އިކޮނޮމިކް މިނިސްޓްރީން ރޯދަމަހު އަސާސީ މުދަލުގެ އަގުތަކުގެ މަޢުލޫމާތު ރައްޔިތުންނަށް ލިބޭނެ 'އަގު މަގު ޕޯޓަލް' އިފްތިތާހު ކޮށްފިއެވެ. މިނިސްޓަރ މުޙައްމަދު ސަޢީދު އިފްތިތާހުކުރެއްވި މި ޕޯޓަލް އިން އަސާސީ މުދާ އެންމެ ހެޔޮ އަގުގައި ލިބެން ހުރި ތަންތަނުގެ މައުލޫމާތު ހުންނާނެ ކަމަށް އިކޮނޮމިކް މިނިސްޓްރީން ބުނެއެވެ.

މިނިސްޓްރީން މަޢުލޫމާތު ދިން ގޮތުގައި، މި ޕޯޓަލްގައި ހަފްތާއަކު އެއްފަހަރު އިންސްޕެކްޝަން ޓީމުތަކުން ފިހާރަތަކަށް ޒިޔާރަތްކޮށް އެއްކުރާ މަޢުލޫމާތުގެ އަލީގައި އަސާސީ ކާބޯތަކެތީގެ އެންމެ ދަށް އަގުތައް ފެންނަން ހުންނާނެއެވެ. މިއީ ރޯދަމަހު އަގުތައް މަތިކުރުން ހުއްޓުވުމަށާއި ރައްޔިތުންނަށް އެންމެ އެކަށީގެންވާ އަގުތައް ހޯދުމަށް އެހީތެރިވެދޭނެ ވަސީލަތެއް ކަމަށް މިނިސްޓްރީން ބުނެއެވެ.

މިނިސްޓަރ ސަޢީދު ވިދާޅުވި ކަމަށް ބައެއް މީޑިއާތަކުގައ ރިޕޯޓު ކޮށްފައިވަނީ މި ޕޯޓަލް ފަރުމާކުރެވިފައިވަނީ ބައިނަލްއަޤްވާމީ މިންގަނޑުތަކާ އެއްގޮތަށެވެ. އަދި ކުރިމަގުގައި ވިޔަފާރިވެރިންނަށްވެސް އަމިއްލައަށް އަގުތައް ޕޯސްޓްކުރެވޭނެ ގޮތަށް ޕޯޓަލް ތަރައްޤީކުރެވޭނެކަމަށް ސައީދު ވިދާޅުވިއެވެ.މިވަގުތު މި ޕޯޓަލްގައި ހުރީ ހަމަ އެކަނި މާލެ އާއި ހުޅުމާލޭގެ އަގުތަކެވެ. އަދި ކުރިއަށް އޮތްތަނުގައި އަތޮޅުތަކުގެ އަގުތައްވެސް ހިމެނޭނެކަމަށް މިނިސްޓްރީން މަޢުލޫމާތު ދެއެވެ. ޕޯޓަލްގައި ހިމެނޭ އަސާސީ ކާބޯތަކެތީގެ ލިސްޓު އެކުލަވާލެވިފައިވަނީ ބައިނަލްއަޤްވާމީ އަދި ރާއްޖޭގެ މިންގަނޑުތަކާ އެއްގޮތައް ކަމަށް ވެސް މިނިސްޓްރީން ބުނެއެވެ.މާރުކޭޓުގެ އަގުތަކުގެ ހާމަކަން އިތުރުކުރުމުގެ ސަބަބުން ހަމަހަމަ ވާދަވެރިކަން އިތުރުވެ، ރޯދަމަހު ގޭބިސީތަކަށް ކުރިމަތިވާ މާލީ ބުރަ ލުއިވާނެކަމަށް މިނިސްޓްރީން ބުނެއެވެ.

މިހާރު ޕޯޓަލުގައި ފެންނަ ހުރި ބައެއް ތަކެތީގެ އަގުތަކަށް ބަލާއިރު ބާސްމަތީ ހަނޑޫ ކިލޯއެއް އުޅެނީ 41ރ އަށެވެ. ކެބެޖް ކިލޯއެއް 35ރ އަށް ހުރި އިރު، މަސް ދަޅެއް 19ރ އަށް ލިބޭ ކަމަށް ބުނެފައިވެއެވެ. އޭގެ އިތުރުން ކެބެޖް ކިލޯ އެއް 35ރ އަށް ލިބޭ ކަމަށާއި، ގިތެޔޮ މިރުސް ކިލޯ އެއް 250ރ އަށް ލިބޭ ކަމަށް ބުނެފައިވެއެވެ. ލުނބޯ 50ރ އަށް ލިބޭ ކަމަށް ބުނެފައިވާއިރު އަލުވި ކިލޯ އެއް 25ރ އަށް ލިބެން ހުރި ކަމަށްވެސް ބުނެއެވެ.

ޕޯޓަލްގައި ބުނެފައިވަނީ ޑިސްޕްލޭ ކޮށްފައިވާ އަގުތަކަކީ ރެންޑަމް ކޮށް މިނިސްޓްރީގެ އޮފިޝަލުން ތަންތަނަށް ގޮސްގެން ހޯދާ މައުލޫމާތުގެ އިތުރުން ވިޔަފާރި ކުރާ ތަންތަނުން ފޯރުކޮށްދީފައިވާ މައުލޫމާތު ކަމަށެވެ.