ސުލޫކީ މައްސަލަ ބަލަނީ ވަކި ކޯޓެއް ގެ ފަނޑިޔާރަކަށް ވީތީ ވަކި ގޮތަކަށް އަމަލު ކުރާކަށް ނޫން: ޖޭއެސްސީ

ޖުޑީޝަލް ސަރވިސް ކޮމިޝަން (ޖޭއެސްސީ) އަށް ހުށަހެޅޭ ސުލޫކީ މައްސަލަތައް ބެލުމު ގައި ކޮމިޝަނުން ސަމާލުކަން ދެނީ ވަކި ކޯޓެއް ގެ ފަނޑިޔާރަކަށް ވީތީ ވަކި ގޮތަކަށް އަމަލު ކުރަން ނޫން ކަމަށް އެ ކޮމިޝަނުން ބުނެފި އެވެ.

ހައިކޯޓު ގެ ބެންޗު ގައި ހިމެނޭ 11 ފަނޑިޔާރުން ގެ ތެރެއިން ފަސް ފަނޑިޔާރެއް ގެ ސުލޫކީ މައްސަލަތަކެއް ޖޭއެސްސީ އިން ބަލަން ފެށުމާ ގުޅިގެން އެ ކޮމިޝަނަށް ވަނީ ގިނަ ބައެއް ގެ ފާޑުކިޔުން އަމާޒުވެފަ އެވެ.

އެކަމާ ގުޅިގެން ނެރުނު ނޫސް ބަޔާނެއް ގައި ޖޭއެސްސީ އިން ބުނީ ގާނޫނު އަސާސީ ގެ 157 ވަނަ މާއްދާ ގެ (ށ) ގައި "ޖުޑީޝަލް ސަރވިސް ކޮމިޝަނަކީ ވަކިފަރާތަކަށް ބުރަނުވާ، މުސްތަގިއްލު މުއައްސަސާއެއް ކަމާއި، އެ ކޮމިޝަނު ގެ ވާޖިބުތަކާއި މަސްއޫލިއްޔަތުތައް އަދާކުރާންވާނީ ގާނޫނު އަސާސީ އާއި ރައްޔިތުން ގެ މަޖިލީހުން ފާސްކުރާ ގާނޫނާ އެއްގޮތްވާ ގޮތުގެމަތީން" ކަމަށް ބަޔާން ކޮށްފައިވާ ކަމަށެވެ.

ބަޔާނުގައި ބުނީ ދިވެހިރާއްޖޭ ގެ ފަނޑިޔާރު ގެ އަކީ ރައްޔިތުން އިތުބާރު ކުރާ، އަދުލު އިންސާފު އޭގެ އެންމެ ފުރިހަމަ ގޮތުގައި ފޯރުކޮށްދޭ ތަނަކަށް ހެދުމަކީ އެ ކޮމިޝަން ގެ ޒިންމާ އެއް ކަމަށެވެ. އަދި އަދުލުވެރި ކަމާއެކު ޝަރީއަތް ހިންގާ، އަވަސް ކަމާއެކު އިންސާފު ފޯރުކޮށްދޭ ފަރާތްތަކަކަށް ޝަރުއީ ކޯޓުތަކު ގައި މަސައްކަތް ކުރާ ފަނޑިޔާރުން ވާން ޖެހޭނެ ކަމަށެވެ.

އެހެން ކަމުން ފަނޑިޔާރުންނާ މެދު ހުށަހެޅޭ ޝަކުވާތައް ބަލައި، ފަނޑިޔާރުން ގެ މަސައްކަތު ގެ ފެންވަރު ބެލުމާއި ތަމްރީން ދިނުމާއި ފަނޑިޔާރުން ގެ ސަލާމަތާއި ރައްކާތެރިކަން ކަށަވަރު ކުރުމަށްޓަކައި އަޅަންޖެހޭ ފިޔަވަޅުތައް ކޮމިޝަނުން އަޅަމުންދާ ކަމަށް ވެސް ޖޭއެސްސީ ގެ ބަޔާނުގައި ވެއެވެ.

