"ކޮން ތާކަށް ތިދަނީ؟ ވައްޓާލަދެންތަ؟" - މަގުމަތީގައި ފޮށުން އާދައިގެ ކަމަކަށް

ހެނދުނު އޮފީހަށް އަންނަން ވެގެން އައި ވަގުތެވެ. މީގެ ދުވަސްކޮޅެއް ކުރީގެ ހާދިސާއެކެވެ. ވަގުތަކީ ހެނދުނު 7 ޖަހަން ކައިރިވެފައިވާ ވަގުތަކަށް ވެފައި އެއީ ސްކޫލް ކިޔެވުން އޮތް ދުވަހެއްކަމުން މަގުމަތީގައި ގިނަ އަދަދަކަށް ބެލެނިވެރިންނާއި ސްކޫލް ކުދިން ތިއްބެވެ. ހިނގާ މީހުން ހިނގާފައެވެ. ސައިކަލާއި ކާރުގައި އުޅުނު މީހުންވެސް މަދެއް ނޫނެވެ. ކަންދިމާކުރިގޮތުން އެވަގުތު އަޅުގަނޑަށް އޮފީހަށް އަންނަން މިސްރާބު ފެށުނީ ސްކޫލްތައް ގިނަ ސަރަހައްދަކުންނެވެ. ތަންކޮޅަކަށް ނުދެވެނީސް މީހަކު "ކޮންތާކަށް"ހޭ ބުނި އަޑަަށް އެނބުރި ބަލާލައިފީމެވެ.

އެއީ ދަންނަ މޫނަކަށް ނުވުމުން ލިބުނު ހައިރާންކަން ވީ އިތުރެވެ. އެހެން ވާނެތާއެވެ! އެ ސުވާލަށް ޖަވާބު ނުދީ ހިނގޭތޯ ބެލީމެވެ. ވާހަކަ ފެށުނު ހިސާބުގައި މި ކިޔައިދިނީ ދެން އޭނާ ކުރި ސުވާލުތަކުގެ ތެރެއިން މަދު މިންވަރެކެވެ. ގާތްގަނޑަކަށް 10 ވަރަކަށް މިނިޓު ވަންދެން އެ މީހާ އަޅުގަނޑުގެ ފަހަތުން ސައިކަލުގައި އާދެއެވެ. ދުވާރު މަތިން ހިނގާއިރު އޭނާ އެއްވަރަކަށް ދާންވެގެން ފައި ޖަހައި، ސައިކަލު ދަމަމުން ގޮތަކަށް ފަހަތުން އަންނަކަހަލައެވެ. އޭނާ ފަސްދީ އޮބާލީ އަޅުގަނޑު އޮފީސް ހުންނަ ގޯޅިއާ ހިސާބުންނެވެ. މަގުމަތީގައި ލައްކަ މީހުންވެސް ތިއްބެވެ. އެކަމަކާ މާބޮޑު ސަމާލުކަމެއް ދިން މީހަކު ނެތެވެ. ދެ ތިން ފަހަރު ހިނގާފައި އޮފީހަަށް ދާން ބޭނުންވާކަމަށާއި، އެހީއަކަށް ބޭނުންނުވާ ވާހަކަ ބުނީމެވެ. އެކަމަކު އެ މީހާއަށް "ނޫނެކޭ" ބުނާ އަޑެއް ނީވެއެވެ.

ކައިރިން ދިޔަ ބައެއް މީހުން ބަލަނީ ކުދިން އެއްކައިރިކޮށްގެން ދުރަށް ލެވޭތޯއެވެ. އަނެއް ބަޔަކު އިސްދަށަށް ޖަހާލައެވެ. އޮފީހަށް އައިސް ވަދެފައި ހިތަށް އެރިއެވެ. މަގުމަތީގައި ފޮށުން ހާދަހާ އާއްމު ކަމަކަށްވީތާއެވެ. އެކަމާ ބަސްބުނާނެ މީހެއް، އަޅާލާނެ މީހެއް ނެތެވެ. އެ މީހަކާއި އެ މީހެކެވެ. އެހީވާނެ މީހަކު ނެތެވެ. އެކަމަކު މާދަމާވެސް ބޮޑު ހާދިސާއެއް ހިނގައިފިއްޔާ އިންސާފުގެ ނަމުގައި ބޯޑު ހިފައިގެން ސެލްފީ ނަގަން ދާނެއެވެ. އިޖުތިމާއީ ޒިންމާ އަދާކުރަންވީމައި އެކަމެއް ނުކުރެވެއެވެ. ހިތާމައަކީ މަގުމަތީގައި ހިނގާ މިފަދަ ކަންކަން ނުފެންނަކަމަށް ހަދާކަމެވެ. އެއީ ނުވާ ކަންކަމަށް ހަދައިގެން ތިއްބައި ހޭވެރިކަން ވަނީ މާ ލަސްވާ ފަހުންނެވެ. އެހެންނޫނީ މަގުމަތީގައި މީހުންނާއި ފޮށުމަކީ ވަރަށް އާދައިގެ ކަމެކެވެ.