ހަމާސްގެ ޕޮލިޓިކަލް ބިއުރޯގެ ވެރިޔާގެ އާއިލާއަށް އިސްރާއީލުން ދިން ވައިގެ ހަމަލާގައި މަރުވި މީހުންގެ އަދަދު 7 އަށް އަރައިފިއެވެ.
ރަމަޟާން މަސް ނިމުމާ ދިމާކޮށް މުސްލިމުންގެ ފިތުރު އީދު ޗުއްޓީގެ ފުރަތަމަ ދުވަހު އުފާފާޅުކުރުމަށް ދަތުރުކުރަމުން ދަނިކޮށް، ޣައްޒާ ސިޓީ ކައިރީގައި އޮންނަ އަލްޝާޓީ ރެފިއުޖީ ކޭމްޕްގައި ހަނިއްޔާ އާއިލާގެ މީހުން ދަތުރުކުރަމުން ދިޔަ ކާރަކަށް އަމާޒުކޮށް ދިން ވައިގެ ހަމަލާގައި އޭނާގެ ތިން ފިރިހެން ދަރިންނާއި އޭނާގެ ހަތަރު ދައްތަ މަރުވެފައވާކަމަށް ރެސިސްޓެންސް ގުރޫޕުން ނެރުނު ބަޔާނެއްގައި ބުނެފައިވެއެވެ.
އެ ބަޔާނުގައި ބުނެފައިވަނީ ހަނިއްޔާގެ އާއިލާގެ މީހުންގެ ފުރާނަ ގެއްލުނީ "ޚިޔާނާތްތެރި އަދި ބިރުވެރި" ހަމަލާއެއްގައި ކަމަށެވެ.
މަންޒަރު ދުށް މީހުން ބުނި ގޮތުގައި ވައިގެ ހަމަލާގެ ސަބަބުން ކާރު ހަލާކުވެ، އެތެރޭގައި ތިބި އެންމެން ވަނީ މަރުވެފައެވެ.
އެ ބަޔާނުގައި ބުނެފައިވަނީ މި ހަމަލާގައި ޝަހީދުވި މީހުންނަކީ ވެސް ފަލަސްތީނުގެ ރައްޔިތުން ކަމަށާއި އޮޕަރޭޝަން އަލް އަޤްޞާ ތޫފާނުގައި މަރުވި މީހުންނާއެކު މީގެ ކުރިން ޝަހީދުވި ހަނިއްޔާ އާއިލާގެ މީހުންގެ ސަފުގައި އެމީހުން ގުޅިފައިވާ ކަމަށެވެ.
އަދި ހަމާސްގެ ލީޑަރުންނާއި އެމީހުންގެ އާއިލާތަކަށް އިސްރާއީލުން ހަމަލާތައް އަމާޒުކުރުމަކީ ނާކާމިޔާބު ދުޝްމަނުން ހަނގުރާމައިގައި ކުރާ ނާތަހުޒީބު ފިނޑި އަމަލެއް ކަމަށް ވެސް އެ ބަޔާނުގައި ވެއެވެ.
އަދި މިފަދަ ޙަމަލާތަކުގެ ސަބަބުން ހަމާސް ޖަމާއަތާއި ފަލަސްޠީނުގެ ރައްޔިތުންގެ ދެކޮޅުވެރިކަމުގެ ވިސްނުން ކެނޑިގެން ނުދާނެކަމަށާއި، އެކަމުގެ ސަބަބުން އެމީހުންގެ ޢަޒުމް އިތުރުވެގެންދާނެކަން އެ ބަޔާނުގައި ފާހަގަކޮށްފައިވެއެވެ.
އަދި އިސްރާއީލުން ޓެރަރިޒަމްގެ އަމަލުތައް އިތުރުކޮށް، އެގައުމުން ހިންގާ ޖަރީމާތަކާއި، ދިފާއު ނެތް އާންމުންނަށް ދޭ ހަމަލާތައް އިތުރުކޮށް، ހަނގުރާމަ ހުއްޓާލުމުގެ އެއްބަސްވުމާ ގުޅޭ މަޝްވަރާތައް ކުރިއަށް ދާއިރު، އެ މަޝްވަރާތައް ކާމިޔާބު ވާނެ ކަމާމެދު ޝައްކު އުފެދޭ ކަމަށްވެސް އެ ބަޔާނުގައި ވެއެވެ.
ފަލަސްތީނުގެ ހަމާސް ޖަމާއަތުން މިދިޔަ އޮކްޓޯބަރު މަހުގެ ހަތް ވަނަ ދުވަހު ޣައްޒާއަށް ދިން ހަމަލާގައި ގާތްގަނޑަކަށް 1،200 އެއްހާ މީހުން އިސްރާއީލުން މަރުވި ފަހުން އިސްރާއީލުން ވަނީ ޣައްޒާއަށް އަސްކަރީ ހަމަލާތަކެއް ދޭން ފަށައިފައެވެ.
ހަނގުރާމަ ފެށި ފަހުން ޣައްޒާގައި ފަލަސްތީނުގެ 33،500 އެއްހާ މީހުން ވަނީ ޝަހީދުވެފައެވެ.
މީގެ އިތުރުން ޣައްޒާގެ އުތުރުގެ ރައްޔިތުން ބަނޑުހައިހޫނުކަމުގެ ތެރެއަށް ވެއްޓިފައިވާއިރު، މި ހަނގުރާމައިގެ ސަބަބުން ޣައްޒާގެ އާބާދީގެ 85 އިންސައްތަ މީހުން ވަނީ ކާބޯތަކެއްޗާއި ސާފު ފެނާއި ބޭހުގެ ދަތިކަން ބޮޑުވެ ކާރިސާއަކަށް ވެއްޓިފައެވެ.
