ސިއްހީ ފަރުވާ ހޯއްދެވުމަށް ތިންމަހަށްވުރެ ގިމަ ދުވަހު އިނގިރޭސިވިލާތުގައި ހޭދަކުރެއްވުމަށްފަހު ނައިޖީރިޔާގެ ރައީސް މުހައްމަދު ބުހާރީ ހޮނިހިރު ދުވަހު އެނބުރި ގައުމަށް ވަޑައިގެންފިއެވެ.

އެހާ ދުވަސްވެގެން ދިޔައިރުވެސް އެ މަނިކުފާނުގެ އާލާސްކަންފުޅަކީ ކޮބައިކަމެއް ހާމައެއް ނުކުރައްވައެވެ.

އުމުރުފުޅުން 74 އަހަރުގެ ބުހާރީ ލަންޑަނަށް ވަޑައިގަތުމަށް ގައުމުން ފުރާ ވަޑައިގެންފައިވަނީ މެއި މަހުގެ 7 ވަނަ ދުވަހުއެވެ.

ރައީސް ބުހާރީ ގައުމުގައި ނެތުން ވެގެން ގޮސްފައިވަނީ ގައުމުގައި ނުތަނަވަސްކަން އުފެދުނު ކަމަކަށެވެ. އެނބުރި ގައުމަށް ވަޑައިގަތުމަށް ނުވަތަ އިސްތިއުފާދެއްވުމަށްވެސް އެ ގައުމުގެ ބައެއް ރައްޔިތުން ގޮވާލާފައިވެއެވެ.

ހޯމަ ދުވަހުގެ ހެނދުނު 7 ޖަހާއިރު ރައީސް ބުހާރީ ގައުމާ މުޚާތަބުކުރައްވާނެ ކަމަށް ބެލެވޭ ކަމަށް އެ މަނިކުފާނުގެ އޮފީހުން ބުނެފައިވެއެވެ.

މިދިޔަ ދުވަސްތަކުގައި ބުހާރީގެ އޮފީހުން ގެންދިޔައީ ބުހާރީ ގައުމަށް ވަޑައިގަންނަވާނެކަމަށް ޔަގީންކަން ދެއްވުމަށް ރަސްމީ ބައްދަލުވުންތަކުގައި އިންނެވި ފޮޓޯތައް އާއްމުކުރަމުންނެވެ.

މިއީ ސިއްހީ ފަރުވާއަށް މި އަހަރުގެ ތެރޭ ބުހާރީ ވަޑައިގެންނެވި ދެވަނަ ފަހަރެވެ. މީގެ ކުރިން ޖެނުއަރީ މަހު އެ ގައުމަށް ވަޑައިގެން ދެ މަހެއްހާ ދުވަހު މަޑުކުރެއްވިއެވެ.

ޑިޕްލޮމޭޓުންނާއި ސަރުކާރުގެ އޮފިޝަލުން ވިދާޅުވާ ގޮތުގައި ފުރަތަމަ ނެންގެވި ޗުއްޓީއަށްފަހު މާޗް މަހުގެ 10 ވަނަ ދުވަހު ގައުމަށް އެނބުރި ވަޑައިގެން ބުހާރީ ވަނީ މަސައްކަތް ކުރައްވާ ދުވަސްތައް މަދުކޮށް މަދު ގަޑިއިރުތަކަކަށް ބަދަލުކުރައްވާފައެވެ.

މީގެ ދެ އަހަރުކުރިން 2015 ވަނަ އަހަރު ބޭއްވި ރިޔާސީ އިންތިޚާބުގައި ބުހާރީއާ ވާދަ ކުރެއްވި އިދިކޮޅު ލީޑަރު ވިދާޅުވަމުން ގެންދަވަނީ ބުހާރީއަށް ޕްރޮސްޓްރޭޓް ކެންސަރު ޖެހިވަޑައިގެންފައިވާކަމަށެވެ. އެވާހަކަ ބުހާރީ ދޮގުކުރައްވައެވެ.

ބުހާރީގެ ހަތަރު އަހަރުގެ ދައުރު ނިމޭނީ 2019 ވަނަ އަހަރުއެވެ.