އިދިކޮޅު ޕީޕީއެމް/ޕީއެންސީ އިން ކުރިއަށްގެންދިޔަ "އިންޑިއާ އައުޓް" ހަރަކާތްތައް ހުއްޓުވުމަށް ހިންގި އޮޕަރޭޝަނުގައި ބައިވެރިވި ފުލުހުންގެ މައުލޫމާތު ހާމަކުރުން ފަސް ކުރުމަށް ހައި ކޯޓުން އަމުރުކޮށްފިއެވެ.
އިދިކޮޅު ފަރާތްތަކުން ހިންގާ "އިންޑިއާ އައުޓް" ހަރަކާތުގައި ގޭގޭގައި ހަރުކުރި ބެނާތައް ނަގަން ފުލުހުން ހިންގި އޮޕަރޭޝަންގައި ބައިވެރިވި ވަކިވަކި ފުލުހުންގެ މައުލޫމާތާއި އިސްކޮށް ހަރަކާތްތެރިވި ފުލުހުންގެ މައުލޫމާތު ދޭން އިންފޮމޭޝަން ކޮމިޝަނަރުގެ އޮފީހުން ވަނީ އަންގާފައެވެ. އެ އިދާރާއިން އެ ގޮތަށް އެންގީ އަމިއްލަ ފަރާތަކުން އެދުމުންނެވެ.
ނަމަވެސް މި މައްސަލަ ފުލުހުންގެ ފަރާތުން ވަނީ ހައި ކޯޓުގައި އިސްތިއުނާފު ކޮށްފައެވެ. އެގޮތުން މައްސަލަ ނިމެންދެން އިންފޮމޭޝަން ކޮމިޝަނަރުގެ އޮފީހުގެ ނިންމުމަށް އަމަލު ކުރުން މަޑު ޖައްސާލުމުގެ ވަގުތީ އަމުރަކަށް ފުލުހުން ވަނީ އެދިފައެވެ.
ހައި ކޯޓުން އާދީއްތަ ދުވަހު ނެރުނު އަމުރުގައި ބުނީ އެ އެންގުމަށް އަމަލު ކުރުން ފަސްނުކޮށްފި ނަމަ ފުލުހުންގެ މަސްލަހަތަށް އުނިކަން އަތުވެދާނެ ކަމަށް ބެލެވޭ ކަމަށެވެ. އެހެންކަމުން އެ އެންގުމަށް އަމަލު ކުރުން ފަސް ކުރުމަށް ކޯޓުން ވަނީ އަންގައިފައެވެ.
