ރޯމާ ދޫކޮށްލުމަށްފަހު ސަލާހް ލިވަޕޫލްއަށް ސޮއިކޮށްފި

ރޯމާ ދޫކޮށްލުމަށްފަހު މިސްރުގެ ފޯވާޑް މުހައްމަދު ސަލާހް ލިވަޕޫލް އަށް ސޮއިކޮށްފި އެވެ.

ސަލާހް ލިވަޕޫލްއާ އެކު މެޑިކަލް ހެދުމަށްފަހު ޓްރާންސްފާގެ ހުރިހާކަމެއް ފުރިހަމަކޮށްފައިވާއިރު، އޭނާ ވަނީ އެ ކްލަބާއެކު ފަސް އަހަރު ދުވަހުގެ އެއްބަސްވުމެއްގައި ސޮއިކޮށްފައެވެ.

ލިވަޕޫލް އިން ސަލާހްގެ ޓްރާންސްފާ ހާމަކޮށްފައިވާއިރު، އޭނާ އެ ކްލަބަށް ބަދަލުވީ 36 މިލިއަން ޕައުންޑަށްކަމަށްވެއެވެ. އެގޮތުން އޭނާ އަށް ހަފްތާއެއްގެ މައްޗަށް 90،000 ޕައުންޑު ލިބޭނެއެވެ.

ލިވަޕޫލްގެ ޖާޒީ ނަމްބަރު 11 ސަލާހް އަށް ލިބޭއިރު، 11 ނަމްބަރު ޖޯޒީ ކުރިންލި ރޮބާޓޯ ފިރްމިނޯ އަށް ލިބިފައިވަނީ 9 ނަމްބަރު ޖޯޒީ އެވެ.

ލިވަޕޫލް އިން ވަނީ 2013 ވަނަ އަހަރުވެސް ސަލާހް ހޯދުމަށް މަސައްކަތްކޮށްފައެވެ. އެހެންނަމަވެސް އެފަހަރު ލިވަޕޫލް އިން ކުރި މަސައްކަތް ވަނީ ބޭކާރުވެފައެވެ.

މި ސީޒަނުގައި ރޯމާ ލީގުގެ ދެވަނައިގައި ނިންމާލި އިރު، އެޓީމުގެ ފޯވާޑް އެޑިން ޒެކޯ ވަނީ ލީގުގެ ޓޮޕް ސްކޯރާގެ މަގާމު 39 ލަނޑާއެކު ހޯދާފައެވެ. މީގެއިތުރުން އުމުރުން 24 އަހަރުގެ ސަލާހް ވަނީ މި ސީޒަނުގެ ހުރިހާ މުބާރާތެއްގައި އެއްކޮށް 19 ލަނޑު ކާމިޔާބުކޮށްފައެވެ.

ބަސެލް، ޗެލްސީ އަދި ފިއޮރެންޓީނާ ފަދަ ކްލަބްތަކަށް ކުޅެފައިވާ ސަލާހް ވަނީ ކާމިޔާބީތަކެއްވެސް ހޯދާފައެވެ. އެގޮތުން އޭނާ ވަނީ ބަސެލްއާއެކު ސްވިސް ސުޕާ ލީގު އަދި ޗެލްސީއާއެކު ޕްރިމިއާ ލީގުވެސް ކާމިޔާބުކޮށްފައެވެ. މީގެއިތުރުން އޭނާ ވަނީ އިޖިޕްޓް ގައުމީ ޓީމާއެކު މި އަހަރު ކަޕް އޮފް ނޭޝަންސްގެ ދެވަނަވެސް ހޯދާފައެވެ.