ޗޮޕޫ މޯޓިން އަކީ މިވަގުތު ބަޔާންގައި އެންމެ ރަނގަޅަށް ކުޅޭ އެކަކު: ނާގަލްސްމަން

ޖަރުމަނުގެ ބަޔާން މިއުނިކަށް ކުޅެމުން އަންނަ ކެމަރޫންގެ ފޯވާޑް ޗޮޕޫ މޯޓިން އަކީ މިވަގުތު އެ ކުލަބުގައި އެންމެ ރަނގަޅަށް ކުޅޭ އެއް ކުޅުންތެރިޔާ ކަމަށް ހޫލިއަން ނާގަލްސްމަން ބުނެފިއެވެ.

ބަޔާންގެ ކޯޗު ނާގަލްސްމަން މިހެން ބުނީ ޖަރުމަނު ލީގާއި، ޗެމްޕިއަންސް ލީގުގައި ޗޮޕޫ މޯޓިން ދައްކަމުން އަންނަ ކުޅުމަށް ގުޅުވައިގެންނެވެ. ފްރާންސްގެ ޕެރިސް ސެއިންޓް ޖާމަން (ޕީއެސްޖީ) ދޫކޮށް އުމުރުން 33 އަހަރުގެ ފޯވާޑް ބަޔާނަށް ބަދަލުވީ 2020 ވަނަ އަހަރުއެވެ.

ނާގަލްސްމަން ބުނީ ޗޮޕޫ މޯޓިން ދައްކަމުން އަންނަ ކުޅުމާއި، އޭނާގެ ހުނަރާމެދު ވަރަށް ހިތްހަމަ ޖެހޭ ކަމަށެވެ. ނާގަލްސްމަން ބުނީ އޭނާ އަށް ފެންނަ ގޮތުގައި ޗޮޕޫ މޯޓިން ބަޔާންގައި ހުންނަނީ ކުލަބާމެދު ހިތްހަމަ ޖެހި، ކުލަބުގައި ހުންނަ ހިތުން ކަމަށެވެ. ކުލަބުގެ ފަރިތަކުރުންތަކާއި، މެޗުތަކުގައި އަދި ޚާއްސަކޮށް މުހިންމު މެޗުތަކުގައި ޗޮޕޫ މޯޓިން މޮޅު ކުޅުމެއް ދައްކާކަން ފާހަގަކޮށް ނާގަލްސްމަން ބުނީ، އޭނާ އަކީ މިވަގުތު ބަޔާންގައި ހުރި އެންމެ މޮޅު އެއް ކުޅުންތެރިޔާ ކަމަށެވެ.

ބަޔާނަށް ބަދަލުވެ ޗޮޕޫ މޯޓިން ވަނީ މިހާތަނަށް އެ ކުލަބަށް 71 މެޗު ކުޅެދީ 26 ލަނޑު ޖަހާފައެވެ. މި ސީޒަނަކީ ޗޮޕޫ މޯޓިން ބަޔާންގައި އެންމެ ރަނގަޅަށް ކުޅޭ ސީޒަނެވެ. މި ސީޒަންގެ މިހާތަނަށް ކުޅުނު 13 މެޗުން އޭނާ ވަނީ އަށް ލަނޑު ޖަހާފައެވެ. ބަޔާނާއެކު އޭނާ ވަނީ ޖަރުމަނު ލީގާއި، ޖަރުމަނު ސުޕަ ކަޕް އަދި ފީފާ ކުލަބް ވޯލްޑް ކަޕް ކާމިޔާބުކޮށްފައެވެ.