ސަލްސްބާގް ބަލިކޮށް އޭސީ މިލާން ދެ ވަނަ ބުރަށް

ޔުއެފާ ޗެމްޕިއަންސް ލީގު ގްރޫޕް އީގައި ސަލްސްބާގް ބަލިކޮށް އޭސީ މިލާނުން މުބާރާތުގެ ދެ ވަނަ ބުރުން ޖާގަ ހޯދައިފިއެވެ.

އޭސީ މިލާންގެ ދަނޑުގައި ސަލްސްބާގާ ދެކޮޅަށް ނިކުތްއިރު، އެ ޓީމަށް ލިބެނީ ފަސް މެޗުން ހަތް ޕޮއިންޓެވެ. ސަލްސްބާގަށް ލިބެނީ ފަސް މެޗުން ހަ ޕޮއިންޓެވެ. އެހެންކަމުން މިލާން ބަލިކޮށްގެން ސަލްސްބާގަށް ދެ ވަނަ ބުރަށް ދެވެން އޮތެވެ. ނަމަވެސް މިލާނުން ވަނީ 0-4 އިން ސަލްސްބާގް ބަލިކޮށްފައެވެ.

ސަލްސްބާގާ ދެކޮޅަށް މިލާނުން މޮޅު ކުޅުމެއް ދެއްކީ ފްރާންސްގެ އޮލިވިއޭ ޖިރޫޑްއެވެ. މެޗުގައި އޭނާ ވަނީ ދެ ލަނޑު ޖަހާ، ދެ ލަނޑު ޖެހުމަށް އެހީތެރިވެދީފައެވެ. މެޗުގެ 14 ވަނަ މިނެޓުގައި މިލާނަށް ލީޑު ނަގައިދިނީ ޖިރޫޑްއެވެ. އެއީ ސަންޑްރޯ ޓޮނާލީ ތަނަވަސްކޮށްދިން ފުރުސަތަކުންނެވެ. މިލާންގެ އަނެއް ތިން ލަނޑު ފެނުނީ މެޗުގެ ދެ ވަނަ ހާފުގައެވެ. ދެ ވަނަ ހާފު ފަށައިގެން ފުރަތަމަ މިނެޓުގައި ޖިރޫޑް ތަނަވަސްކޮށްދިން ފުރުސަތަކުން މިލާންގެ ދެ ވަނަ ލަނޑު ޖެހީ ރޭޑް ކްރުނިޗްއެވެ. އޭގެ ފަހުން މެޗުގެ 57 ވަނަ މިނެޓުގައި މިލާންގެ ތިން ވަނަ ލަނޑު ޖެހީ ޖިރޫޑްއެވެ. މިލާންގެ ފަހު ލަނޑު ޖޫނިއާ މެސީއަސް ޖެހީ މެޗުގެ އިތުރު ވަގުތުގައި ޖިރޫޑް ތަނަވަކޮށްދިން ފުރުސަތަކުންނެވެ.

މޮޅާއެކު މިލާނުން ދެ ބުރަށް ދަތުރުކުރީ ގްރޫޕްގެ ދެ ވަނައިގައެވެ. އެއީ ކުޅުނު ހަ މެޗުން 10 ޕޮއިންޓާއެކުއެވެ. މި ގްރޫޕްގެ އެއް ވަނައިގައި ދެ ވަނަ ބުރަށް ދިޔައީ ޗެލްސީއެވެ. މިލާން އަތުން ބަލިވި ސަލްސްބާގަށް ލިބެނީ ހަ މެޗުން ހަ ޕޮއިންޓެވެ. އެ ޓީމަށް ޖެހޭނީ ޔުއެފާ ޔޫރޮޕާ ލީގުގައި ވާދަކުރާށެވެ. ހަތަރު ޕޮއިންޓާއެކު ފުލުގައި އޮތީ ޑައިނަމޯ ޒަގްރެބްއެވެ.