ވޯލްޑް ކަޕްގެ ސެމީ ފައިނަލް މެޗު ބެލުމަށް ހަތަރު ނަސީބުވެރިޔަކު ހޮވަައިފި

އުރީދޫގެ ޚިދުމަތެއް ހޯއްދައިވައިގެން ފީފާ ވޯލްޑް ކަޕްގެ ސެމީ ފައިނަލް މެޗެއް ބަލަން ދިޔުމަށް ހަތަރު ނަސީބުވެރިން ހޮވައިފިއެވެ.

މި ނަސީބުވެރިން ހޮވާފައިވަނީ ރާއްޖެ ޓީވީން ކުރިއަށް ގެންދާ ރޯޑް ޓު ވޯލްޑް ކަޕް ޝޯގައެވެ. ހޯމަ ދުވަހުގެ ރޭ ޝޯގައި މި އުރީދޫގެ ޗީފް ކޮމާޝިއަލް އޮފިސަރ އަލީ ނިޔާޒް ވަނީ ބައިވެރިވެ ވަޑައިގެންފައެވެ. ނަސީބުވެރިން ހޮވުމަށް ގުރުނެގީ މާޒިޔާ ސްޕޯޓްސް އެންޑް ރެކްރިއޭޝަންގެ ތިން ކުޅުންތެރިންނާއި ޑެޕިއުޓީ ޗެއާމަންއެވެ.

ގުރުއަތުން ހޮވުނު ނަސީބުވެރި ނަންބަރުތަކަކީ 9669699، 9880888، 40060399 އަދި 9875231 ނަންބަރު ފޯނެވެ. ގުރުއަތުން ހޮވުނު ފަރާތްކުން ޤަތަރަށް ގޮސް މުބާރާތުގެ ސެމީ ފައިނަލް މެޗު ބެލުމުގެ ހުރިހާ ޚަރަދެއް ކުރާނީ އުރީދޫ އިންނެވެ. އޭގެ ތެރޭގައި ދެކޮޅު ޓިކެޓާއި އެކޮމަޑޭޝަން އަދި މެޗު ޓިކެޓުގެ ޚަރަދު ހިމެނޭ ކަމަށް އުރީދޫ އިން މައުލޫމާތުދެއެވެ.

އުރީދޫގެ ޗީފް ކޮމާޝަލް އޮފިސަރ އަލީ ނިޔާޒް ވިދާޅުވީ ބޭނުމަކީ ޤަތަރުގައި އޮންނަ ވޯލްޑް ކަޕަކީ ވަރަށް ފުރިހަމަ މުބާރާތަކަށް ވުން ކަމަށެވެ. ނިޔާޒް ވިދާޅުވީ އުރީދޫ އިން މަސައްކަތް ކުރަމުން އަންނަނީ ޤަތަރުގައި އޮތް ފޯރި ރާއްޖެ އަށް ވެސް ގެނައުމަށެވެ. އެގޮތުން ރާއްޖޭގައި މީހުން ދިރިއުޅޭ ކޮންމެ ރަށެއްގައި ފޭން ޒޯން އެއް ޤާއިމުކުރުމަށް ނިންމާފައިވާ ކަމަށް ނިޔާޒް ފާހަގަކުރެއްވިއެވެ. އަދި މުބާރާތުގެ ތެރެއިން ވެސް ލަކީ ޑްރޯ އޮންނާނެ ކަމަށް ނިޔާޒް ވިދާޅުވިއެވެ.

ނިޔާޒް ވިދާޅުވީ ރާއްޖޭގެ ކޮންމެ ހިސާބަކު ތިބެގެން ވެސް ވޯލްޑް ކަޕް މުބާރާތް ބަލާލެވޭނެ އިންތިޒާމު ހަމަޖެއްސުމުގެ މަސައްކަތް އުރީދޫ އިން ކުރަމުން އަންނަ ކަމަށެވެ.

މިއަހަރުގެ މުބާރާތް ކުރިއަށް ދާނީ މަ މަހުގެ 20 އިން އަންނަ ޑިސެމްބަރު މަހުގެ 18 އަށް ޤަތަރުގައެވެ.