މިހާރު އޮތީ ފައިސާ ޓްރާންސްފަރ ކުރުމުގެ މަރުހަލާގައި
އިސްލާމިކް މިނިސްޓްރީގައި ބޭއްވި ނޫސްވެރިންގެ ބައްދަލުވުމުގެ ތެރެއިން
ފަލަސްތީނުގެ ރައްޔިތުންނަށް އެހީވުމަށް ޒަކާތު ހައުސްއިން އެއްލައްކަ ޑޮލަރު ދިނުމަށް ނިންމައިފިއެވެ.
އިސްލާމިކް މިނިސްޓްރީގައި މިދިޔަ ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު ވިދާޅުވީ ޒަކާތު ހައުސްއިން ފަލަސްތީނުގެ ގައްޒާ ރައްޔިތުންނަށް އެހީގެ ގޮތުގައި އެއްލައްކަ ޑޮލަރު ދިނުމަށް ނިންމައި އެމަސައްކަތްތައް ކުރަމުންދާ ކަމަށެވެ.
އެގޮތުން އެހީ ފޯރުކޮށްދިނުމަށް ގަތަރުގެ ރެޑްކްރޮސެންޓާއެކު މަޝްވަރާތައް ކުރަމުންދާ ކަމަށެވެ. އަދި މިހާރު އޮތީ ފައިސާ ޓްރާންސްފަރ ކުރުމުގެ މަރުހަލާގައި ކަމަށް މިނިސްޓަރު ޝަހީމް ވިދާޅުވިއެވެ.
ޒަކާތުގެ ނިޒާމު ހަރުދަނާކުރުމާއި ގުޅޭގޮތުން ވެސް މިނިސްޓަރު ޝަހީމް ވަނީ ވާހަކަ ދައްކަވާފައެވެ. މިނިސްޓަރު ވިދާޅުވީ ޒަކާތުގެ ނިޒާމު ހަރަދަނާ ކުރުމުގެ މަސައްކަތައް ކުރަމުންދާ ކަމަށާއި، އެނިޒާމުގެ ތެރެއިން ވައްކަން ނުކުރެވޭނެ ކަމަށެވެ. ބައެއް މީހުން ސިޔާސީ މަންފާއެއް ހާސިލްކުރުމަށް އެނިޒާމާމެދު ސުވާލު އެފެއްދި ނަމަވެސް ޒަކާތުގެ ނިޒާމު ފަރުމާކުރެވި ތަރުތީބު ކުރެވިފައިވަނީ ވައްކަން ކުރެވޭ ގޮތަށް ނޫން ކަމަށް މިނިސްޓަރު ޝަހީމް ވިދާޅުވިއެވެ.
މިގެ އިތުރުން މިނިސްޓަރު ޝަހީމް ވަނީ ވިޔަފާރިވެރިން ޒަކާތް ދެއްކުމަށް އެދިވަޑައިގެންފައެވެ. އަދި އެއީ މުދަލުގައި ބަރަކާތްލައްވާ ކަމެއް ކަމަށް ފާހަގަކުރެއްވިއެވެ.
