"ބަގްސް ބަނީ" ކާޓޫންގެ ސްޕެނިޝް ވަރޝަންއަށް އަޑުއެޅި މީހާ މަރާލައިފި

ކުޑަކުދިންގެ މެދުގައި ބޮޑު މަޤުބޫލުކަމެއް ލިބިގެންދިޔަ ކާޓޫނެއްކަމަށްވާ "ބަގްސް ބަނީ" ގެ ސްޕެނިޝް ވަރޝަންއަށް އަޑުއެޅި މީހާ މަރާލައިފިއެވެ.

ބަގްސްބަނީ ކެރެކްޓަރގެ އިތުރުން ޑެފީ ޑަކްއަށް އަޑުއަޅާފައިވާ ލުއިސް އަލްފޮންސޯ މެންޑޯޒާ މަރާލާފައިވާކަން ބޭރުގެ މީޑިއާތަކުން ކަށަވަރު ކޮށްދީފައިވާއިރު، އޭނާ މަރާލިއިރު އުމުރަކީ 55 އަހަރެވެ. އެގޮތުން އޭނާ މަރާލާފައިވަނީ މެކްސިކޯގައި އޭނާ ދިރިއުޅެމުންދިޔަ ޕޯރޓޭލްސް ނޯޓޭ ސަރަޙައްދުގައެވެ.

މީޑިއާ ރިޕޯޓުތައް ބުނާގޮތުން އޭނާ މަރާލާފައިވަނީ އޭނާގެ ސްޓޫޑިއޯއިން ބައެއް ކުއްޔަށް ހިފައިގެން އުޅޭ މީހަކާ ދެމެދު އުފެދުނު ދެބަސްވުމެއްގެ ތެރެއިންނެވެ. އެގޮތުން މެންޑޮސާގެ ޤާތިލު އޭނާގެ އަނބިމީހާގެ އިތުރުން އާއިލާގެ އިތުރު މެމްބަރަކުވެސް މަރާލާފައިވާކަމަށް ރިޕޯޓުތައް ބުނެއެވެ.

އޭގެ އިތުރުން، މެންޑޯސާއާއި އޭނާގެ އާއިލާ މެންބަރުންތަކެއް މަރާލުމަށްފަހު ޤާތިލު އަމިއްލައަށް މަރުވުމަށްޓަކައި އަމިއްލަ ހަށިގަނޑަށް ބަޑި ޖަހާފައިވާ ކަަމަށާއި، ނަމަވެސް އޭނާ މަރުނުވާކަމަށް ރިޕޯޓްތައް ބުނެއެވެ. ނަމަވެސް އޭނާގެ ޙާލު ވަރަށް ސީރިއަސްއެވެ.

މެންޑޯސާވަނީ މަޝްހޫރު ކާޓޫން ކެރެކްޓަރ ތަކުގެ އިތުރުން، މަޝްހޫރު ލައިވް އެކްޝަން ފިލްމުތަކަށްވެސް ޑަބް ކޮށްފައެވެ. އެގޮތުން "ކަރާޓޭ ކިޑް"އާއި "ދަ ބިގް ބޭންގް ތިއަރީ" ފަދަ މަޝްހޫރު ފިލްމުތަކުގެ ސްޕެނިޝް ވަރޝަންއަށް އޭނާ ޑަބްކޮށްފައިވެއެވެ.

މެންޑޯސާގެ މަރާއެކު ގިނަ ބަޔަކު ދަނީ ހިތާމަފާޅު ކުރަމުންނެވެ. އަދި އެ މައްސަލަ ގާތުން ބެލުމަށްވެސް މެންޑޯސާގެ ފޭނުން ޓްވިޓަރގައި އަޑުއުފުލަމުންދެއެވެ.