އަބްދުﷲ ރަޝީދުގެ ހަށިގަނޑު ޕޯސްޓްމޯޓަމް ހެދުމަށްފަހު ރާއްޖެ ގެނެސްފި
5 ނޮވެމްބަރު 2022 | ހޮނިހިރު 07:18ކަށުނަމާދު ކުރުން އޮންނާނީ އާސަހަރާ މިސްކިތުގައި މަޢްރިބް ނަމާދަށް ފަހު
ގަލޮޅު ސަހަރާ ކައިރިއަށް އަބްދުﷲ ރަޝީދުގެ އާއިލާގެ މީހުން އެއްވެފައި
ފުލުހުންގެ ބެލުމުގެ ދަށުގައި ހުއްޓާ މަރުވި އަބްދުﷲ ރަޝީދުގެ ހަށިގަނޑު ޕޯސްޓްމޯޓަމް ހެދުމަށްފަހު ރާއްޖެ ގެނެސްފިއެވެ.
އަބްދުﷲ ރަޝީދުގެ ހަށިގަނޑު ޕޯސްޓްމޯޓަމަށް ގެންދިޔައި މިދިޔަ މަހު 31 ގައެވެ. އަބްދުﷲ ރަޝީދުގެ މައްޗަށް ކަށުނަމާދު ކުރުން އޮންނާނީ އާސަހަރާ މިސްކިތުގައި މަޢްރިބް ނަމާދަށް ފަހުއެވެ.
އަބްދުﷲ ރަޝީދު މަރުވީ ގދ. ހޯނޑެއްދޫއިން އޭނާ ހައްޔަރުކޮށްގެން އެ އަތޮޅުގެ މަޑަވެލީ ޕޮލިސް ސްޓޭޝަނަށް ގެންދަނިކޮށެވެ. އޭނާ ހައްޔަރުކޮށްގެން ލޯންޗަށް އެރުވުމުން މޭގައި ރިއްސާކަމަށް ބުނުމުން ވެސް ފުލުހުން އަޅާނުލި ކަމަށް ބުނެ އާއިލާއިންނާއި އެކި ފަރާތްތަކުން ވަނީ އެކަމުގައި ފުލުހުންގެ އިހުމާލު އޮތްކަމަށް ބުނެފައެވެ.
އަބްދުﷲ ރަޝީދު ހައްޔަރުކުރީ މަސްތުވާތަކެތި އެތެރެކުރާކަމުގެ ތުހުމަތުގައެވެ. ފުލުހުން ވިދާޅުވީ، އޭނާ ނިޔާވީ މެއަށް ތަދެއް އަރައިގެން އޭނާގެ ކިބައިން ސިޒަރގެ ޢަލާމަތްތަކެއް ފެނުމާއި ގުޅިގެން ގދ. މަޑަވެލި ސިއްޙީ މަރުކަޒަށް ގެންދިޔަ މަގުމަތީގައި ކަމަށެވެ. އޭނާ ސިއްޙީ މަރުކަޒަށް ގެންދިޔައިރުވެސް ނިޔާވެފައިވާކަމަށް ޑޮކްޓަރުންނާއި ޙަވާލާދީ ފުލުހުން ވިދާޅުވެއެވެ.
މި މައްސަލަ ތަޙުޤީޤުކުރުމަށް ރަޝީދުގެ ޕޯސްޓްމޯޓަމް ހަދަން ނިންމައި އޭނާގެ ހަށިގަނޑު ޕޯސްޓްމޯޓަމަށް ފޮނުވީ އިންޑިއާއަށެވެ. ބައެއް ފަރާތްތަކުން އަންނަނީ އޭނާގެ މަރުގައި ފުލުހުންގެ އިހުމާލެއް ވާކަމަށް ތުހުމަތުކުރަމުންނެވެ. އެހެންކަމުން އޭނާގެ ޕޯސްޓްމޯޓަމް ހަދަނީ ފުލުހުންގެ އިހުމާލެއް ވޭތޯ ބެލުމަށެވެ. ނަމަވެސް އޭނާގެ ޕޯސްޓްމޯޓަމް ހެދުމަށް އާއިލާއިން ވަނީ ދެކޮޅު ހަދާފައެވެ.
މި މައްސަލަ ބަލަމުން ދަނީ ނޭޝަނަލް އިންޓެގްރިޓީ ކޮމިޝަނުންނެވެ. މި މައްސަލައިގައި ކަންހިނގައި ދިޔަ ގޮތް އިންސާފުވެރިކަމާއެކު، ރަނގަޅަށް ތަހުގީގުކުރުމަށް އިރުޝާދު ދެއްވައި، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އާއި ހޯމް މިނިސްޓަރ އިމްރާން އަބްދުﷲއާ ވަނީ ވާހަކަފުޅު ދައްކަވާފައެވެ. ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ މި މައްސަލައިގައި ކަން ހިނގަމުންދާ ގޮތް ރައީސުލްޖުމްހޫރިއްޔާ ގާތުން ބައްލަވަމުން ގެންދަވާ ކަމަށެވެ.
