ޗެންނާއީއަށް އަނެއްކާވެސް ބޯ ވިއްސާރައިގެ ކާރިސާއެއް

މެދުނުކެނޑި ބޯކޮށް ވާރޭ ވެހެމުން ދިއުމުގެ ސަބަބުން އިންޑިޔާގެ ޗެންނާއީގެ ސްކޫލްތަކާއި ކޮލެޖްތައް ހުކުރު ދުވަހު ބަންދު ކޮށްފައިވެއެވެ. މިއީ މޫސުން ގޯސްވުމުގެ ސަބަބުން މި ނޮވެމްބަރު މަހު ޗެންނާއީގެ ސްކޫލްތައް ބަންދުކުރަން ޖެހުނު ދެވަނަ ފަހަރެވެ. 12 މިލިއަން މީހުންގެ އާބާދީއެއް އޮންނަ ޗެންނާއީގެ މީހުން ދިރިއުޅޭ ހިސާބުތަކުގައި ވަރަށް ބޮޑަށް ފެންބޮޑުވެފައިވާކަމަށް ޚަބަރުތައް ބުނެއެވެ. އަދި ޗެންނާއީއަކީ އައްސޭރިފަށާ ކައިރީގައިވާ ސިޓީއެއްކަމުން، ވައިގަދަވުމުގެ ސަބަބުންވެސް ވަރަށް ބޮޑަށް ގެއްލުން ލިބެމުންދާކަމަށް ޚަބަރުތައް ބުނެއެވެ.

ކުރިޔަށް އޮތް ދުވަސްތަކުގައިވެސް އިތުރަށް މޫސުން ގޯސްވާނެކަމަށް މޫސުމާބެހޭ އިދާރާތަކުން އަންދާޒާކޮށްފައިވާތީ، ސަރުކާރުގެ ކަމާބެހޭ ފަރާތް ތަކުން ދަނީ އެކަމަށް ތައްޔާރުވަމުންނެވެ.

މޫސުމާބެހޭ މާހިރުން ވިދާޅުވާގޮތުގައި މިހާރަކަށް އައިސް މާ އަވަސްއަވަހަށް ވާރޭވެހުމާއި، އަދި ކުރިއަށް އަންދާޒާ ކުރަން ނޭގުމާއެކު، ހާލުގައިޖެހޭ މީހުންނަށް އެހީވުމުގެ ކަންތަކަށް ތައްޔާރުވުމަށްވެސް ކޮންމެވެސް ވަރަކަށް ހުރަސްއެޅެއެވެ. ނަމަވެސް މިހާރުވެސް އެކި ފަރާތްތަކުން ގެންދަނީ ޕަންޕްތައް ބޭނުންކޮށްގެން ފެން ހިއްކުމާއި އަދި އެހީގެ ތަކެތި ބަހަމުންކަމަށް ޚަބަރުތައް ބުނެއެވެ.

މިފަހަރުގެ މޫސުމީ ކާރިސާ ކުރިމަތިވެފައި މި ވަނީ ފާއިތުވި 30 އަހަރުގެތެރޭގައި ޗެންނާއީ ދުށް އެންމެ ބޯ ވާރޭ ތަޖުރިބާކުރެވުނުތާ ދިހަވަރަކަށް ދުވަސް ފަހުންނެވެ. މިގޮތުން ނޮމެމްބަރ 1ވަނަ ދުވަހު ޗެންނާއީގައި ރިކޯޑް ކުރެވުނީ ފާއިތުވި ތިރީސް އަހަރުވެސް ވެހުނު އެންމެ ބޯ ވާރޭ ކަމަށް ވެއެވެ. އޭގެ ދެތިން ދުވަސް ކުރިން ފެށިގެން މޫސުން ގޯސްވެ ދިމާވި އެކި ހާދިސާތަކުގައި 26 މީހުން މަރުވެފައިވެސް ވެއެވެ.

އިންޑިޔާގެ އެންމެ ބޮޑު އެއް ސިޓީ ކަމަށްވާ ޗެންނާއީއަކީ އިންޑަސްޓްރިއަލް ޕްރޮޑަކްޝަން އަދި އޮޓޮމޮބައިލް މެނުފެކްޗަރިންގގެ ރޮނގުން ފާހަގަކޮށްލެވޭ ސިޓީއެކެވެ. ނަމަވެސް މޫސުން ގޯސްވުމަކީ ޗެންނާއީއަށް އާންމު ކަމެއް ކަމަށް ވެއެވެ.

މީގެ ހަތް އަހަރު ކުރިންވެސް ޗެންނާއީއަށް މޫސުން ގޯސްވެ، ފެންބޮޑުވެ ދިމާވި އެކި ހާދިސާތަކުގައި 400 މީހުން މަރުވެފައިވެއެވެ.