ކުކުޅުބިހާއި ފުށާއި ސޯހާއެކު ފަލަސްތީނުން ތަފާތު ހަމަލާއެއް!

ދިރިއުޅުމުގެ މައިދާނުގައި ޖަހާލެވޭ އެންމެ މުހިންމު އެއް ގޮށަކީ ހަޔާތުގެ ބައިވެރިޔާއާއެކު ބަނދެލާ ކައިވެނީގެ ގޮށެވެ. ކައިވެންޏަކީ 2 މީހެއްގެ ހަޔާތަށް އަންނަ ބޮޑު ބަދަލަކަށް ވާއިރު، އެ ކައިވެންޏަށް ތައްޔާރުވަމުންދާ އަންހެން ކުއްޖާއާއި ފިރިހެން ކުއްޖާގެ އާއިލާއާއި ރަހުމަތްތެރިންގެ ފަރާތުން އެކަން ފާހަގަވެސް ކޮށްދެއެވެ. ދުނިޔޭގެ އެކި ކަންކޮޅުތަކުގައި އެކަން އޮވެއެވެ. ތަފާތުވަނީ އެކި ހިސާބުތަކުގައި އެކަން ކޮށްއުޅޭ ގޮތެވެ. ހަނގުރާމައާއި ދެންވެސް އޮތީވިއްޔާ އޮތްހާ ޖަރީމާއެއްގައި ކަސްތޮޅުއެޅިފައިވާ ފަލަސްތީނުގައިވެސްމެއެވެ. ނަމަވެސް، ދުނިޔޭގެ އެހެން މަންޒިލްތަކާ ތަފާތު ގޮތަކަށެވެ.

ހުޅަނގު އައްސޭރީގައި ކައިވެންޏަކަށް ތައްޔާރުވެފައިވާ ފިރިހެން ކުއްޖާއަށް މަރުހަބާ ކިއަނީ އާދަޔާޚިލާފު ގޮތަކަށެވެ. ކައިވެނީގެ ކުރިން އެ ފިރިހެން ކުއްޖާގެ އާއިލާ މެންބަރުންނާއި ރަހުމަތްތެރިން އެއް ތަނަކަށް އެއްވެ، އުފާ ފާޅުކުރުންތައް ފަށައެވެ. ކައިވެނިކުރާ ފިރިހެން ކުއްޖާއަށް ފުރަތަމަވެސް އަމާޒުވަނީ ކުކުޅު ބިހާއި، ތެލާއި، ސޯސް އަދި ފުށާއި އެނޫންވެސް އެފަދަ ކާބޯތަކެތީގެ ހަމަލާތަކެވެ. އެއީ ފަލަސްތީނުގައި އެކަމުގެ ސަގާފަތް އޮންނަ ގޮތެވެ.

ޒަވާޖީ ހަޔާތެއްގެ އުއްމީދީ ފެށުމަކަށް ކެތްމަދުވެފައި ހުރި ޒުވާނާއަށް މިފަދަ ހަފުލާތަކުގައި އަމާޒުކުރާ ހަމަލާތައް ވަކިން ވަރުގަދަހެންވެސް ހީވެއެވެ. މާޒީގައި ހިނގާފައި އޮތް ކަމެއްގެ ބަދަލު ހިފުމުގެ ރޫހުވެސް އޮންނަ ކަހަލައެވެ.

ކައިވެނި ކުރަން ތައްޔާރުވެފައިވާ ފިރިހެން ކުއްޖާއަށް، ކާބޯތަކެތީގެ ހަމަލާތައް އަމާޒު ކުރުމަކީ މީގެ އެތައް ޖީލެއް ކުރިއަށް މޫލާފައި އޮތް ސަގާފަތަކަށް ވީ ނަމަވެސް، ފާއިތުވެދިޔަ އަހަރުތަކުގެ ތެރޭގައި އެކަމަށް ވަނީ ހިސާބަކަށް ބަދަލުތަކެއްވެސް އައިސްފައެވެ. މި ހަރަކާތް ފެށިގެން އައީ ކައިވެނި ކުރަން ތައްޔާރުވެފައިވާ ފިރިހެން ކުއްޖާ ފެންވަރުވައި، ތުނބުޅި ބޭލުވުންފަދަ ޒީނަތްތެރިވުމުގެ ރަމްޒީ ހަރަކާތެއްގެ ގޮތުގައެވެ. ނަމަވެސް، އަދުގެ މެނޫގައި މުޅިންހެންވެސް ހިމެނެނީ ކާބޯތަކެއްޗެވެ. ނެށުމާއި ލަވަކިއުމުގެ ހަރަކާތްތައްވެސް އެހާމެ ފޯރިއާއެކު ކުރިއަށްދެއެވެ.