މުއިއްޒު ވެރިކަމަށް ވަޑައިގެންނެވިފަހުން އެއްވެސް ރައްޔިތެއްގެ ފުރާނައަށް ގެއްލުންވާ ގޮތަށް މަރުވެގެން ގޮސްފައެއް ނުވޭ: ސުޖާއު
17 ސެޕްޓެމްބަރު 2026 | ބުރާސްފަތި 15:06ގިސާސް ހިފުމާއި މަސްތުވާތަކެތި އެތެރެކުރާ މީހުންނަށް މަރުގެ އަދަބު ދިނުމަށް ރައީސް ނިންމަވާފައިވާ ނިންމެވުމަކީ ރައީސް މުއިއްޒުއަށް ދެވަނަ ދައުރެއް ދޭންޖެހޭ ސަބަބުތަކެއް ކަމަށް ސުޖާއު ފާހަގަކުރެއްވި
ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހީމް ސުޖާއު | މަޖިލިސް
ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންނެވިފަހުން، ފުރާނައަށް ގެއްލުންވާ ގޮތަށް އެއްވެސް ޒުވާނެއް ނުވަތަ ރައްޔިތެއް މަރުވެގެން ގޮސްފައިނުވާ ކަމަށް ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހީމް ސުޖާއު ވިދާޅުވެއްޖެ އެވެ.
ސުޖާއު މިހެން ވިދާޅުވީ، މިހާރު ކުރިއަށްދާ ޕީއެންސީ ކޮންގްރެސްގައި ވާހަކަދައްކަވަމުންނެވެ.
ސުޖާއު ވިދާޅުވީ، ރައީސް މުއިއްޒު ވެރިކަމަށް ވަޑައިގަތުމުގެ ކުރިން ޒުވާނުން ވަޅިހަރައިގެން މަރަމުން ދިޔަ ކަމަށާއި، ނަމަވެސް އެމަނިކުފާނު ވެރިކަމަށް ވަޑައިގެންނެވިފަހުން ފުރާނައަށް ގެއްލުންވާ ގޮތަށް އެފަދަ ހާދިސާއެއް ހިނގާފައި ނުވާ ކަމަށެވެ.
މީގެއިތުރުން ރައީސް މުއިއްޒު އަށް ދެވަނަ ދައުރެއް ދޭންޖެހޭ މުހިންމު ސަބަބުތަކެއް ވާ ކަމަށް ވިދާޅުވެ، ސުޖާއު އިތުރަށް ވިދާޅުވީ، ރައީސް މުއިއްޒު ވަނީ މި ގައުމުގައި ގިސާސް ހިފުން ކަށަވަރު ކޮށްދެއްވާނެކަން ރައްޔިތުންނަށް ޔަގީންކޮށްދެއްވާފައި ކަމަށެވެ. އަދި ދިވެހި ރާއްޖޭގައި ކުރިން ވެރިކަން ކުރެއްވި އެއްވެސް ވެރިއަކަށް ގިސާސް ހިފުމަށް ކެރިވަޑައިގެންފައިނުވާކަން އޭނާ ފާހަގަކުރެއްވި އެވެ.
ރައީސް މުއިއްޒު އަށް ދެވަނަ ދައުރެއް ދޭންޖެހޭ އަނެއް ސަބަބެއްގެ ގޮތުގައި ސުޖާއު ފާހަގަ ކުރެއްވީ، ކެތްތެރިކަމާ އެކު ކޮންމެ ރައްޔިތެއްގެ ވާހަކަ ވެސް ކަނުލައި އަޑު އައްސަވާ ރައީސެއްގެ ގޮތުގައި ރައީސް މުއިއްޒު ހުންނެވުމެވެ. މީގެ އިތުރުން، ރައީސް މުއިއްޒު، މަސްތުވާތަކެތި ރާއްޖެ އެތެރެ ކުރާ ފަރާތްތަކަށް މަރުގެ އަދަބު ދިނުމަށް ނިންމަވާފައިވާ ކަމަށާއި، އެ ސަބަބާ ހުރެ ވެސް ދެވަނަ ދައުރެއް ދިނުން ލާޒިމު ކަމަށް ސުޖާއު ވިދާޅުވި އެވެ.
