އެންޑޯރާ ބަލިކޮށް އިންގްލެންޑަށް ހަތަރު ވަނަ މޮޅު

ފީފާ ވޯލްޑް ކަޕް ކޮލިފިކޭޝަންގައި އެންޑޯރާއާ ދެކޮޅަށް ކުޅުނު މެޗުން މޮޅުވެ، އިންގްލެންޑުން ހަތަރު މެޗު ވެސް ކާމިޔާބު ކޮށްފި އެވެ.

ހޮނިހިރު ދުވަހުގެ ރޭ ކުޅުނު މެޗު އިންގްލެންޑުން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި އިންގްލެންޑުން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ 25 ވަނަ މިނެޓުގައި އިންގްލެންޑަށް ލީޑު ލިބުނީ، އެންޑޯރާގެ ކްރިސްޓިއަން ގާސިއާ އަތުން ބައި ކޮޅަށް ވަތް ލަނޑުންނެވެ. އެއީ އިންގްލެންޑުގެ ނޯނީ މަޑުއޭކޭ ހުރަސްކުރަން މަސައްކަތް ކުރި ބޯޅަ ދިފާއު ކުރަން އުޅުމުގެ ތެރޭގައި ގާސިއާ އަތުން ބައި ކޮޅަށް ވަތް ލަނޑެކެވެ.

މެޗުގެ ދެ ވަނަ ހާފުގައި އިންގްލެންޑުން ވަނީ ދެ ވަނަ ލަނޑެއް ޖަހައި ލީޑު ފުޅާ ކޮށްފަ އެވެ. އެގޮތުން މެޗުގެ 67 ވަނަ މިނެޓުގައި އިންގްލެންޑަށް އެ ލަނޑު ޖަހައިދިނީ ޑެކްލަން ރައިސް އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ރީސް ޖޭމްސް އެވެ.

މެޗަށް ފަހު ވާހަކަ ދައްކަމުން އިންގްލެންޑުގެ ކޯޗު ތޯމަސް ޓުޗެލް ބުނީ، މެޗުގެ ފުރަތަމަ ހާފުގެ ލަނޑަށް ފަހު، އިންގްލެންޑަށް އުނދަގޫ ތަކެއް ކުރިމަތިވި ކަމަށެވެ. ޚާއްސަކޮށް ވަރަށް ފަސޭހަ ބޯޅަ ތަކެއް ވެސް ގެއްލުވާލެވޭ ކަމަށް އޭނާ ބުންޏެވެ. އެހެން ނަމަވެސް، މެޗުގެ ދެ ވަނަ ހާފުގައި އެކަން ވަރަށް ބޮޑަށް ރަނގަޅު ކޮށްފައިވާ ކަމަށާއި، ޓީމުގެ ކުޅުމުން އެކަން ފާހަގަވި ކަމަށް ޓުޗެލް ބުންޏެވެ.

އިތުރަށް އޭނާ ބުނީ އިންގްލެންޑަށް ދެ ވަނަ ހާފުގައި ވެސް ގިނަ ފުރުސަތު ތަކެއް ލިބުނު ކަމަށާއި، ނަމަވެސް އެ ފުރުސަތުގެ ބޭނުން އެންމެ އެކަށީގެންވާ ގޮތުގައި ނުހިފުނު ކަމަށެވެ. އެގޮތުން ބައެއް ކުޅުންތެރިން އެމީހުންގެ އެންމެ ރަނގަޅު ކުޅުން ނުދެއްކުނު ދުވަހަކަށް ވެސް ވެދާނެ ކަމަށާއި، ކުރިއަށް އޮތް ތަނުގައި އެކަންކަން ރަނގަޅު ކުރުމަށް ސަމާލު ކަމެއް ދޭނެ ކަމަށް ޓުޗެލް ބުންޏެވެ.

ކޮލިފިކޭޝަންގައި ދެން އިންގްލެންޑަށް އޮންނާނީ ސާބިއާއާ ދެކޮޅަށް ކުޅޭ މެޗެވެ.