"ޤަތަރުގައި ވޯލްޑް ކަޕް ބާއްވަން ނިންމުމަކީ ހެދުނު މިސްޓޭކެއް!"
9 ނޮވެމްބަރު 2022 | ބުދަ 02:20އޭނާ ފާހަގަކުރެއްވި ގޮތުގައި ފުޓުބޯޅަ އާއި ވޯލްޑް ކަޕް ޤަތަރަށްވުރެ ބޮޑު
ފީފާގެ ކުރީގެ ރައީސް ސެޕް ބްލެޓާ
ޤަތަރުގައި ފީފާ ވޯލްޑް ކަޕް މުބާރާތް ބާއްވަން ނިންމުމަކީ ހެދުނު މިސްޓޭކެއް ކަމަށް ފީފާގެ ކުރީގެ ރައީސް ސެޕް ބްލެޓާ ވިދާޅުވެއްޖެއެވެ.
މި މަހުގެ 20 ވަނަ ދުވަހު ޤަތަރުގައި ފަށާ މުބާރާތް އެ ޤައުމުގައި ބާއްވަން ނިންމީ 2010 ވަނަ އަހަރުއެވެ. ޤަތަރަކީ މުބާރާތް ބާއްވާނެ އަރަބި އިސްލާމީ ފުރަތަމަ ޤައުމެވެ. މީގެ އިތުރުން މިހާތަނަށް މުބާރާތް ބާއްވާ އެންމެ ކުޑަ ޤައުމަކީ ވެސް ޤަތަރެވެ. އެކަމާ ގުޅިގެން ބްލެޓާ ވިދާޅުވީ ޤަތަރަކީ ކުޑަ ޤައުމެއް ކަމަށެވެ. އޭނާ ފާހަގަ ކުރެއްވި ގޮތުގައި ފުޓުބޯޅަ އާއި ވޯލްޑް ކަޕް ޤަތަރަށްވުރެ ބޮޑެވެ.
މީގެ އިތުރުން ބްލެޓާ ވިދާޅުވީ ޤަތަރުގައި މުބާރާތް ބޭއްވުމަށްޓަކައި ކްރައިޓީރިއާ އަށް ވެސް ބޮޑު ބަދަލެއް ގެންނަން ޖެހުނު ކަމަށެވެ. އެގޮތަށް އެ ބަދަލު ގެންނަން ޖެހުނީ ޤަތަރުގެ ކޮންސްޓްރަކްޝަން ސައިޓްތަކުގެ ހާލަތު ހުރި ގޮތުން ކަމަށް ވެސް ބްލެޓާ ވަނީ ފާހަގަކުރައްވާފައެވެ. އޭނާ ވިދާޅުވީ ޤަތަރުގައި މުބާރާތް ބާއްވަން އޭރު ނިންމީސުރެ އިޖުތިމާއީ މައްސަލަތަކާއި، އިންސާނީ ހައްގުގެ މައްސަލަތައް ފެންމަތިވާނެ ކަމަށް ބެލެވުނު ކަމަށެވެ.
އިތުރަށް ބްލެޓާ ވިދާޅުވީ ޤަތަރުގައި އޮންނަ ވޯލްޑް ކަޕްގެ ހުރިހާ މެޗެއް ބައްލަވާނެ ކަމަށެވެ. ބްލެޓާ ވަނީ ފީފާގެ ރައީސްކަމުގެ މަގާމު 17 އަހަރު ވަންދެން އަދާކުރައްވާއެވެ. އޭނާ ރައީސްކަމުގެ މަގާމުގައި ހުންނެވީ 1998 ވަނަ އަހަރުގެ ޖޫން 8 ވަނަ ދުވަހުން 2015 ވަނަ އަހަރުގެ ޑިސެމްބަރު މަހުގެ 21 ވަނަ ދުވަހުގެ ނިޔަލަށެވެ.
