މުވާސަލާތީ ޚިދުމަތްދޭ އުރީދޫ މޯލްޑިވްސް އަށް 2023 ވަނަ އަހަރު 2.1 ބިލިއަން ރުފިޔާގެ އާމްދަނީ އެއް ލިބިފައިވާ ކަމުގައި އެ ކުންފުނިން ހާމަ ކޮށްފިއެވެ.
ޑިސެމްބަރު މަހު 15 ވަނަ ދުވަހު ބޭއްވި އެ ކުންފުނީގެ އެކްސްޓްރާ އޯޑިނަރީ ޖެނެރަލް މީޓީންގ (އީޖީއެމް) ގައި އާންމު ކުރި މައުލޫމާތުގައި ވާ ގޮތުން ހުސްވި އަހަރު ޓެކްސް އަށް ކަނޑާ 685 މިލިއަން ރުފިޔާގެ ފައިދާ އެއް ކުންފުންޏަށް ލިބިފައިވެއެވެ.
މި ޖަލްސާގައި ޖުމްލަ ދޫކޮށްފައިވާ ހިއްސާގެ 90.55 އިންސައްތަ ނިސްބަތްވާ 14 ހިއްސާދާރުން ބައިވެރިވެފައިވެއެވެ. މިއީ 133.8 މިލިއަނަށްވުރެ ގިނަ ހިއްސާއެވެ.
ކާމިޔާބު ކަމާއެކު ނިމިގެން ދިޔަ އީޖީއެމްގައި، ކުންފުނީގެ މެމޮރަންޑަމް އަދި އާޓިކަލްސް އޮފް އެސޯސިއޭޝަނަށް ހުށަހެޅުނު އިސްލާހުތައް ހިއްސާދާރުން ވަނީ ފާސްކޮށްފައެވެ. މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑްގައި އިސްލާހު ތަކާއެކު މެމޮރަންޑަމް އަދި އާޓިކަލްސް އޮފް އެސޯސިއޭޝަން ރަޖިސްޓަރީ ކުރުމުން މި އިސްލާހުތަކަށް ޢަމަލުކުރަން ފެށޭނެ ކަމަށް އުރީދޫ އިން ވަނީ ބުނެފައެވެ.
އީޖީއެމް ގައި ނިންމި އަނެއް މުހިންމު ނިންމުމަކީ، އޫރީދޫ މޯލްޑިވްސް އިން ޓެކްފިން މޯލްޑިވްސް ޕްރައިވެޓް ލިމިޓެޑްގެ 1.5 މިލިއަން ހިއްސާ އޯއެފްޓީ އިންޓަނޭޝަނަލް އަށް ވިއްކައި ބަދަލުކުރުމަށް ހިއްސާދާރުން ފާސްކުރުމެވެ.
އުރީދޫ އަކީ މުވާސަލަތީ ޚިދުމަތްތައް ކުރިއެރުވުމަށް ޒަމާނީ ޓެކްނޮލޮޖީ ރާއްޖެ އަށް ތައާރުފް ކުރުމުގައި ފާހަގަ ކުރެވިގެން ދިޔަ ކުންފުންޏެކެވެ. މުވާސަލަތީ ޚިދުމަތުގެ އިތުރުން އެ ކުންފުންޏަކީ އިޖްތިމާއީ ގޮތުންވެސް ތަފާތު ގިނަ ރޮނގުތަކުން ރާއްޖޭގެ އެކި ކަންކޮޅުތަކުގައި އާންމުން ޝައުގުވެރިވާ ގިނަ ހަރަކާތްތަކެއް ހިންގަމުން އަންނަ ކުންފުންޏެކެވެ.
