އިންގްލެންޑުގެ ޗިލްވެލްއަށް ވޯލްޑް ކަޕްގައި ނުކުޅެވިދާނެ
ވޯލްޑް ކަޕްގައި އިންގްލެންޑުގެ ފުރަތަމަ މެޗު އޮތީ ނޮވެމްބަރު 21 ވަނަ ދުވަހު
ބެން ޗިލްވެލްއަށް އަނިޔާވުން
މި މަހު ފަށާ ފީފާ ވޯލްޑް ކަޕްގައި އިންގްލެންޑުގެ ލެފްޓް ބެކް, ބެން ޗިލްވެލްއަށް ނުކުޅެވިދާނެކަމުގެ ބިރު ހީވެއްޖެއެވެ.
ޗިލްވެލްއަށް ވޯލްޑް ކަޕްގައި ކުޅެވިދާނެކަމާމެދު ސުވާލު އުފެދުނީ ޗެމްޕިއަންސް ލީގުގައި ޗެލްސީއާއި ޑައިނަމޯ ޒަގްރެބް ބައްދަލުކުރި މެޗުގައި އޭނާއަށް އަނިޔާވުމުންނެވެ. އެމެޗުގައި ޗިލްވެލްގެ ފައިގެ ފަލަމަސްގަނޑަށް އަނިޔާވެގެން ވަނީ ބަދަލުކޮށްފައެވެ.
ޗިލްވެލްގެ އަނިޔާއާ ގުޅިގެން ޗެލްސީގެ ކޯޗު ގްރަހަމް ޕޮޓާ ބުނީ، ޗިލްވެލްގެ އަނިޔާއިން އެހާ އަވަހަށް ސަލާމަތް ވެވިދާނެކަމަށް ގަބޫލު ނުކުރާ ކަމަށެވެ. އަދި މިކަމާގުޅިގެން އިތުރަށް އެއްޗެސް ބުނަން އެނގޭނީ އިތުރު ޓެސްޓުތަކެއް ހެދުމަށްފަހުކަމަށް ޕޮޓާ ބުންޏެވެ.
ވޯލްޑް ކަޕްގައި އިންގްލެންޑުގެ ފުރަތަމަ މެޗު އޮތީ ނޮވެމްބަރު 21 ވަނަ ދުވަހުއެވެ. މި މެޗުގައި އިންގްލެންޑު ނުކުންނަން ޖެހޭނީ އީރާނާ ދެކޮޅަށެވެ. އީރާނާއި އިންގްލެންޑުގެ އިތުރުން ގްރޫޕް ބީގައި ދެން ހިމެނެނީ ވޭލްސްއާއި އެމެރިކާއެވެ.
ގަތަރުގައި ބޭއްވުމަށް ހަމަޖެހިފައިވާ މި މުބާރާތް ފަށާނީ ނޮވެމްބަރު 20 ވަނަ ދުވަހުއެވެ.
