޑަކަށް ވުން ކަމަށެވެ.

ސޮނީ ޕިކްޗާސް އެންޓަޓެއިންމަންޓުގެ މެނޭޖިން ޑިރެކްޓަރ ވިވެކް ކްރިޝްނާ ޓައިގާގެ އަޑާ ބެހޭގޮތުން ބުނެފައި ވަނީ ޓައިގާގެ މޮޅު ހުނަރަށް އޭނާ ޝައްކު ނުކުރާ ކަމަށާއި ޓައިގާގެ އަޑާއި ފިލްމުގެ މަންޒަރުތަކާ ގުޅޭނެ ކަމަށެވެ.

ޖުލައި މަހުގެ 7 ވަނަ ދުވަހު ރިލީޒްކުރާ "ސްޕައިޑާމެން-ހޯމް ކަމިން" ގެ ސްޕައިޑާމެންގެ ރޯލު ކުޅެފައި ވަނީ ހޮލީވުޑްގެ އެކްޓަރ ޓޮމް ހޮލެންޑެވެ.