އިޓާލިއަން ސެރީ އޭގައި އިންޓަރ މިލާން ބަލިކޮށް, ޔުވެންޓަސް ތާވަލްގެ ފަސްވަނަ އަށް ޖެހިލައިފިއެވެ.
އަމިއްލަ ދަނޑުގައި ޔުވެންޓަސްއިން އިންޓަރ މިލާން ބަލިކުރީ 2-0 ނެވެ. މެޗުގައި ޔުވެންޓަސްއިން ދެ ލަނޑު ވެސް ޖެހީ ދެ ވަނަ ހާފްގައެވެ. ލަނޑެއް ނުޖެހި ނިމުނު ފުރަތަމަ ހާފްގައި ރަނގަޅަށް ކުޅުނީ އިންޓަރ މިލާނުންނެވެ. އެކަމަކު ދެ ވަނަ ހާފްގައި ފިލިޕް ކޮސްޓިޗް ތަނަވަސްކޮށްދިން ދެ ފުރުޞަތުން ޔުވެންޓަސްއިން ދެ ލަނޑު ޖެހިއެވެ. ފުރަތަމަ ލަނޑު 52 ވަނަ މިނެޓުގައި ޖެހީ އެޑްރިއެން ރަބިއޯއެވެ. ދެވަނަ ލަނޑު 84 ވަނަ މިނެޓުގައި ޖެހީ ނިކޯލޯ ފަޖިއޯލީއެވެ. އޭގެކުރިން ޑަނީލޯ ޔުވެންޓަސް އަށް އިތުރު ލަނޑެއް ޖަހައިދިން ނަމަވެސް ވީއޭއާރުން ބެލުމަށްފަހު ނިންމީ އަތުގައި ބޯޅަ ޖެހުނު ކަމަށެވެ.
މިމޮޅާ އެކު ޔުވެންޓަސް ތާވަލްގެ ފަސް ވަނައިގައި އޮތީ 13 މެޗުން 25 ޕޮއިންޓާ އެކުއެވެ. އިންޓަރ މިލާން އޮތީ 13 މެޗުން 24 ޕޮއިންޓާ އެކު ހަތް ވަނައިގައެވެ. މެޗަށް ނުކުތްއިރު މެޗުން މޮޅުވެގެން ހަތަރު ވަނަ އަށް ޖެހިލުމުގެ ފުރުޞަތު އިންޓަރ މިލާނަށް އޮތެވެ.
