ފައްޔާޒް - ސަރުކާރަށް ފަސޭހަވާ ގޮތް ދޫކޮށްލާ، ޚިދުމަތް ހޯދާ މީހުންނަށް ފަސޭހަކޮށްދިނުމުގެ އުންމީދުގައި

ސަރުކާރަށް ފަސޭހަވާ ގޮތް ދޫކޮށްލާ، ޚިދުމަތް ހޯދާ މީހުންނަށް ފަސޭހަކޮށްދިނުމަށް މި ސަރުކާރުން ވިސްނާކަމަށް އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވެއްޖެއެެވެ.

ސަރުކާރަށް 4 އަހަރު ފުރުމާއި ގުޅިގެން އިކޮނޮމިކް މިނިސްޓްރީގެ މަސައްކަތްތަކާއި މެދު ވާހަކަދައްކަވަމުން މިނިސްޓަރ ފައްޔާޒް ވިދާޅުވީ ޒަމާނުއްސުރެ ރާއްޖޭގައި ކަންކަން ބައްޓަންކޮށްފައި ހުރީ ސަރުކާރަށް ފަސޭހަ ވާނެ ގޮތް ވިސްނައިގެން ކަމަށެވެ. އެހެންނަމަވެސް އެ އުސޫލު މިހާރު ދޫކޮށްލާފައިވާ ކަމަށް ފައްޔާޒް ވިދާޅުވިއެވެ. މި ސަރުކާރުން ކުދި އަދި މެދުފަންތީގެ ވިޔަފާރިތައް ކުރިއަރުވަން ވަރަށް ބޮޑެތި މަސައްކަތްތަކެއްކޮށްފައިވާ ކަމަށް ފައްޔާޒް ވިދާޅުވިއެވެ. އަދި އަންހެނުން ބާރުވެރިކޮށް އިގްތިސޯދީ ގޮތުން ކުރިއަރާފައިވާ ފުދުންތެރިބަޔަކަށް އަންހެނުން ހެދުމަށް ގިނަ މަސައްކަތްތަކެއް ކޮށްފައިވާ ކަމަށް އެމަނިކުފާނު ވަނީ ވިދާޅުވެފައެވެ.

ފައްޔާޒް ވިދާޅުވީ ރާއްޖޭގެ ގަވާއިދުތައް ހުންނަނީ މާ ހަރުކަށިކޮށް ކަމަށް ވެސް ފާހަގަކުރައްވާފައެވެ. ރާއްޖޭގެ ގަވާއިދުތައް ހުރީ ރާއްޖެ އަށް އެންމެ ފެތޭގޮތަށް ނޫން ކަމަށް ވެސް ފައްޔާޒް ވިދާޅުވިއެވެ. ރާއްޖޭގެ މާހައުލަށް ފެތޭގޮތަށް ކަންކަން އިސްލާހުކުރަން ޖެހޭ ކަަމަށާއި އެކަން ކުރުމަށް ގެންނަން ޖެހޭ ގާނޫނީ ބަަދަލުތައް ގެނައުމުގެ މަސައްކަތް ކުރައްވާނެ ކަމަށް ވެސް ފައްޔާޒް ވިދާޅުވިއެވެ. އަދި ލޯން ޑިފޯލްޓްވުމުން ނަގާ އިންޓްރެސްޓް ފަދަ ކަންކަން މިހާރަށް ވުރެ ހަރުދަނާކުރުމަށް މަސައްކަތްކުރައްވާނެ ކަމަށް ފައްޔާޒް ވިދާޅުވިއެވެ.

ރާއްޖެ އަށް ބޭނުންވާ އިންވެސްޓްމަންޓްތައް ހޯދުމަށް ރާއްޖޭގެ ގާނޫނަށް ގެންނަން ޖެހޭ ބަަދަލުތައް ގެނެސް އިގްތިސާދަށް މިހާރަށް ވުރެ ފަހި މާހައުލެއް ގާއިމްކުރުމުގެ ވިސްނުން ގެންގުޅުއްވާ ކަމަށް ވެސް ފައްޔަޒް ވިދާޅުވިއެވެ.