އޭގެ އިތުރުން ފަނޑިޔާރުން ގެ މަސައްކަތާއި ގުޅޭ އިދާރީ އިންތިޒާމްތަކާއި ކަންކަން ހަމަޖެހިފައި ވޭތޯ ކަށަވަރު ކުރަމުން ދާ ކަމަށް ވެސް ބަޔާނުގައި ވެއެވެ.

ޖޭއެސްސީ އިން ބުނީ ކޮމިޝަނަށް ހުށަހެޅޭ ސުލޫކީ މައްސަލަތައް ބެލުމުގައި ކޮމިޝަނުން ސަމާލުކަން ދެނީ ވަކިކޯޓެއް ގެ ފަނޑިޔާރަކަށް ވީތީ، ވަކި ގޮތަކަށް އަމަލު ކުރުމަކަށް ނޫން ކަމަށެވެ. އެއީ ކޮންމެ ކޯޓެއް ގެ ފަނޑިޔާރަކަށް ވީނަމަ ވެސް ކޮމިޝަނަށް ހުށަހެޅޭ ޝަކުވާގައި ފާހަގަ ކޮށްފައިވާ ކަންކަމާ ގުޅިގެން މައުލޫމާތު ސާފުކޮށް، ބަލަންޖެހޭ އެންމެހައި ކަންކަން އެންމެ ފުރިހަމަ އަށް ބަލަމުންދާ ކަން ފާހަގަކޮށްފައި ވެއެވެ.

އެ ހުރިހާ ކަމެއް އެންމެ ފުރިހަމަ އަށް ބެލުމަށްފަހު ގައި ނޫނީ އެއްވެސް ފަނޑިޔާރެއް ގެ ސުލޫކީ މައްސަލަ އެއް ބެލުމަށް ނިންމާފައި ނުވާނެ ކަމަށް ވެސް ޖޭއެސްސީ އިން ބުނެފައި ވެއެވެ. އަދި އެކަން އެ ކޮމިޝަން ގެ ތަފާސް ހިސާބުތަކުން ކަށަވަރުކޮށްދޭ ކަމަށް ވެސް ބަޔާނުގައި ވެއެވެ.

ޖޭއެސްސީ އިން ބުނީ ފަނޑިޔާރުން ގެ ސުލޫކީ މައްސަލަތަކު ގެ ގޮތުގައި މި އަހަރު ގެ މިހާތަނަށް 176 ޝަކުވާ ކޮމިޝަނަށް ހުށަހެޅިފައިވާއިރު، އޭގެ ތެރެއިން ތަހުގީގު ކުރަން ނިންމާފައި ވަނީ 57 ޝަކުވާ ކަމަށެވެ. އަދި ސުލޫކީ މައްސަލަ ބެލުމަށްފަހު، ސާބިތުވެ ފިޔަވަޅު އެޅުމަށް ނިންމާފައި ވަނީ 6 ފަނޑިޔާރުންނަށް ކަމަށެވެ.

އެ ކޮމިޝަނުން ސަމާލުކަން ދެނީ ހުށަހެޅިފައިވާ ޝަކުވާ އާއި އެ ޝަކުވާއަކާ ގުޅިގެން ހުށަހަޅާ ހެކީގެ މައްޗަށް ކަމަށް ޖޭއެސްސީ އިން ބުނެ އެވެ. އެހެން ކަމުން ވަކި ކޯޓެއް ގެ ފަނޑިޔާރުން ގެ މައްސަލަތައް ކޮމިޝަނުން ވަކިން ޚާއްސަ ސަމާލުކަމެއް ދީގެން ތަހުގީގު ކުރާ ކަމަށް ދޭހަވާ ގޮތަށް އާންމުގެ މެދުގައި މައުލޫމާތު ފެތުރުމަކީ އެންމެ ޒިންމާދާރު ގޮތް ކަމަށް ކޮމިޝަނުން ނުދެކޭ ކަމަށް ވެސް ބަޔާނުގައި ވެއެވެ.