ލޮރިއެންޓް ބަލިކޮށް ޕީއެސްޖީ އަށް ފަސް ޕޮއިންޓުގެ ލީޑެއް

ފްރާންސް ލީގުގައި ލޮރިއެންޓް ބަލިކޮށް ޗެމްޕިއަން ޕެރިސް ސެއިންޓް ޖާމަން (ޕީއެސްޖީ)އިން އެއް ވަނައިގައި ފަސް ޕޮއިންޓުގެ ލީޑެއް ނަގައިފިއެވެ.

އާދިއްތަ ދުވަހުގެ ރޭ ލޮރިއެންޓްގެ ދަނޑުގައި ކުޅުނު މެޗު ޕީއެސްޖީން ކާމިޔާބުކުރީ 2-1 އިންނެވެ. މެޗުގައި ޕީއެސްޖީގެ އާޖެންޓީނާ ތަރި ލިއޮނެލް މެސީ ނުކުޅެއެވެ. މެސީގެ ބަދަލު ކޯޗު ކްރިސްޓޮފާ ގަލްޓިއޭ ފުރުސަތު ދިނީ ހޫގޯ އެކިޓޭޓްއަށެވެ. މެޗުގައި ފުރަތަމަ ލަނޑު ޖަހާ ލީޑު ނެގީ ވެސް ޕީއެސްޖީންނެވެ. އެކިޓޭޓް ތަނަވަސްކޮށްދިން ފުރުސަތަކުން މެޗުގެ ނުވަ ވަނަ މިނެޓުގައި ލަނޑު ޖެހީ ނޭމާ ޖޫނިއާއެވެ. ދެ ވަނަ ހާފުގައި ލޮރިއެންޓަށް ނަތީޖާ ހަމަހަމަކޮށްދިނީ ޓެރެމް މޮފީއެވެ. މެޗުން ޕީއެސްޖީ މޮޅުކޮށްދިން ލަނޑު 81 ވަނަ މިނެޓުގައި ޑެނީލޯ ޕެރެއިރާ ޖެހީ ނޭމާގެ އެހީތެރިކަމާއެކުއެވެ.

މެޗުން މޮޅުވެ ޕީއެސްޖީ އެއް ވަނައިގައި އޮތީ ކުޅުނު 14 މެޗުން 38 ޕޮއިންޓާއެކުއެވެ. މެޗުން ބަލިވި ލޮރިއެންޓް އޮތީ 27 ޕޮއިންޓާއެކު ތާވަލްގެ ހަ ވަނަ މަގާމުގައެވެ. ލީގު ތާވަލްގެ ދެ ވަނައިގައި އޮތް ލެންސް އަށް ލިބެނީ 33 ޕޮއިންޓެވެ.