ރައީސް މުއިއްޒަށް ދެވަނަ ދައުރެއް ދޭން މިޖެހެނީ ގިސާސް މިގައުމުގައި ހިފާނެކަން އެމަނިކުފާނު ދިވެހި ރައްޔިތުންނަށް ކަށަވަރު ކޮށްދީފައިވާތީވެ. އެއީ މިގައުމުގެ ވެރިކަން ކުރެއްވި އެއްވެސް ވެރިއަކަށް ކުރަން ކެރުނު ކަމެއް ނޫން. ރައީސް މުއިއްޒު ވެރިކަމަށް ވަޑައިގަތުމުގެ ކުރިން ޒުވާނުން މަރަމުން ދިޔައީ އެމަނިކުފާނު ވެރިކަމަށް ވަޑައިގެންނެވިފަހުން އެއްވެސް ޒުވާނަކު އަދި އެއްވެސް ރައްޔިތެއްގެ ފުރާނައަށް ގެއްލުންވާ ގޮތަށް އަދި އެއްވެސް ޒުވާނެއް މަރުވެގެން ގޮސްފައެއް ނުވޭ. ވަޅި ޖަހާ ވަޅި ހަރައިގެންނެއްއިބްރާހީމް ސުޖާއު
ސުޖާއު ވިދާޅުވީ، 2028 ވަނަ އަހަރު ރައީސް މުއިއްޒު އަށް ރިޔާސީ ދައުރެއް ނުލިބިއްޖެ ނަމަ، ހިތާމަކުރަންޖެހޭނެ ކަމަށެވެ. އެހެންކަމުން، ރައްޔިތުން އުފަލާއި ހިތްހަމަޖެހުމުގައި ދިރިއުޅެން ބޭނުންނަމަ، ރައީސް މުއިއްޒު އަށް ދެވަނަ ދައުރެއް ދިނުން މުހިއްމު ކަމަށް ސުޖާއު ވިދާޅުވި އެވެ.
މަރުތަކާ ގުޅުވައި ސުޖާއު ވާހަކަ ދައްކަވާފައިވާއިރު، ތޫނު އެއްޗެހި ބޭނުންކޮށްގެން ހަމަލާދިނުމާއި އެކި ބާވަތުގެ ޖިނާއީ ކުށްތައް މިފަހުން ވެސް ރާއްޖޭގައި ހިނގާފައިވާކަން ފާހަގަ ކުރެވެ އެވެ. އަދި ގޮތް ނޭނގޭ މަރުގެ ހާދިސާތަކެއް ވެސް ހިނގާފައިވެ އެވެ. މިފަދަ ގިނަ ހާދިސާތަކެއް ހިނގާފައިވާ އިރު، އިހުމާލުން މަރުވި ޒުވާނުންގެ މަރުތަކާ ގުޅިގެން ރައްޔިތުންގެ މެދުގައި ކަންބޮޑުވުމާއި ނުތަނަވަސްކަން އިތުރުވެގެން ދިޔަކަން ފާހަގަކުރެވެ އެވެ.
މަރުގެ ހުކުމް ތަންފީޒު ކުރުމާ ގުޅޭ ގޮތުން މިދިޔަ މާޗް މަހުގެ 23 ވަނަ ދުވަހު ރައީސް މުއިއްޒު ވިދާޅުވެފައިވަނީ، އަދުލު އިންސާފު ގާއިމުކުރުމުގައި މަރުގެ އަދަބު ތަންފީޒުކުރުމަކީ މިހާރު ކޮންމެހެން ކުރަންޖެހޭ ކަމެއް ކަމަށާއި އެކަމާ ގުޅޭގޮތުން އެޓާނީ ޖެނެރަލްގެ އޮފީހުން ތައްޔާރުކުރާ ބިލް އޮތީ ފަހުގެ މަރުހަލާގައި ކަމަށެވެ. ރާއްޖޭގައި މަރުގެ ހުކުމް ތަންފީޒުކުރުމަށް ޝަރުއީ ހުރިހާ މަރުހަލާއެއް ނިމިފައި ތިބި އެތައް ބަޔަކު އެބަ ތިއްބެވެ. ރައީސް މުއިއްޒު ވިދާޅުވީ ކުރީ ސަރުކާރުތަކުން ވެސް މި އަދަބު ތަންފީޒުކުރާނެ ކަމަށް ބުނި ނަމަވެސް، މިހާތަނަށް ވެސް އެ ކަން ކުރެވިފައިނުވާ ކަމަށެވެ.
